NIKUPA 1
“Kini Kinamwasya Iputxeputxhe Sorimela”
Epucepuche yoohaleeliheya. Vaavaa mucharapo onaphiyaaya va nikuwani, enniimwalanya. Vano, henawerya woona ipucepuche ikina naari mano mukukhula. Nthowa na epiiphi, epucepuche yoorimeela ennamorela mmukotini mummo arimo axinama awoopiha, nave eyo hiyaano nikhaviheryo. Vookuchulani, eyo enniiwa nsu esuwenlaaya—na mukukhula yowo onachimakela epucepuche, onnaviihamo mmukotini, onnateexa ahuruwela ni yoowara awe, nave onnakeriha owaani.
IKWAHA sincipale Yehova onniiloca ntoko mulipa ookukhula. Mmasu awe, owo onnanilipiha ariki: “Miyano mukhatàka kinamukusa ni kinamukhapelelaka muhuwo aka.”—Ezekiyeli 34:11, 12; BNM.
“Nyuwano Muri Iputxeputxhe Saka”
Tiivi siri ipucepuche sa Yehova? Mookhweya, ipucepuche sa Yehova achu yaawo anamusivela ni omurumeela yoowo. Piipiliya onii: “Hankeni, nlape nurame; nikokhore va mithoni va Yehova, Yowo ánipachunshe: Ntakhara Yowo ti Muluku ahu, nave hiyo nátchu a va nikuwani vawe, ni ipucheputche sa mu ntatani mwawe.” (Salmo 95:6, 7) Ntoko ipucepuche, inamuchara mukukhula alapeli a Yehova annawerya omuchara mukukhula aya. Apwanne awo hanarimeela? Hooye. Ilukuluku ikina alapeli a Muluku, annakhala ntoko ‘ipuchepuche soomwalamwala,’ “ipuchepuche sorimela,” naari ntoko ‘ipuchepuche soohuwela.’ (Ezekiyeli 34:12 BNM; Mateyu 15:24; 1 Petro 2:25) Naamwi hiiha, Yehova hanamunyanyala muchu ohuwenle, ntoko muchu ohirino ewehereryo.
Munnoona wi nlelo Yehova mukukhula anyu? Yehova onooniherya hai wi owo mukukhula olelo? Muthokororye makhalelo mararu:
Onnanlyiha omunepani. Yehova onnaloca: “Kinamukeriha oriwo munyepu worèra . . . Weiwo enamwitxhùwawo veri va mapuro mancipale a mmiyakoni orimo munyepu worèra.” (Ezekiyeli 34:14, BNM) Yehova hanahiyererya onivaha yoolya yoomunepani mmukhalelo woohiyana hiyana nave mu elukuluku yoophwanelela. Apwanne munnuupuwela yoolaleeryiwa, mwaha, naari exilema yeeyo yaakhunle nivekelo nanyu? Eyo hiyoolekencheni wi Yehova onnoothokororyaani chiryene?
Onnanaakiha ni onikhapelela. Yehova onnalaiherya: “Kinamukòkiherya mmuhuwoni seihe ikele otxiwene, kinammaka makhwacha a seihe iphoren’ye, kinamulòla seihe sawitxeliwa.” (Ezekiyeli 34:16, BNM) Yehova onnaakhapelela yaale ooceecheya naari yaale anahooxeya ni soochunachuna. Owo onnamaka ipucepuche sawe siphoren’ye, eerihaka wi evole makhwaca aya—moorweela wa annihu a mu nroromelo. Nave tho, onnakookiha seihe irimenle ni seihe inahooxeya ni muupuwelo woonanara.
Owo onniisoona okhalano murici ntakhara hiyaano. Yehova onnaloca “Kinamuthukumanya iputxeputxhe saka kiruhaka mmapuroni samwalamwalenlayamo nihiku nle n’epiphi.” Owo tho onnaloca “kini kinamwasya iputxeputxhe soorimela.” (Ezekiyeli 34:12, 16, BNM) Wa Yehova, epucepuche erimenle tahi wi yooyeleeleya. Owo onnasuwela epucepuche yaarimeela ni waavya eyo, nave onnahakalala vaavaa onaphwanyeiye. (Mateyu 18:12-14) Opwaha soothene, Yehova onnaloca wa alapeli awe eeparipari ariki: “Nyuwano muri iputxeputxhe saka, mukhale atxhu kineraka kiwetxihekeni.” (Ezekiyeli 34:31, BNM) Nyuwaano mwa mmoha a ipucepuche seiho.
Wa Yehova, epucepuche erimenle tahi wi yooyeleeleya. Owo onnahakalala vaavaa onaphwanyeiye
“Mwere wi Nikhaleke Nivano Ntoko Khalai”
Ntakhara heeni Yehova onnawaavyaani ni woowopaani wi mmukookele? Ntakhara owo onachuna wi mukhale oohakalala. Owo onnaroromeliha wa alapeli awe ariki: ‘kinamwarèliha yawo kirupihaka epwila elukuluku yophwanelela.’ (Ezekiyeli 34:26, BNM) Ela tahi yoolaiherya yatheru. Nyuwaano moomala woona mareeliho yaawo woopaceryani.
Muupuwele ohakalala mwaaraanyuno vaavaa mwaapacenryaanyu omusuwela Yehova. Ntoko yoolikanyiha, monne hai vavaa mwaahusenryaanyu eparipari vooloca sa nsina na Muluku ni yoochuna awe ntakhara achu? Munnuupuwela ohakalala mwaaraanyuno okhala vamoha ni Akiristu awiiwanana va muthukumano wa ekulucu naari wa muceche? Elukuluku mwaaweryaanyu waaleela akina michaka yaphaama xaxaxa yaale yooniherya nchuno, hamunachuna okookela ohakalala ni murecele mwaaraanyuno woopaceryani?
Nyuwaano munanwerya okookela ohakalala yoowo. Alapeli a Yehova khalai yaavekela: “Mwere wi nokòkeleni, Pwiya [Yehova]. Mwere wi nikhaleke nivano ntoko khalai.” (Wikhupanyerya 5:21, BNM) Yehova aahaakhula mavekelo yaawo, nave achu awe yaakookela omurumeela yoowo moohakalala. (Nehemiya 8:17) Yehova onahaala weerano emohamoha ni nyuwaano.
Naamwi hiiha, okookela wa Yehova ti wookhweya oloca ohiya weerano. Haya nthokororye makacamiho anakhumelela mu omukookela Yehova ni mukhalelo wa ovootha.
