NIKUPA 4
Wiisoona okhalano nthowa—“Mukélihe Okivíherya’vo Yonanara Aka”
“Muteko aka muvyaani waanakikhaviherya ovakulela phaama emusi aka, nyenya tho waakivoliiherya mmiteko soonanara. Kaapacerya opaka ifesta, opaka makupa a elapo, ophiyerya tho ovolowa mukerexa. Kaaceecheya ntoko Namoona a Yehova mu iyaakha 40. Vaavaa yaaviraaya elukuluku yincipale kuupuwela wi nkirwa kikhurumuweliwa ni Yehova, ntakhara kaasuwela.”—Martha.
WIISOONA okhalano nthowa echu yawoopiha. Mwene Tavite aarepa “Ntakhara marapwáka apwaherya o muruni waka: Kokhulumuwano ntoko murichi wohokola.” (Salmo 38:4) Akiristu akina annahica vancipale, yuupuwelaka wi Yehova harwa aakhurumuwela. (2 Akorinto 2:7) Muupuwelo yoola ti waphaama? Naamwi nyuwaano mpanke soocheka itokotoko, apwanne eyo enataphulela wi Yehova harwa ookhurumuwelaani? Hooye, tahi yeeyo!
“Hankooni nimalihe mwaha yeehuyeehu”
Yehova hani aanyanyale alipa oocheka acharunwe. Mwawiihiiha, owo onnawaavya yaawo! Mu niphwanaphwaniho na mwaana oolosowa, Yesu aamulikanyiha Yehova ntoko tiithi oosivela orino mwaana yoowo aahin’ye emusi awe nave akuxa ekumi yoohiphwanelela. Voovira wa elukuluku mwaana ole aalakelela okookela owannyawe. “[Mwaana owo] ari nivano otxaiwene, atithinnya yàmona, ni emoriwa ikharari, yatxhimaka, emukhuparela, envahaka ebeijo.” (Luka 15:11-20, BNM) Nyuwaano munnachuna okhalano onthamwene ni Yehova nyenya muniisoona wi nivano muri “otxaiwene” ni yoowo? Ntoko tiithi va niphwanaphwaniho na Yesu, Yehova onnachuna wooniherya ikharari wa nyuwo. Owo onnachuna owaakhelani.
Vano hanka wakhala wi munoona wi soocheka sanyu itokotoko naari wi ti sincipale wi Yehova akhurumuwele? Thokororyani nwopelo wa Yehova onaphwanyeya mu Yesaya 1:18, Tradução do Novo Mundo: “Rwaani, hiihaano, nave hankooni nimalihe mwaha yeehuyeehu,” Yehova onnaloca. “Naamwi soocheka sanyu siri soophilivila ntoko mooro, kinamweeliha ntoko mucharapo.” Aai, naamwi soocheka ikhalaka ntoko etinta yoophilivila va ekuwo yaweela hamuri ocaiwene wa nikhurumuwelo na Yehova.
Yehova hanachuna wi nyuwaano mutitelele ohooxeya ni yawuupuxerya-ya-murima yoolimela. Vano munii muwerye hai opuha otaphuwa onarweela mu nikhurumuwelo na Muluku ni yawuupuxerya-ya-murima yaphaama? Thokororyani malakiheryo meeli Mwene Tavite aachanreiye. Yoopacerya, owo aaloca: “Káhemyererya yonanaráka wa Nyuwo [Yehova].” (Salmo 32:5) Muupuwele, Yehova oomala woowopaani wi mmwaacamele mu nivekelo ni ‘omaliha mwaha’ ni yoowo. Mweemererye nwopelo ola. Mulokohe soocheka sanyu wa Yehova, nave mmuleele moonelo anyu. Orweela wa yaweereya awe, Tavite aavekela: “Mukélihe okivíherya’vo yonanara aka. . . . Nyuwo Muluku, hamunyemula murima wophweya ni wotcharuwa.”—Salmo 51:2, 17.
Yanaawiili, Tavite aahaakhela nikhaviheryo orweela wa muchu aathanliwe ni Muluku, mulipa miririmu Natani. (2 Samuwele 12:13) Olelo, Yehova oovaha muloko, atokweene yaawo anavyakihiwa wi yaakhaviherye alipa oocheka oocharuwa ni okookela onthamwene aya ni Yehova. Mwawaacamela atokweene, awo anahaala opharihela Soorempwa ni ovaha mavekelo wi emaalihe murima anyu, openuxa naari oviihamo moonelo woonanara ni wookhaviheryaani openuwa omunepani.—Yakopo 5:14-16.
Yehova onachuna wi nyuwaano mpuhe otaphuwa wa okhalano yawuupuxerya-ya-murima yaphaama
“Óréla Mutchu Yowo Okhurumuweliwe Yotchekáwe”
Chiryene, munanwerya woona wi olokoha soocheka sanyu wa Yehova Muluku ni owaacamela atokweene enahaala okhala echu yoovila weera. Tavite aakhalano moonelo mmohamoha. Mu elukuluku vakhaani owo aakhala “chú” vooloca sa soocheka sawe. (Salmo 32:3) Voocharela, aahithamalela mphurelo wa olokoha soocheka sawe ni wookolola meecelo awe.
Mphurelo mutokweene wa Tavite waari okookela ohakalala wawe. Owo aarepa: “Óréla mutchu yowo okhurumuweliwe yotchekáwe; Ekhunéliwa yonanaráwe.” (Salmo 32:1) Owo tho aavekela: “Apwiya taphulani iyano saka Nave vawanoni vaka vaniriaya valaleyerye nchichimiho nanyu.” (Salmo 51:15) Oonaka okhala ootaphuwa mu soocheka sawe ni athamalelaka okhurumuwela wa Muluku, yaamweeriha Tavite waaleela akina vooloca sa Yehova.
Yehova onachuna wi nyuwaano mpuhe otaphuwa wa okhalano yawuupuxerya-ya-murima yaphaama. Nave onachuna tho wi mwaaleele akina vooloca sa yoowo ni yookhwela awe, ohiya ni muupuwelo woolimela, nyenya ni murecele ni ohakalala wa vathi va murima. (Salmo 65:1-4) Muupuwele nwopelo awe “ntakhara awe tcharuwani, nave kókelani wi sishipihiwe sotcheka sanyu, wawihiha wi erwe mahiku óhihimula órwela withoi ya Apwiya.”—Saweriwa Tarummwa 3:19.
Ti yeeyo yeeren’ye ni Marta. Owo onnaloca: “Mwanaka aatitelela okirumihela Mulipeleli ni Vinyani! Vakhaani vakhaani, kaapacerya omukookela Yehova. Echu yoovilaxa waari oveka nikhurumuwelo wa soocheka soothene kenraaka. Omakuchuwelo, kaamwaacamela Muluku mu nivekelo nave kaamveka wi akikhurumuwele. Waari woovila weemererya wi ivinre iyaakha 40 kanwerya omukookela Yehova. Yaweereya aka yawooniherya wi naamwi ivinre iyaakha sincipale, muchu onanwerya ovahiwa ekari ekina wi amurumeele Muluku ni okookela mu osivela wawe.”
