SOOCHUNACHUNA sinnamvolowela muchu ori oothene​—ophiyerya tho achu a Muluku. Namarepa a Salmo aaloca: “Sotxhuna saka sakhala sintxipale.” (Salmo 94:19, BNM) Yesu tho aaloca wi mmahiku ookhucula, “sothokororya sa okumi” saahaala waakacamihaka arummwa a Yehova. (Luka 21:34) Hanka nyuwaano? Munnahoolela makacamiho a ophwanya ikhorowa, makachamiho a veemusi, naari wuukhuwa wa okumi? Yehova onii ookhaviheryeeni hai ovootha?

Haniwerya ovootha soochunachuna mukhatiihu. Murummwa Paulo aarepa “Ninnakatxamihiwa mwa sothene,” nave ahaaceererya: “Ninnavelavelihiwa . . . nri awuwihiwa.” Nave tho aloca wi hiyaano “hinanyikaleliwa” “nto hananimalela nroromelo,” naari ‘hannarimela.’ Tiheeni enanikhaviherya otitelela? “Owerya wu otokotoko onarwa wa Muluku”—ikuru inarweela wa Muluku ahu awirimurimu, Yehova.​—2 Korinto 4:7-9, BNM.

Muupuwele ti mwawiihai mwaakhenlaanyu “owerya wu otokotoko onarwa wa Muluku.” Munnuupuwela mwaha yoowo waaceerenrye othamalela wanyu osivela wa Yehova? Apwanne nroromelo nanyu wa soolaiherya sa Yehova hinaaya vahoolo vaavaa mwaahusihaanyu akina vooloca sa ewehereryo ya Parataiso? Vaavaa nnaphiyaahu mmithukumano Seekiristu ni wuuka nroromelo nahu ni akina, ninnalipihiwa ohikhala othokorororya soochuna sa okumi ni okhalano murecele mmuupuweloni wi nimurumeele Yehova moohakalala.

Chiryene, munanwerya wiisoona okhala oopuruleliwa mmakupa mancipale mu elukuluku emoha yeeyo. Ntoko yootakiherya, Yehova onnaniveka waavya voopacerya Omwene awe ni wuumelela muteko woomunepani. (Mateyu 6:33; Luka 13:24) Apwanne, wiikariwa, wiiceliwa, naari makacamiho a veemusini annakukuca yeeyo munaweryaanyu weera? Hanka wakhala wi muteko anyu wa mulaponi onnakukuca elukuluku ni ikuru sanyu mwaahaalaanyu opharihela mmulokoni? Munnakumanano ni soochuna sincipale​—nave munakhalano elukuluku ni ikuru savakhaani wi mwaakhwaniherye​—muniiha muri oovelavela. Akhweya munanwerya wuupuwela wi Yehova onnaveka ichu sincipale.

Yehova toophimelela. Owo hananiveka ichu sincipale nihinaweryaahu weera. Nave onnasuwela wi enahaala oviravo elukuluku wi nookolole moonelo ni sawuukhula soomwiilini.​—Salmo 103:13, 14.

Ntoko yootakiherya, muthokororye ti mwawiihai Yehova aamukhapelenleiye mulipa a miririmu Eliya. Vaavaa Eliya aariye awoova ni ooceecheya aachawela mutakhwani, apwanne Yehova aamusamela mulipa miririmu ni omukhinyererya okookela muteko aamurummeiye? Hooye. Mu ikwaha piili, Yehova aamurumiha munkeelo wi amviihe Eliya ni omvaha yoolya. Naamwi hiiha, evinre mahiku 40, nlelo Eliya  aari oothanana ni awoova. Echu taani ekina Yehova eenreiye wi amukhaviherye? Yoopacerya, Yehova aahooniherya wi ahaala omukhapelela. Yanaawiili, Yehova aamuhakararya Eliya ni “nsu” noomaaleleya. Wookuchulani, Yehova aamuleela wi aakhalavo masana masaneene aachu yaawo yaari oororomeleya mmalapelo a Muluku. Mwawaakuveya, Eliya aahikookela muteko awe ntoko mulipa a miririmu a mvai. (1 Mamwene 19:1-19) Tiheeni nnahuseryaahu? Vaavaa Eliya aareiye oothanana, Yehova aamukhaliha moopixa murima ni ikharari. Yehova hatoroken’ye. Owo onnanikhapelela vancipale mmukhalelo mmohamoha.

Vaavaa munuupuwelaanyu yeeyo munaweryaanyu omvaha Yehova, musuwele ohiyaniha. Muhilikanyihe yeeyo munaweryaanyu weera olelo ni yeeyo mweeraanyu khalai. Ntoko yootakiherya: Mulipa oochimaka onahiya wiivyakiha mu miyeeri naari iyaakha sincipale owo hanawerya weera mwaphaama ntoko woopaceryani. Ohiya yeeyo, owo onapacerya otikitherya soolakelela ikhaani sinahaala omuruuhela ikuru ni otitelela. Akiristu ari ntoko alipa oochimaka. Awo anniivyakiha ni soolakelela saphaama mmuupuweloni. (1 Akorinto 9:24-27) Ntakhara heeni muhinatikitheryaanyu yoolakelela yoomunepani eri yookhweya ophwanya hiihaano? Ntoko yootakiherya, nyuwaano mwanwerya otikitherya yoolakelela ya ophiya mmithukumano sa muloko. Mumveke Yehova wi ookhaviheryeeni ophwanya yoolakelela anyu. Vaavaa munakookelaanyu olipiha makupa anyu oomunepani, munahaala ‘olawiha, nave mmoone wi Yehova taphama.’ (Salmo 34:8) Muupuwele wi echu yoothene muneeraanyu wi mooniherye osivela wanyu wa Yehova​—tahi mwaha mukhaani​—ti wa esisapo wa Yehova.​—Luka 21:1-4.

Yehova aamukhavihenrye hai June okookela wa yoowo? Owo onnanleela: “Kaatitelela ovekela wa Yehova, kimvekaka wi akikhaviherye. Voocharela pwiyamwana aka aakiwopa oya o muthukumano wa ekulucu mu epooma kaakhalaakawo. Kaalakelela oyawo nihiku nimoha. Kaahakalala vancipale okookela okhala ni achu a Yehova! Muthukumano wa ekulucu waakilipiha nave ti yeeyo kaaweheryaaka. Vano kinnahakalala omulapela Yehova wanaawiili. Vano ekumi aka yookhalano yootaphulela. Opwaha soothene, koosuwela wi nkinaphwanela wiivalaanya naari weeca mukhataaka. Miyaano kinnathamalela wi nlelo yaakhalavo elukuluku wi kikooke.”