Waanyiherye yaweereya ela: Kareni onamphiyaru va efesta. Ahilekenle onniwa nsu na muchu oosuwanyeya iichanaka.

Vaavaa Kareni onarukunuweiye, onamoona ari nammaawe Xesika ni mapotoro meeli a soowurya. Xesika onnamvaha Kareni ariki: “Okuxe, weyaano tahi wa mwaana, wohinnuwa wi ochekuleke ni ichu seiya.”

Kareni onnuupuwela okhooca, nyenya Xesika nthamwene awe, nave Kareni onnoova wuuliheya muru. Woona wi Xesika onnawurya enakhala ntoko hiyaano yoonanara. Mwawiihiiha Kareni onuupuwela: ‘Kini kiwurye nipotoro nimoha pahi, nkihapaliwa.’

Waakhanle wi weyaano wa Kareni, tiheeni waaphwanelaawe weera?

Wi opake soolakelela saphaama, onachuneya osuwela soororomela saa. Osuwela soororomela onataphulela osuwela echu eri mpuwa ni yeeyo onacicimihaawe. Okhalano soororomela enahaala wookhaviherya wiisaakiha ohiya wi muchu mukina oovareryeleke.—1 Korinto 9:26, 27.

Vano oni owerye hai okhalano ikuru seiyo? Maakhulo a makoho anacharela anahaala wookhaviherya.

Wasuwela mikhalelo saa saphaama, nroromelo naa nnahaala waaceereryeya.

YOOTAKIHERYA YA MPIIPILIYA: Murummwa Paulo oorepa: “Wakhweya miyo nkiloca phama, nto kòkhalano miruku.” (2 Korinto 11:6) Paulo heemererya wi sooloca sa akina sicikinye nroromelo nawe. Woona wi aakhalano masuwelelo a Piipiliya yamukhaviherya okhala oolipa naamwi akina yaanamuloca moonanara.—2 Korinto 10:10; 11:5.

WIISAALIKHELE: Orepele vathi mavyakelo ni masuwelelo oryaaweno.

Tisivi iri mikhalelo saa. (Ntoko yootakiherya, onnacicimiha? Onnavaha? Onnaroromeleya? Onnakhwaniherya mirici saa?)

Soocecheya inanwerya olikanyihiwa ni murawa, yoowo onawerya onanarariha muthipo. Yakhala wi onneemererya wi soocecheya ivareryeke mwiili aa inahaala onanariha soororomela saa.

YOOTAKIHERYA YA MPIIPILIYA: Paulo aakhalano soocecheya. Owo oorepa: “Nto kinnona mwa sa mmwilini saka nòkhalamo nlamulo nikina nnawana ni miruku saka. Ti yeyo enakikhaliha kapuro a nlamulo na yotxheka nri mwa sa mmwilini mwaka.”—Aroma 7:22, 23.

WIISAALIKHELE: Soocecheiha taani onaphwanelaawe ovootha?

Apwanne wanwela ekaaro nave omveka mulipa a weeciha wi oorukureriheke mpuro mmoharu ophiyerya omalamo kasolina? Hiyi ekhale ya mphurelo, nave waahaala oliva ikhorowa sincipale!

Nnahuseryavo eheeni? Muchu orino soolakelela haniirukurerya mpuro mmoharu ahisuwelaka weiwo onayeiyewo. Soolakelela sinnookhaviherya osuwela onayaawewo.

YOOTAKIHERYA YA MPIIPILIYA: Paulo oorepa: “Kòsuwela kinatxhimakelakawo.” (1 Korinto 9:26) Paulo haarimoona omaala anoona ichu irikimoona weereya mu okumi awe. Owo aakhalano soolakelela sawe nave aanawetha wi aakhwanihe.—Filipi 3:12-14.

WIISALIKHELE: Orepele vathi soolakelela saa raru onachunaawe waakhwaniha mu eyaakha emoha.

Muchu ohirino soororomela hanapaka soolakelela. Ntoko namanriya, muchu onahaala “otorokeya” wi alikaneke ni asinthamwene awe. Yoowo oneerano yeeyo haano soororomela sawe.

Okhala oororomeleya enammukhaviherya muchu okhala awiithipela moohipwacha ichu ineeriwa ni achu akina.

YOOTAKIHERYA YA MPIIPILIYA: Vaavaa Taniyeli aareiye mmiravo, “hatxhunne orava mwiikho” nyenya aalakelela wiiwelela malamulo a Muluku naamwi aari ocai ni amusi awe a nroromelo. (Daniyeli 1:8) Nthowa na weerano yeeyo, aakhapelela ororomeleya wawe. Nave owo aakhala mwawiiwanana ni soororomela sawe.

WIISALIKHELE: Tisivi siri soolakelela saka? Ntoko yootakiherya: Onnaroromela wi Muluku ookhala? Wakhala wi ti hiiha, ntakhara heeni? Tiheeni enoolekecha wi owo ookhala?

Onneemererya wi malakiheryo a Muluku apakiwe wi okhale phaama? Wakhala wi ti hiiha, ntakhara heeni?

Opwaha soothene, weyaano onachuna okhala ntoko eheeni—nnaxi nenlo nnamoona okuxiwa ni echeku naari ntoko mwiri yoowo oniikhalelaru mu echeku etokotoko? Olipihe omuchu aa, nave onahaala okhala oolikana ni mwiri yoowo. Eyo enamookhaviherya waakhula nikoho nla: Ka Muchu a Mukhalelo Taani?