Moohikhwa minikwa, mahusiheryo a Piipiliya yaala monnaanyu aalipiha omusivela wanyu Yehova. Osivela owo onaphwanela okhapeleliwa. (1 Petro 2:2) Ewehereryo anyu ya okumi woohimala enarweela mu otitelela wanyu omwaacamela Muluku moorweela wa omuhuserya Piipiliya.​—Mwaalakhanye Yohane 17:3; Yuda 21.

Vaava munaaceereryaanyu omusuwela wanyu Muluku, nroromelo nanyu nnahaala okhala noolipa. Nroromelo nlo nnahaala wookhaviheryaani omuhakalaliha Muluku. (aHebri 11:1, 6) Nlo nnanweerihaani ocharuwa ni orukunuxa makhalelo a okumi anyu wi mukhale phaama.​—Mwaalakhanye Saweriwa Tarummwa 3:19.

Mwawooneya, nyuwano munahaala ochuna waaleela akina ichu seiyo muhusenryaanyu—oothene hiyo ninnasiveliwa waaleela akina michaka yaphaama. Mwatitelela omuhuserya Piipiliya, nyuwano munahaala ohuserya moota wa ompharihela muteko Piipiliya wi muloce sa nroromelo nanyu mwa Yehova ni michaka yaphaama.​—Mwaalakhanye aRoma 10:13-15.

Achu ancipale anapacerya olaleerya michaka yaphaama ni asinthamwene nari amusi aya. Muloce mweephoole. Ohiya waaleela wi ikerexa saya ti soowoka, locani sa soolaiherya sa Muluku. Muupuwele tho wi wiiliwiili achu anakuxeya murima ni makhalelo anyu aphaama ohiya yeeyo munalocaanyu.​—Mwaalakhanye 2 Timoteo 2:24, 25.

Ohuserya Masu a Muluku onahaala wookhaviheryaani wunnuwa mmunepani. Moovira wa elukuluku, nyuwano munahaala okhalano  onthamwene wa vameekhaaya ni Yehova. Chiryene nyuwano munahaala okhala awawe sintoko mmoha a emusi awe.​—Mwaalakhanye 2 aKorinto 6:18.

Nyuwo munanwerya oya vahoolo moorweela wa otitelela ohuserya Masu a Muluku. (aHebri 5:13, 14) Muloce ni mmoha a Anamoona a Yehova wi oohusiheni Piipiliya ampharihelaka muteko liivuru Piipiliya Onahusiha Eheeni Chiryene? Mwapwahiherya ohuserya Masu a Muluku, okumi anyu onahaala okhala woohakalaliha.​—Mwaalakhanye Salmo 1:1-3; 73:27, 28.

Michaka yaphaama sinarweela wa Yehova, Muluku oohakalala. Nyuwo munanwerya omwaacamela yoowo moorweela wa owaacamela achu awe. (aHebri 10:24, 25) Moorweela wa wiilipixerya omuhakalaliha Yehova, nyuwano munahaala ophwanya okumi weeparipari​—okumi woohimala. Omwaacamela Muluku chiryene ti echu yaphaamaxa yeeyo munaphwanelaanyu weera.​—Mwaalakhanye 1 Timoteo 1:11; 6:19.