Sootakiherya sookhweleya sa Mpiipiliyani:

• Ruti 1:11-13, 20​—Amanle waayeleela aiyawe ni anaawe eeli, Nowemi uupuwela wi Yehova oomunyanyala

• Yupu 3:1, 11, 25, 26; 10:1​—Yupu aasoosiwa murima amanle ooyeleela muhakhu awe, anamwane awe khumi ni ohooxeya wa okumi awe

Soorepa inahakararya:

• Aro 12:19; Tiy 1:13

Saweereya sa Mpiipiliyani inahakararya:

• Ruti 1:6, 7, 16-18; 2:2, 19, 20; 3:1; 4:14-16​—Nowemi aahikookela ohakalala wawe amanle ochikela wa achu a Muluku, aakhenle nikhaviheryo ni waakhaviherya akina

• Yupu 42:7-16; Tiy 5:11—Yupu aahivilela moororomeleya, nave Yehova aahimureeliha vancipale

Sootakiherya sookhweleya sa Mpiipiliyani:

• 1Sam 1:6, 7, 10, 13-16—Ana aahisoosiwa murima vancipale moorweela wa okhalihiwa moonanara ni Penina ni ohiiwexexiwa phaama ni Mulipa a Mukucho Eli

• Yupu 8:3-6; 16:1-5; 19:2, 3—Asinthamwe araru a Yupu yaahimuthoriha moohookololowa, emwaacereryaka Yupu osooseya wawe

Soorepa inahakararya:

• Sal 37:8, 9; Aef 4:26

Saweereya sa Mpiipiliyani inahakararya:

• 1Sam 1:9-11, 18—Amanle ohula murima awe wa Yehova, Ana aakhala oohakalala

• Yupu 42:7, 8, 10, 17—Yupu amanle wakhurumuwela asinthamwene awe araru, Yehova aahimureeliha ni muhakhu ni ohakalala

Sootakiherya sookhweleya sa Mpiipiliyani:

• 2Mam 22:8-13; 23:1-3—Vaavaa Mwene Yosiya ni achu yiiwalaaya Nlamulo na Mose, awo yaahiisoona okhalano nthowa

• Estr 9:10-15; 10:1-4—Mulipa a mukucho Estra ni achu yaahiiphwanyerya mathowa woona wi achu akina hiyaamwiiwelenle Yehova nave yaahaathela athiyana a ilapo ikina

• Luka 22:54-62—Murummwa Petru aahiiphwanyerya mathowa amanle omukhooca Yesu ikwaha raru

Soorepa inahakararya:

• Sal 32:5; 103:9-14; Yes 1:18; Saw 3:19

• Moone tho Yes 38:17; Mik 7:18, 19

Saweereya sa Mpiipiliyani inahakararya:

• 2Math 33:9-13, 15, 16—Manase aari mmoha a Mamwene o Yuta aatempe  opaka ichu soonanara, nyenya aacharuwa nave akhurumuweliwa ni Yehova

• Luka 15:11-32—Yesu aathariha niphwanaphwaniho na mwaana oorimeela wi ooniherye wi Yehova ori ooreheryeya onikhurumuwela moomalela

Sootakiherya sookhweleya sa Mpiipiliyani:

• 2Mam 20:1-3—Mwene Esekiya aahinla vancipale vaavaa iiceliweiye nave aahanle vakhaani okhwa

• Afi 2:25-30—Epafrotitu aahithanana woona wi muloko waahisuwela wi owo aamwiiceliwa, owo haachuna wi anna yuupuweleke wi ohooceela waakhwaniherya murici awe

Soorepa inahakararya:

• Sal 92:12-14; Yes 40:29-31; 46:4; 2Ako 8:12

 Saweereya sa Mpiipiliyani inahakararya:

• 2Sam 17:27-29; 19:31-38—Parsilayi aari awuuluvala nave tho aari mulapeli oororomeleya oochuneyaxa, nyenya aahooniherya wiiyeviha vaavaa aakhoonceiye waakhela murici, woona wi aahisuwela wi haahaala owerya waakhwaniherya

• Sal 41:1-3, 12—Vaavaa Mwene Tavite aatempeiye wiiceliwa, owo aanasuwela wi aaphwanela ororomela ikuru sa Muluku

• Mar 12:41-44—Yesu aahithamalela yoovaha ya naamukhweli oohaawa woona wi owo aavanhe soothene aareiyeno