MWAHA 22
Muni Nwerye Hai Olaleerya Michaka Saphaama?
Vaavaa munahuseryaanyu iparipari sa Mpiipiliyani, akhweya munamuupuwela: ‘Muchu ori oothene onaphwanela osuwela yeela!’ Eparipari wi, muchu ori oothene onnaphwanela osuwela yeela! Mwawiihiiha, akhweya munamukhala awuukhuwa waaleela akina vooloca sa yeeyo muhusenryaanyu. Hankooni nthokororye mukhalelo muneeraanyu mvoothe wuukhuwa yoowo ni opacerya olaleerya michaka saphaama moohakalala.
1. Muni nwerye hai waaleela achu yaawo mwaasuwenlaanyu yeeyo muhusenryaanyu?
Oohuserya a Yesu yaahiloca: “Hannawerya ohiya oloca yeeyo niiwalaahu ni noonnaahu.” (Saweriwa T’arummwa 4:20) Awo yaanasivela vancipale yeeyo yaahusenryaaya ni Yesu ophiyerya wi yaanachuna omulela muchu ori oothene vooloca sa yeeyo. Apwanne nyuwaano munoona mmukhalelo mmohamoha? Yaari hiihaa, mwaavye ekari eri yoothene wi nwerye waaleela amusi ni asinthamwene anyu mwa ncicimiho vooloca sa yeeyo muhusenryaanyu.—Mwaalakhanye Kolosi 4:6.
Meerelo makina a opaceryiha olaleerya
-
Vaavaa munalocaanyu ni amusi, mpaceryihe mwaha wa Mpiipiliyani moorweela wa oloca: “Esumana yeela koohuserya echu yookhweleya.”
-
Muloce yoorepa yoolipiha wa nthamwene anyu yoowo oniiceliwa naari ori awuukhuwa.
-
Mmuleele nthamwene anyu oomutekoni yoowo onookohani mukhalelo mvirinhaanyu esumana vooloca sa yeeyo muhusenryaanyu va yoohuserya anyu ya Piipiliya naari mmithukumano sa muloko.
-
Mmoonihe nthamwene anyu esaiti jw.org.
-
Mwaawope akina okhala va yoohuserya anyu ya Piipiliya naari nwoonihe mukhalelo wa oveka yoohuserya ya Piipiliya mu jw.org.
2. Ntakhara heeni oryaaya wamphurelo olaleerya ni muloko?
Oohuserya a Yesu yaaheera sincipale wi elaleerye michaka saphaama wa achu yahaasuwenlaaya. Yesu ‘aahaaruma eli-eli wi evolowe mu ipooma soothene’ wi elaleerye. (Luka 10:1) Muteko yoola wooreheryiwa onnaavaha achu ancipale ekari wi ewiriyane michaka saphaama. Olaleerya tho vamoha, waahaaruhela oohuserya ohakalala wawaaca. (Luka 10:17) Apwanne eyo yaahaala okhala yoolakelela anyu wi mulaleerye vamoha ni muloko?
OHUSERYA MWAWIISEELA
Muthokororye mukhalelo muneeraanyu mvoothe wuukhuwa ni opuha ohakalala onarweela mu olaleerya michaka saphaama.
3. Yehova onamukhala ni nyuwo
Akina annachuna olaleerya nave annuukhuwa ni mukhalelo anaakhuliwaaya naari mukhalelo anahaalaaya waakheliwa.
-
Apwanne munnakhala awuukhuwa vaavaa munalocaanyu yeeyo muhusenryaanyu? Waakhanle wi aa, ntakhara heeni, naari waakhanle wi hooye ntakhara heeni?
Moone EXILEMA, nave muthokororye nikoho nnacharela.
-
Ti mwawiihai mwali yoola ori Namoona ovoontheiye woova?
Mwaalakhanye Isaiya 41:10, nave muthokororye nikoho nla:
-
Ti mwawiihai nivekelo nnahaalaaya wookhaviheryaani waakhala wi munnoovelela olaleerya?
Nyuwaano mwaanasuwela?
Anamoona a Yehova ancipale hiyantonko wuupuwela wi yaahaala olaleerya michaka saphaama wa akina. Ntoko yootakiherya, Sergio aanoona okhala woovila olaleerya wa achu akina nyenya voocharela aapacerya omuhuserya Piipiliya. Owo ooloca: “Naamwi kaari awoova kaapacerya oloca ni akina vooloca sa yeeyo kaahuseryaaka. Naamwi kaari awuukhuwa, kaapacerya waaleela akina vooloca sa yeeyo kaahuseryaaka. Waaleela akina vooloca sa Piipiliya waakeeriha okhala oolipa. Nave oloca ni akina sa yeeyo kaaroromelaaka yaalipiha nroromelo naka.”
4. Mooniherye ncicimiho
Vaavaa munalaleeryaanyu michaka saphaama, muhithokororye pahiru yeeyo munayaanyu oloca nyenya tho mukhalelo munahaalaanyu oloca. Mwaalakhanye 2 Timóteo 2:24 ni 1 Pedro 3:15, nave muthokororye makoho anacharela:
-
Mwaahaala othokororya hai iversikulu seiya vaavaa munalocaanyu ni muchu vooloca sa Piipiliya?
-
Achu akina a emusi anyu ni asinthamwene anyu hanahaala weemererya yeeyo munalocaanyu. Tiheeni munahaalaanyu weera? Tiheeni muhinahalaanyu weera?
-
Ohiya wi mumpakele makoho oovila mmukohe yeeyo owo oneemereryeiye.
5. Olaleerya michaka sa Omwene onnaruuha ohakalala
Yehova aamvahererya Yesu muteko wa olaleerya michaka saphaama. Yesu onne hai muteko yoowo? Mwaalakhanye Yohani 4:34, nave muthokororye makoho anacharela:
-
Olya yoolya yaphaama ennakhaviherya okumi ahu nave ennanihakalaliha. Ntakhara heeni Yesu olikanyinheiye yookhwela ya Muluku—yeeyo ori olaleerya michaka saphaama—ni yoolya?
-
Ohakalala taani munahaalaanyu okhalano vaavaa munalaleeryaanyu michaka saphaama?
Miruku mikina
-
Variyari va mithukumano sa veeri va esumana, moone meerelo anahaala wookhaviheryaani opaceryiha ochekula.
-
Mwiisoone muri ntoko oohuserya iivolihenrye mu exikola ya mithukumano ya veeri va esumana. Exikola ya mithukumano sa veeri va esumana enamookhaviheryaani oloca ni waaleela akina yeeyo muhusenryaanyu.
-
Mpharihele makupa ani “Achu Akina Ani” naari “Achu Akina Ananwerya Okoha” wi nwerye waakhula makoho awunlaana ni waakaaha.
ACHU AKINA ANANWERYA OKOHA: “Tiheeni munahaalaanyu okileela olelo?”
-
Ti mwawiihai nyuwaano mwaahaalaanyu opharihela ekari yeela wi mmuleele muchu mukina vooloca sa yeeyo muhusenryaanyu mu yoohuserya anyu ya Piipiliya?
MUKWASU
Olaleerya michaka saphaama ni akina onnaruuhela ohakalala, nave opaceryiha onanwerya okhala wookhweya ntoko muhinaanyiheryaanyu.
Makoho awuuluulela
-
Ntakhara heeni nnalaleeryaahu michaka saphaama wa akina?
-
Muni nwerye hai weerano yeeyo mmukhalelo waphaama?
-
Muni nwerye hai omaliha wuukhuwa yoowo munahaalaanyu ohoolela mmuteko woolaleerya?
OTHOLATHOLA
Muupuwele mikhalelo mixexe mwaahaalaanyu opharihela vaavaa nyuwaano mwaahaalaanyu olaleerya michaka yaphaama mumpharihelaka kartawu jw.org.
Ideias para apresentações: Cartão de visita do jw.org (1:43)
Muhuserye mikhalelo mixexe sinahaala wookhaviheryaani olaleerya michaka yaphaama.
“Apwanne Mooreheryeya Okhala Mulipa Awaatotha Achu?” (Mulipeleli a Setempuru a 2020)
Moone yootakiherya ya Mpiipiliyani eneeraaya enivahe olipa murima olaleerya michaka yaphaama, naamwi nri amiravo.
Mwaavye mukhalelo wa oloca sa Piipiliya wa amusi anyu yaawo ahitonkoru ohuserya vooloca sa Yehova.
“Como tocar o coração de parentes descrentes” (A Sentinela, 15 de março de 2014)
