Apwanne moomuyeleela oosiveliwa anyu mookhwani? Mmukhalelo woovila si yoola, akhweya munniikoha: ‘Tiheeni eneereya vaavaa muchu onakhweiye? Apwanne nnarwa niwoona wanaawiili yaale akhwile?’ Mmwaha yoola ni onacharela, nnahaala woona maakhulo oohakararya a Mpiipiliyani.

1. Tiheeni eneereya vaavaa muchu onakhweiye?

Yesu oolikanyiha okhwa ni ikhove sawiiseela. Muchu oweryiwe ni ikhove sawiiseela hanasuwela yeeyo eneereya moorukurerya. Ti mwawiihai okhwa onalikanaaya ni ikhove? Amanle muchu okhwa, owo hanoona echu. Owo hanoona wiicela naari ohooxeya. Piipiliya onaloca wi: “Akhwile hanasuwelaru,” echu.—Mwaalakhanye Eklesiyaste 9:5.

2. Osuwela eparipari vooloca sa okhwa onanikhaviherya hai?

Achu ancipale annoova okhwa—ophiyerya tho wi annawoova alipa ookhwa! Nyenya munanwerya olipiheya ni yeeyo Piipiliya onaloceiye vooloca sa okhwa. Yesu aaloca: “Eparipari eyo enamootaphulaani.” (Yohani 8:32) Ikerexa ikina sinahusiha wi yookhala echu enatitelela okhala muchu amanle okhwa, nyenya tahi yeeyo Piipiliya onahusiheiye. Mwawiihiiha, haavo muchu onahooxeya amanle okhwa. Nave tho, woona wi alipa ookhwa hanasuwelaru echu, awo hanawerya onihooxa. Mwawiihiiha, tahi woochuneya opaka echu wi naahakalalihe naari waalapela yaawo, nave tahi woochuneya ovekela ntakhara yaawo.

Achu akina analoca wi ananwerya oloca ni alipa ookhwa. Nyenya eyo henaweryeya. Ntoko nihusenryaahu, achu ookhwa “hanasuwelaru” echu. Yaawo anuupuwela wi annawerya oloca ni oosiveliwa aya akhwile, mweeparipari awo analoca ni masololo yaawo aniipaka okhala ntoko achu yaawo akhwile. Mwawiihiiha, osuwela eparipari vooloca sa okhwa, onnanikhapelela wa nthowa na ovolowela wa masololo. Yehova onnanilopola wi hannaphwanela weererya olocaka ni alipa ookhwa, woona wi owo oosuwela wi masololo tawoopiha.—Mwaalakhanye Malamulo 18:10-12.

3. Muhuserye eparipari vooloca sa okhwa

Orukurerya elapo, achu aakhalano soororomela soohiyanahiyana vooloca sa yeeyo eneereya muchu amanle okhwa. Soororomela soothene seiya inanwerya ohikhala seeparipari.

• Mmukuma munakhalaanyuwo, tiheeni achu anaroromelaaya vooloca sa yeeyo eneereya muchu akhwa?

 4. Osuwela eparipari vooloca sa okhwa onnanikhaviherya vancipale

Osuwela eparipari vooloca sa okhwa onnanikhaviherya wi nihiwooveke achu ookhwa. Mwaalakhanye Eklesiyaste 9:10, nave voocharela muthokororye nikoho nla:

• Apwanne alipa ookhwa annawerya onihooxa?

Eparipari ya Mpiipiliyani enanwerya onikhapelela va yawootha ya wi alipa ookhwa ananwerya onikhapelela naari olapeliwa. Mwaalakhanye Isaiya 8:19 ni Wupulula 4:11, nave voocharela muthokororye nikoho nla:

• Munuupuwela wi Yehova onamoona hayi muchu yoowo onaavya nikhaviheryo naari omulapela muchu okhwile?

5. Osuwela eparipari vooloca sa okhwa ennanilipiha

Achu akina ahusihiwe wi vaavaa muchu onakhweiye, owo onnahooxeya wa nthowa na ichu seiho opankeiye khalai. Nto osuwela eparipari ennanitaphula osuwela wi muchu akhwa hanahooxeya amanle okhwa—ophiyerya wi muchu opanke ichu sincipale sootakhala hanahooxeya. Mwaalakhanye Aroma 6:7, voocharela muthokororye nikoho nla:

• Piipiliya oni, vaavaa muchu onakhweiye soocheka sawe sooxipihiwa, eyo tiwi, wa Muluku soocheka sawe soolimvwa, vano munoona wi muchu amanle okhwa nlelo onnahooxeya ni soocheka aapankeiye?

Mwawiihiiha vaavaa nnahuseryaahu vooloca sa Yehova, ninniiwexexa wi owo harwa aahooxa achu mookhwani. Mwaalakhanye Malamulo 32:4 ni 1 Yohani 4:8, nave voocharela muthokororye makoho ala:

• Mwawiiwanana ni mikhalelo saphaama sa Muluku noonnaahu mu iversikulu seiya nimanlaahu waalakhanya, apwanne owo onnaahooxa achu akhwile?

• Apwanne muri ootaphuwa osuwela eparipari wa yeeyo eneereya mookhwani? Ntakhara heeni?

 MUKWASU

Vaavaa muchu onakhweiye, hanasuwelaru echu eri yoothene. Achu ookhwa hanahooxeya, naari hanawerya waahooxa achu akumi.

Makoho awuuluulela

• Tiheeni eneereya vaava muchu onakhweiye?

• Eparipari vooloca sa okhwa enanikhaviherya hai?

• Ntakhara heeni osuwela eparipari vooloca sa okhwa onnanilipiha?