MWAHA 34

Nnahaala Wooniherya Hai Omusivela wahu Yehova?

ORUMIHA

Apwanne munniisoona okhala awaacameleya wa Muluku ovinyerya vaavale mpacenryaanyu omuhuserya Piipiliya? Apwanne mwaamusiveliwa otitelela olipiha onthamwene anyu ni yoowo? Yaari hiiha, muupuwele wi vaavaa Yehova onooneiye osivela wanyu ni yoowo waaceereryeyaka, owo onamoosivelaani vancipale ni woothokororyaani. Nyenya muni mooniherye hai wi munnamusivela yoowo?

1. Nnooniherya hai wi ninnamusivela Yehova?

Ninnooniherya omusivela wahu ntakhara Yehova moorweela wa omwiiwelela. (Mwaalakhanye 1 Yohani 5:3.) Owo hanamukhinyererya muchu weerano yeeyo. Moohiyana, owo onnamvaha mmoha ti mmoha a hiyo ekari ya othanla waakhanle wi onammwiiwelela naari hooye. Ntakhara heeni? Nthowa nawi Yehova onachuna wi ‘nimwiiweleleke ni murima ahu woothene.’ (Aroma 6:17) Mmasu makina, owo onachuna wi nyuwaano mmwiiweleleke ni murima woothene, ohiya mookhinyereryiwa. Makupa 3 ni 4 a liivuru yoola, anamookhaviheryaani wooniherya osivela wanyu wa Yehova moorweela mwa weera ichu seiyo inamuhakalaliha ohiya seiyo oniiceiye.

2. Ntakhara heeni enanwerya okhala yoovila wooniherya omusivela wahu Yehova?

“Masooso a awookololowa murima annaaca.” (Salumu 34:19) Oothene ninnawaniha ni ohiphaameya wahu. Hiyaano akhweya nnanwerya ohoolela makacamiho a ophwanya ikhorowa, ohookololowa, ni makacamiho makina. Vaavaa nnahoolelaahu makacamiho, onamukhala woovila weera yeeyo Yehova onanivekeiye. Eyo eneereya nthowa nawi weera yeeyo eri yoonanara onanwerya okhala wookhweyaxa. Nyenya, vaavaa munamuroromelaanyu ni omwiiwelela Yehova, munnooniherya wi munnamusivela yoowo opwaha echu vyakala. Nave nyuwaano munnooniherya wi mwa muchu oororomeleya. Owo harwa oonyanyalaani.—Mwaalakhanye Salumu 4:3.

OHUSERYA MWAWIISEELA

Moone ntakhara heeni Yehova onnavaha esisapo wiiwelela wanyu ni yeeyo enahala wookhaviheryaani okhala oororomeleya.

3. Mwaha yoowo onoovolowelaani

Mpiipiliyani, mu liivuru a Yobi, ninnaalakhanya wi Satana aahimwaakaaha Yobi vamoha ni achu oothene yaawo anachuna omurumeela Yehova. Mwaalakhanye Yobi 1:1, 6–2:10, nave voocharela muthokororye makoho ala:

Mwawiiwanana ni Satana, ntakhara heeni Yobi aanamwiiwelela Yehova?—Moone Yobi 1:9-11.
Tiheeni Satana olonceiye ntakhara achu oothene, ophitaanyerya nyuwaano?—Moone Yobi 2:4.

Mwaalakhanye Yobi 27:5, makupa ookuchula, nave voocharela muthokororye nikoho nnacharela:

Yobi oonihenrye hai wi aanamusivela Yehova?

Yobi aahooniherya wi aanamusivela Yehova moorweela wa okhala oororomeleya wa yene

Hiyaano ninnooniherya wi ninnamusivela Yehova moorweela wa okhala oororomeleya wa yene

4. Muhakalalihe murima wa Yehova

Mwaalakhanye Masiposipo 27:11, nave voocharela muthokororye makoho ala:

Yehova onoona hai vaavaa munakhalaanyu a miruku ni omwiiwelela yoowo? Ntakhara heeni?

5. Munanwerya okhala oororomeleya wa Yehova

Omusivela wahu Yehova onnanceenyerya waaleela akina vooloca sa yene. Ororomeleya wahu wa Yehova onnanceenyerya weerano yeeyo naamwi vaavaa onakhalaaya woovila. Moone EXILEMA, nave voocharela muthokororye makoho anacharela.

EXILEMA: Defenda a sua fé mesmo enfrentando oposição (5:09)

Apwanne munnoona okhala woovila waaleela akina vooloca sa Yehova?
Mu exilema, tiheeni yaamukhavihenrye Klawutiyu ovootha woova?

Onnakhala wookhweya okhala oororomeleya wa Yehova wakhala wi ninnasiveliwa ni yeeyo onasiveliweiyeno ni wiica yeeyo oniiceiye. Mwaalakhanye Salumu 97:10, nave voocharela muthokororye makoho ala:

Mwawiiwanana ni yeeyo muhusenryaanyu, tisivi mwa ichu ikina seiyo Yehova onasiveliweiyeno? Tisivi mwa ichu ikina seiyo Yehova oniiceiye?
Muni nwerye hai ohuserya osiveliwakano yeeyo eri yaphaama ni wiica yeeyo eri yoonanara?

6. Ninnaphura vaavaa nnamwiiwelelaahu Yehova

Omwiiwelela ilukuluku soothene Yehova echu yaphaama. Mwaalakhanye Isaiya 48:17, 18, nave voocharela muthokororye makoho anacharela:

Apwanne munuupuwela wi nnanwerya ororomela wi Yehova ilukuluku soothene onnasuwela yeeyo eri yaphaama wa hiyaano? Ntakhara heeni?
Ti mwawiihai ichu muhusenryaanyu Mpiipiliyani ni vooloca sa Muluku eeparipari, Yehova, sookhavihenryaayaani ophiyerya hiihaano?

ACHU AKINA ANI: “Mweeparipari Muluku hanathokororya saweera saka.”