MWAHA 35

Nnahaala Opaka Hai Soolakelela Saphaama?

ORUMIHA

Oothene ahu ninnachuna opaka soolakelela. Soolakelela ikina inanwerya opaka matorokelo matokweene mu okumi ahu ni ovolowela onthamwene ahu ni Yehova. Ntoko yootakiherya, muchu onnalakelela ti woowi onahaaleiye okhalakawo, mukhalelo wa wiivakulela naari aahaalaka othela naari otheliwa. Vaavaa nnapakaahu soolakelela saphaama, ninnakhala oohakalala navetho ninnamuhakalaliha Yehova.

1. Munii nwerye hai ompharihela Piipiliya wi mpake soolakelela saphaama?

Muhaakumve opaka yoolakelela, mvekele mvekaka nikhaviheryo na Yehova nave moone yeeyo Piipiliya onaloceiye vooloca sa mwaha. (Mwaalakhanye Masiposipo 2:3-6.) Mmikhalelo mikina, Yehova onnavahererya nlamulo nookwakwaleya. Mmukhalelo yoowo, yoolakelela yaphaama munaphwanelaanyu opaka ori wiiwelela nlamulo nenlo.

Hanka wakhala wi Mpiipiliyani hiinaamomo nlamulo nooluluwanya nlocaka sa yeeyo munaphwanelaanyu weera? Naamwiihiiha, Yehova onamoohoolelaani mu ‘mphiro woophwanelela otxhara.’ (Isaiya 48:17, BNM) Mwawiihai? Piipiliya ookhalano malakiheryo anahaala owerya wookhaviheryaani. Malakiheryo iparipari sa Mpiipiliyani sinanihusiha yeeyo Yehova onuupuweleiye vooloca sa miyaha sammori. Mweeparipari ninnasuwela yeeyo Muluku onuupuweleiye wakhala wi noomwaalakhanya Piipiliya. Nnanwerya opaka soolakelela seiyo sinahaala omuhakalaliha Yehova wakhala wi nohiiwexexa mukhalelo owo onooneiye.

2. Tiheeni munaphwanelaanyu othokororya muhaakumve opaka yoolakelela?

Piipiliya oni: “Awiisuumaaliha onnavarerya meecelo awe.” (Masiposipo 14:15) Eyo enataphulela wi, muhaakunve opaka yoolakelela, munaphwanela weemela wi muupuwelele ichu soothene inavolowelavo. Mwiikohe: ‘Nlakiheryo taani na Mpiipiliyani nnaphariheleya va mwaha yoola? Apwanne yoothanla yeela enahaala okiruuhela murecele wa mmuupuweloni? Ti mwawiihai yoolakelela yeela enahaalaaya waavolowela akina? Nave opwaha soothene: Apwanne enahaala omuhakalaliha Yehova?’—Malamulo 32:29.

Yehova ookhalano ophwanelela wa onleela yeeyo eri yaphaama ni yoonanara. Vaavaa nnasuwelaahu phaama malamulo ni malakiheryo a Yehova ni okhala oolakelela wiiwelela yaawo, yawuupuxerya-ya-murima ahu ennavyakiheya phaama. Yawuupuxerya-ya-murima ori owerya yoowo nraahuno wa wiiwexexa wakhanle wi echu ti yaphaama naari yoonanara. (Aroma 2:14, 15) Yawuupuxerya-ya-murima yeeyo evyakihiwe enanwerya onikhaviherya opaka soolakelela saphaama.

OHUSERYA MWAWIISEELA

Moone mukhalelo malakiheryo a Mpiipiliyani ni yawuupuxerya-ya-murima inanikhaviheryaaya opaka soolakelela saphaama.

3. Mmuhiye Piipiliya wi oohooleleeni

Malakiheryo a Piipiliya eni ewerye hai onikhaviherya vaavaa nnapakaahu soolakelela? Moone EXILEMA, nave voocharela muthokororye makoho anacharela.

EXILEMA: Deixe que os princípios bíblicos guiem sua vida (5:54)

Othanla woochuna tiheeni?
Ntakhara heeni Yehova oonivaha othanla woochuna?
Tiheeni Yehova onivanheiye wi enikhaviherye opaka soolakelela saphaama?

Wi moone yootakiherya emoha ya nlakiheryo na Mpiipiliyani, mwaalakhanye Éfeso 5:15, 16. Voocharela muthokororye ti mwawiihai muneeraanyu ‘mpharihele elukuluku anyu moophwanelela’ wi . . .

mmwaalakhanye Piipiliya moohihiyererya.
mukhale mulopwana, muthiyana, tiithi, mai, naari mwaana aphaama.
mphwanyeye mmithukumanoni vamoha ni muloko.

4. Muvyakihe yawuupuxerya-ya-murima anyu wi mpake soolakelela saphaama

Wakhala wi Piipiliya oovaha nlamulo nookwakwaleya vooloca sa mwaha wammoori, onakhala wookweya usuwela echu yoophwanelela weera. Hanka wakhala wi Piipiliya hanaloca mooluluwanya vooloca sa mwaha? Moone EXILEMA, nave voocharela muthokororye makoho anacharela.

EXILEMA: “Tenha uma boa consciência” (5:13)

Mu exilema, tiheeni murokora eenreiye wi avyakihe yawuupuxerya-ya-murima awe ni opaka yoolakelela yeeyo yaamuhakalalinhe Yehova?

Ntakhara heeni hannaphwanela waaveka akina wi enipakele yoolakelela? Mwaalakhanye Ahebri 5:14, nave voocharela muthokororye makoho ala:

Waaveka akina wi enipakele yoolakelela onanwerya wooneya okhala wookhweya. Nyenya tiheeni mmoha ti mmoha a hiyo onaphwaneleiye osuwela vooloca sa “ohiyaniha”?
Ntoko nonnaahu mu exilema, tiheeni enahaala wookhaviheryaani ovyakiha yawuupuxerya-ya-murima anyu ni opaka soolakelela saphaama?

Ntoko maapa, yawuupuxerya-ya-murima ahu ennanikhaviherya othanla mphiro yoowo nnahaalaahu ochara mu okumi ahu

5. Mucicimihe yawuupuxerya-ya-murima ya akina

Achu toohiyana, mwawihiiha, annapaka soolakelela soohiyana. Vano nni niwerye hai wooniherya wi ninnacicimiha yawuupuxerya-ya-murima ya akina? Moone mikhalelo miili:

Mukhalelo 1: Murokora mmoha yoowo onasiveliwa wiimakeyaara onnathaamela muloko yoowo ariwo arokora anakacamiheya yawoonaka athiyana yiimakeyaanre.

Mwaalakhanye Aroma 15:1 ni 1 Korinto 10:23, 24, nave voocharela muthokororye makoho ala:

Mwawiiwanana ni iversikulu seiya, tiheeni akhweya murokora aahaaleiye olakelela weera? Tiheeni nyuwaano munahaalaanyu olakelela weera wakhala wi muri ni muchu yoowo onoona okhala yoonanara weera echu yeeyo yawuupuxerya-ya-murima anyu eneemereraaya?

Mukhalelo 2: Munna oosuwela wi Piipiliya onaloca wi tahi yoonanara owurya moophimelela, nyenya owo onnalakelela ohiwuryaru soowurya soohapaliha. Owo onnawonpwa wi alye vaate va munna. Ori weiwo owo onnawoona anna ewuryaka soowurya soohapaliha.

Mwaalakhanye Eklesiyaste 7:16 ni Aroma 14:1, 10, nave voocharela muthokororye makoho ala:

Mwawiiwanana ni iversikulu seiya, tiheeni akhweya munna aahaaleiye olakelela weera? Tiheeni mwaahaalanyu weera mwaari ni muchu yoowo oneera echu yeeyo enuukhula yawuupuxerya-ya-murima anyu?

Tiheeni munaphwanelaanyu weera wi mpake soolakelela saphaama?

1. Mvekele wa Yehova mvekaka nikhaviheryo wi mulakelele yaweera.—Tiyako 1:5.

2. Mpake otholathola Mpiipiliyani ni mu soolaleeryiwa sahu wi mphwanye malakiheryo anaphariheleya wa yoolakelela anyu. Mwaakohe tho Akristu awichwelavo.

3. Muupuwele mukhalelo yoolakelela anyu enahaalaaya ovolowela yawuupuxerya-ya-murima anyu ni ya akina.

ACHU AKINA ANI: “Muchu ookhalano ophwanelela wa weera yeeyo onachuneiye. Taani onathokororya yeeyo akina anuupuwelaaya?”

Ntakhara heeni nnaphwanelaahu othokororya miyoonelo sa Muluku ni sa achu akina?

MUKWASU

Wi nipake soolakelela saphaama, nnaphwanela osuwela yeeyo Yehova onuupuweleiye vooloca sa mwaha wammori ni waalikhela mukhalelo yoolakelela ahu enahaalaaya waavolowela akina.

Makoho awuuluulela

Muni nwerye hai opaka soolakelela inamuhakalaliha Yehova?
Muni nwerye hai ovyakiha yawuupuxerya-ya-murima anyu?
Muni nwerye hai wooniherya wi munnacicimiha yawuupuxerya-ya -murima ya akina?

Mwaha kimalinhe:

Yoolakelela

Muupuwele sa yoolakelela yeeyo munahaalaanyu opaka moohilekela. Nave mpharihele iponto raru siri mu ekaaxa “ Tiheeni Munaphwanelaanyu Weera wi Mpake Soolakelela Saphaama?”

Ekina: __________

Yoolakelelaanyu ekina