MWAHA 37
Tiheeni Piipiliya Onaloceiye sa Muteko ni Ikhorowa?
Apwanne nyuwaano mohintoko okhala awuukhuwa wa nthowa na muteko ni ikhorowa? Onanwerya okhala woovila ophwanya yawiivakulelano nave mu elukuluku emohamoha omvaha Yehova malapelo yaawo anamphwanela. Nyenya Piipiliya onnavahererya miruku saphaama seiyo inahaala owerya onikhaviherya.
1. Tiheeni Piipiliya onaloceiye sa muteko?
Muluku onachuna wi hiyaano nihakalalekeno ni muteko ahu. Piipiliya onnaloca wi “echu yooreera wa muchu . . . opuha mmitekoni mwawe.” (Eklesiyaste 2:24) Yehova onnalapa vancipale. Nnachuna omutakiherya moorweela wa okhala anamalapa aphaama. Neerano yeeyo, nnanmuhakalaliha Yehova nave hiyanotho nnamukhala oohakalala.
Olapa ti woochuneya. Nyenya nihirwe neemererye wi muteko okhale woochuneyaxa opwaha omulapela wahu Yehova. (Yohani 6:27) Yehova oolaiherya wi wakhala wi nookuha mu nipuro noopacerya yookhwela awe, owo onamuthokororya soothowa sahu soomwiilini.
2. Tuuvi ori moonelo woophimelela vooloca sa ikhorowa?
Piipiliya onnaloca wi “[ikhorowa] sinnamukhapelela mutxhu,” nyenya owotho onnanlopola wi ikhorowa tahi echu emoharu enawerya onruuhela ohakalala. (Eklesiyaste 7:12, BNM) Mwawiihiiha, Piipiliya onnanceenyerya ohisivelaka ikhorowa, nyenya okhala “ookhwaaneliwa ni seiyo nraahuno.” (Mwaalakhanye Ahebri 13:5.) Wakhala wi noheerano yeela, hinnahaala oceecheya nuupuweelaka wi hinrwa nikhalano ichu sawaakhwanela. Navetho nnamusepa ivaale soohiphwanelela. (Masiposipo 22:7) Nave nnamukhala ootaphuwa wa miraakho sa ochuna oreela mwawaakuveya.
3. Nnii niwerye hai opharihela ikhorowa sahu wi naakhaviherye akina?
Yehova Muluku a mahala, nave ninnamutakiherya vaavaa nnakhalaahu achu “oovaha.” (1 Timóteo 6:18) Nnanwerya opharihela ikhorowa sahu wi nikhaviherye muloko ni waakhaviherya akina anathoiwa, xaxaxa annihu. Yehova onnavahaxa esisapo, ohiya wanthowa na waaca wa yeeyo nivanhaahu, nyenya mathowa aneerinhe ovaha. Wakhala wi nivanhe ni murima woothene, nnahaala okhala oohakalala navetho nnahaala omuhakalaliha Yehova.—Mwaalakhanye Saweriwa T’arummwa 20:35.
OHUSERYA MWAWIISEELA
Moone miphurelo inaphwanyeya mu okhalano moonelo woophwanelela vooloca sa ikhorowa ni okhala awaakhwaneliwa ni seiyo nryaahuno.
4. Mukhalelo munalapanyu onanwerya omucicimiha Yehova
Onthamwene ahu ni Yehova onaphwanela ovolowela moonelo ahu vooloca sa muteko. Moone EXILEMA, nave voocharela muthokororye makoho anacharela.
-
Mu exilema, tiheeni yootikhininhenixa vooloca sa yeeyo Jonas enreiye omutekoni?
-
Tiheeni enreiye wi akuhe muteko mu nipuro noophwanelela?
Mwaalakhanye Kolosi 3:23, 24, nave voocharela muthokororye nikoho nla:
-
Ntakhara heeni nnaphwanelaahu okhala anamalapa aphaama?
Muteko echu yoochuneya. Nyenya hannaphwanela weemereya wi okhale woochuneyaxa opwaha omulapela wahu Yehova
5. Okhala awaakhwaneliwa ni yeeyo nryaahuno ennanruuhela ohakalala
Achu ancipale anneererya waavya okhalano ikhorowa sincipale ophiyerya anawerelaayavo. Nyenya Piipiliya onnanceenyerya weera echu yoohiyana. Mwaalakhanye 1 Timóteo 6:6-8, nave voocharela muthokororye nikoho nla:
-
Tiheeni Piipiliya onanceenyereiye weera?
Naamwi nrino yavakhaani, nnanwerya okhala oohakalala. Moone EXILEMA, nave voocharela muthokororye makoho anacharela.
-
Naamwi yaarino ikhorowa savakhaani, tiheeni yeerinhe imusi seiya okhala soohakalala?
Nyenya nki waakhanle wi nookhalano sawaakhwanela nave nnachuna sincipale? Yesu aahiloca niphwanaphwaniho nnooniherya yawoopiha erivovo wakhala wi nookhalano moonelo yoowo. Mwaalakhanye Luka 12:15-21, nave voocharela muthokororye nikoho nla:
-
Tiheeni muhusenryaanyu orweela mu niphwanaphwaniho na Yesu?—Moone eversikulu 15.
Mwaalakhanye nave mulikanyihe Masiposipo 10:22 ni 1 Timóteo 6:10. nave voocharela muthokororye makoho anacharela:
-
Munuupuwela wi tiheeni eri yoochuneyaxa? Okhala nthamwene a Yehova naari okhalano ikhorowa sincipale? Ntakhara?
-
Yawoopiha taani erivovo ya ochunaxa okhalano ikhorowa sincipale?
6. Yehova onamuthokororya soothowa sahu
Muteko ni ikhorowa inanwerya weeha omuroromela wahu Yehova. Moone EXILEMA wi moone echu nnaphwanelaahu weera wakhala wi nookhalano nikacamiho nenlo, nave voocharela muthokororye makoho anacharela.
-
Mu exilema, makacamiho taani munna aareiyeno?
-
Tiheeni eenreiye wi akhumelele phaama?
Mwaalakhanye Mateu 6:25-34, nave voocharela muthokororye nikoho nla:
-
Tiheeni Piipiliya onaloceiye vooloca sa yaale anamukuha Yehova mu nipuro noopacerya?
ACHU AKINA ANI: “Kinaphwanela olapa mwakuru wi kikhapelele emusi aka, nkinaphwanela oyaaka mmithukumano sa muloko esumana ti esumana.”
-
Yoorepa taani yoolekencheeni wi wakhala wi nokuha malapelo a Yehova mu nipuro noopacerya owo onahaala othokororya soothowa sahu?
MUKWASU
Muteko ni ikhorowa ti soochuneya, nyenya hannaphwanela weemererya wi iho sinaakanyerye omurumeela Yehova.
Makoho awuuluulela
-
Tiheeni enahaala wookhaviheryaani okhalano moonelo woophimelela vooloca sa muteko?
-
Ti mwawiihai waakhwaneliwa ni yeeyo nryaahuno enanruuhelaaya ohakalala?
-
Muni nwerye hai wooniherya ororomela wanyu yoororomeliha ya Yehova ya waavakulela achu awe?
OTHOLATHOLA
Mutholathole wi moone waakhanle wi Piipiliya onnaloca wi ikhorowa ti soonanara.
“Será que o dinheiro é a raiz de todo o mal?” (Artigo do jw.org)
Muhuserye mukhalelo nneeraahu niwerye opharihela ikhorowa sahu wi nimuhakalalihe Yehova.
Apwanne hiyaavo yawoopiha ya oweca a xooku a mapokha?
“O conceito da Bíblia —Jogatina” (Despertai!, março de 2015)
Moone yeeyo yaamukhavihenrye mulopwana mmoha ohiya mapokha ni wiiya.
“Eu era apaixonado por corridas de cavalo” (A Sentinela, 1.o de novembro de 2011)
