MWAHA 38
Mvaheke Esisapo Yamahala ya Okumi
Nnanwerya ohakalala ni opuha ichu sincipale woona wi naakumi. Naamwi nikumanaka ni makacamiho, ti wooweryeya okhala oohakalala mu ilukuluku ikina. Nni nooniherye hai wi ninnavaha esisapo yamahala ya okumi? Nave nthowa taani noochuneya nnaneeriha weerano yeeyo?
1. Ntakhara heeni nnaphwanelaahu ovahaka esisapo okumi?
Ninnaphwanela ovahaka esisapo okumi woona wi yamahala yoorweela waTiithi ahu oosivela Yehova. Owo “ehime ya okumi”—ti yoowo opatunxe okumi. (Salumu 36:9) “Owo mwaneene, tonavaha wa oothene okumi, m’wiya ni soothesene.” (Saweriwa T’arummwa 17:25, 28) Yoorepa ela ennooniherya wi Yehova onnanivaha yeeyo nnachunaahu wi ntitelele okhala akumi. Opwaha yeeyo, owo onnanivaha seiyo nnachunaahu wi nikhale oohakalala.—Mwaalakhanye Saweriwa T’arummwa 14:17.
2. Nni nooniherye hai wa Yehova wi ninnavaha esisapo okumi?
Yehova onnanthokororya ovinyerya vaavale naarupaliwaahu. Mu ekwaha ekina, mulapeli a Yehova, Tavite, aahivekela ariki: “Kihaakuvale wuupiwa miyo miitho anyu yaakoona.” (Salumu 139:16) Yehova onnavaha esisapo okumi anyu. (Mwaalakhanye Mateu 10:29-31.) Yehova onnavaha esisapo okumi nave onnatepa ohica vaavaa muchu onamwiipheiye muchu mukina naari wiisiipha mukhateiye. a (Mukwaha 20:13) Yehova tho onamukhala oohica vaavaa nihiniikhapelelaahu ni okuha va yawoopiha okumi ahu ni wa akina. Vaavaa nnakhapelelaahu okumi ahu ni ocicimiha okumi wa akina, ninnooniherya wi ninnavaha esisapo yamahala yeela yootikhiniha.
OHUSERYA MWAWIISEELA
Moone mikhalelo mikina muneeraanyu nwerye wooniherya wi munnavaha esisapo okumi.
3. Mukhapeleleke okumi anyu
Woona wi noomuroromeliha Yehova wi ilukuluku soothene nnahaala weeraka yeeyo onachuneiye, ninnapharihela ekumi ahu yoothene wi nimurumeele. Ori ntoko ovaha mwiili ahu wa Muluku ntoko mukucho. Mwaalakhanye Aroma 12:1, 2, nave voocharela muthokororye makoho ala:
-
Mwawiiwanana ni yoorepa yeela tiheeni enahaala wooceenyeryaani okhapelela okumi anyu?
-
Tisivi siri mikhalelo mikina saweerano yeeyo?
4. Mukhaleno ekaasoope wi mmusepe asitenti naari okhwa
Piipiliya onnanceenyerya osepa ichu seiyo siri sawoopiha. Moone EXILEMA wi moone ichu taani munaphwanelaanyu opaka wi mpakeke ichu mwawiikhapelela.
Mwaalakhanye Masiposipo 22:3, voocharela muthokororye ti mwawiihai nyuwaano ni akina muneeraanyu mutitelele okhala awiikhapelela . . .
-
owaani.
-
omutekoni.
-
vaavaa munavyakihaanyu mwiili.
-
vaavaa muneecihaanyu ecika, moota naari ekaaro.
5. Mucicimihe ekumi ya mwaana yoowo orupaliwe
Tavite oothariha wi Yehova onnuukhuwa wa yeeyo eneereya wa mwaana yoowo orupaliwe. Mwaalakhanye Salumu 139:13-17, nave voocharela muthokororye nikoho nla:
-
Apwanne wa Yehova ekumi enapacerya vaavaa muthiyana onarupaleiye naari mwaana amanle oyariwa?
Malamulo yaawo Yehova aavanheiye wa nloko na Aisarayeli yaanamukhapelela mayi ni mwaana yoowo orupaliwe. Mwaalakhanye Mukwaha 21:22, 23, nave voocharela muthokororye makoho ala:
-
Tuuvi waari moonelo wa Yehova vooloca sa muchu yoole, moohilakelela aayeeha erukulu?
-
Yehova onoona hai vaava muchu oneereiyeno yeeyo moolakelela? b
-
Tiheeni munuupuwelaanyu vooloca sa moonelo yoola wa Muluku?
Naamwi muthiyana onasuwela wi ekumi ti yasisapo onanwerya wuupuwela wi oyeeha erukulu yoolakelela awe. Mwaalakhanye Isaiya 41:10, nave voocharela muthokororye makoho anacharela:
-
Wakhala wi muthiyana onnakhinyereriwa oyeeha erukulu, taani owo onaphwaneleiye omveka nikhaviheryo? Ntakhara heeni?
ACHU AKINA ANI: “Muthiyana ori oothene ookhalano ophwanelela wa olakelela oyeeha erukulu—woona wi mwiili awe.”
-
Tiheeni enoolekechaani wi Yehova onnavaha esisapo okumi wa mayi ni wa mwaana?
MUKWASU
Piipiliya onnanihusiha osivela, ocicimiha ni okhapelela ekumi, yoowo ori yamahala yootikhiniha Yehova onivanheiye. Eyo enaphitaanyerya ekumi ahu ni ya akina.
Makoho awuuluulela
-
Ntakhara heeni ekumi ya achu eryaaya yasisapo wa Yehova?
-
Ti mwawiihai Yehova onooneiye vaavaa muchu onamwiipheiye muchu mukina naari oniisiipheiye mukhateiye?
-
Ntakhara heeni munavahaanyu esisapo yamahala ya ekumi?
OTHOLATHOLA
Nni nooniherye hai omuthamalela Yehova wa nthowa na yamahala ya ekumi?
Mphwanye naakhulo na nikoho nla: Apwanne Muluku onanwerya omulevelela muthiyana yoowo otonko oyeeha erukulu?
Moone mukhalelo moonelo wa Yehova vooloca sa okumi onaphwanelaaya onivolowela vaavaa nnathanlaahu mathatelo ahu.
“‘Esportes radicais’—Vale a pena correr o risco?” (Despertai!, 8 de outubro de 2000)
Nki wakhala wi muchu ookhalano muupuwelo wa ochuna wiisiipha? Muthokororye mukhalelo Piipiliya onahaaleiye owerya omukhaviherya.
a Yehova onniiwexexa ohooxeya onakhaleiyeno muchu yoowo onachuna wiisiipha, nave owo onnachuna omukhaviherya. Yehova onnaathokororya vancipale yaale ari awuukhuwa. (Salumu 34:18) Wi moone mukhalelo Yehova onaweryeiye waakhaviherya yaale arino muupuwelo wa ochuna wiisiipha, moone mwaha oni: “Eu quero morrer—Será que a Bíblia pode me ajudar se estou tendo pensamentos suicidas?” yoowo onaphwanyeya mmwaha yoola mu nikupa nni: Otholathola.
b Muchu yoowo ontonko oyeeha erukulu, hanaphwanela okhala awuukhuwa, ni wiisoona okhalano nthowa—Yehova onanwerya omukhurumuwela. Wi moone sooleeliherya sincipale, mwaalakhanye mwaha “O que a Bíblia diz sobre o aborto?” yoowo onaphwanyeya mmwaha yoola mu nikupa nni: Otholathola.
