Akristu eeparipari ari oolakelela wi hiyaavo echu naari muchu ani aarakamelihe ni Yehova. Mweeparipari, nyuwaano munoona hiiha. Yehova onnatepa ovaha esisapo ororomeleya wanyu. (Mwaalakhanye 1 Matharihelo 28:9.) Mikhalelo taani saahaala weeha ororomeleya wanyu, nave muni mvoothe hai seiho?

1. Ti mwawiihai akina yaahaalaaya weeha ororomeleya wahu wa Yehova?

Achu akina anamweererya onihiiha omurumeela Yehova. Nyenya taani yaahaala weerano yeela? Akina yaawo ahin’ye eparipari annaloca sawootha ntakhara marehereryo a Muluku wi emwarye nroromelo nahu. Awo aniichaniwa alipa oomwaryeya. Ohiya yeeyoru tho, ahooleli akina a malapelo annamwaryamwaxa sawootha ntakhara hiyo wi yeererye waahuweliha akina mu eparipari. Ti yawoopiha weererya ovaanela ni yaawo ananiica, owaalakhanya aliivuru aya, oxekurya isaiti saya naari woona ixilema saya. Alocaka sa yaale aneererya waamaaliha akina omurumeela Yehova, Yesu aahi: “Mwaahiyeeni! Ari ahooleli oohoona. Muchu oohoona aanamuhoola oohoona mukhweiye, ooweeli ala anammorela mulicini.”—Mateu 15:14.

Hanka waakhanle wi muchu yoowo nimusuwenlaahu oolakelela ohiya okhala Namoona a Yehova? Nnanwerya okhala oothananaxa wakhala wi muchu yoowo nnamusivelaahu oheerano yeela. Muchu ola akhweya onamweererya onikhinyererya omuthanla yene naari Yehova. Nnaphwanela olakelela otitelela okhala oororomeleya wa Yehova opwaha echu vyakala. (Mateu 10:37) Ti nthowa nene hiyaano nniiwelelaahu nlamulo na Yehova na ohichekula ni achu si yaala.—Mwaalakhanye 1 Korinto 5:11.

2. Ti mwawiihai soolakelela sahu sinooniheryaaya wi nri oororomeleya wa Yehova?

Omusivela Yehova onahaala onceenyerya osepa opaka echu vyakala yeeyo eniiwanana ni malapelo atheru. Ela enaphitaanyerya ohipaka makupa mu marehereryo naari mmuteko yoowo oniiwanana ni malapelo atheru. Yehova onnanlopola: “Khuma’mmoni [mu Papulu Mutokotoko], atchu aka.”—Wupulula 18:2, 4, NN.

 OHUSERYA MWAWIISEELA

3. Mukhaleno ephoole ni mahusiheryo atheru

Tiheeni nnahaalaahu weera wakhala wi nohiiwa ichu soohiphwanelela vooloca sa marehereryo a Yehova? Mwaalakhanye Masiposipo 14:15, nave voocharela muthokororye nikoho nla:

• Ntakhara heeni ninnaphwanela okhalano ephoole wi niheemererye ichu soothene nniiwaahu?

Mwaalakhanye 2 Yohani 10, nave voocharela muthokororye makoho ala:

• Nnaphwanela waakhalihaka hai alipa oomwaryeya?

• Hiyaano noosuwela wi tahi ya miruku oloca ni achu oomwaryeya. Nyenya ti mwawiihai naahaalaahu ovoloweliwa ni miruku saya?

• Nyuwaano munuupuwela wi Yehova aahaala wiisoona hai waakhanle wi ninnawiriyana ichu soohiphwanelela vooloca sa yoowo ni marehereryo awe?

4. Mutitelele okhala oororomeleya wa Muluku naamwi munna apanke yoocheka

Wakhala wi noosuwela wi muchu mmoha mmulokoni oopaka yoocheka etokotoko, tiheeni nnaphwanelaahu weera? Moone yeeyo Muluku aalonceiye wa nloko na Isarayeli khalai. Mwaalakhanye Onamukutxho 5:1.

Hiiha ntoko eversikulu ela eloncaaya, wakhala wi noosuwela wi ookhala muchu opanke yoocheka etokweene mmulokoni, hiyaano nnaphwanela waaleela asitokweene a muloko. Nto nihaakumve weerano yeela, yaahaala okhala yaphaama omuceenyerya muchu owo mooreera murima wi aloce ni asitokweene a muloko nave alokohe yoocheka awe. Wakhala wi owo heenreno yeeyo, ororomeleya wahu wa Yehova onaphwanela onceenyerya oya waaleela asitokweene a muloko wa yeeyo nsuwenlaahu. Ti mwawiihai weerano yeela enooniheryaaya osivela woororomeleya wahu wa . . .

• Yehova Muluku?

• muchu yoowo opanke yoocheka?

• akina mmulokoni?

 5. Mukhale ocai wa Papulu Mutokotoko

 MUKWASU

Wi ntitelele okhala oororomeleya wa Yehova, nnaphwanela osepa onthamwene ni yaawo ahiri oororomeleya wa yoowo. Nnaphwanela tho wiivalaanya moomalela ni malapelo atheru.

Makoho awuuluulela

• Ntakhara heeni nihinaphwanelaahu woona, waalakhanya, naari owiriyana miruku sa alipa oomwaryeya?

• Ti mwawiihai nnaphwanelaahu waakhalihaka yaale ahinachuna okhala Anamoona a Yehova?

• Ti mwawiihai nneeraahu niwerye wiiwelela olopola wa okhuma mmalapelo atheru?