Ohiyu omoha, Mwene Napukotonosori aaloha echu yootikhiniha. Echu eyo yaamuhaleeliha ophiyerya ahinawerya okona. Aawiichana alipa masica nave aahi: ‘Mukileele echu eyo kilonhaaka.’ Awo yaamwaakhula: ‘Mwene, mutharihe mulonhaanyu.’ Nyenya Napukotonosori aaloca: ‘Hooye! Mukileele echu kilonhaaka, mwahiwerya weerano, munamwiiphiwa oothene.’ Yaamwaakhula wanawiili eriki: ‘Mwene, mutharihe mulonhaanyu wi ntaphulele.’ Mwene aahaakhula: ‘Muvanenle okiwoka miyaano ni wootha naari elavilavi. Kinachuna wi mukitharihele echu kilonhaaka.’ Voomaliherya awo yaamwaakhula mwene: ‘Mweelaponi haamo muchu onawerya weera yeeyo munachunaanyu.’

Napukotonosori aananariwa alamulela wi yiiphiwe anamiruku oothene. Anamiruku awo yaaphitaanyerya Taniyeli, Satraki, Mesaki ni Apeteneko. Taniyeli aamveka mwene wi amvahe elukuluku vakhaani. Voocharela owo ni asinthamwene awe yaavekela wa Yehova emvekaka nikhaviheryo. Tiheeni Yehova enreiye?

Yehova aamooniha Taniyeli yootaphulela ya yooloha ya Napukotonosori. Mmeeloni mwaya, Taniyeli aaya wa mulapeli a mwene nave aahi: ‘Ohiwiiphe anamiruku. Okikuxe miyaano wi kataphulele echu olonheiye.’ Mulapeli owo aamukeriha Taniyeli wa Napukotonosori. Taniyeli aahi wa mwene: ‘Muluku owoonihaani ichu inaya weereya. Nyuwaano mwene mooloha eruku etokotoko. Muru aya waari wa ewooro, echirima ni miwono saari sa eparata, erukulu ni eyuunu saari eporonse, meco saari sa mithipo nave inaani saari eriyari ya muthipo ni eriyari ekina ya oloko. Nluku naapacuwa va mwaako nave naahuuwela vasulu va inaani sa eruku ni naapwesa seiyo. Soothene saathatuwa nchupi nave echeku yaakuxa soothene. Nto nluku naahunnuwa nikhala mwaako mutokweene waakhunenle elapo yoothene.’

Voocharela Taniyeli aahi: ‘Tiila yootaphuleleene: nyuwaano muri muru  opakiwe ni ewooro. Eparata ori omwene yoowo onaya wooraceelaani. Voocharela onamukhalavo omwene woolikana ni eporonse yoowo onahaala olamulela elapo yoothene. Omwene woocharela onarwa okhala woolipa ntoko muthipo. Wookuchula onamukhalavo omwene wookawanyeya, makupa mamoha oolipa ntoko muthipo, makina ooceecheya ntoko oloko. Nluku nenlo naathatunwe mwaako ti Omwene wa Muluku. Omwene owo onahaala onyaanya omwene woothene nave horwa omala.’

Napukotonosori aahuuwela vathi vamiithoni va Taniyeli. Owo aahi: ‘Muluku anyu chiri tooweryaxa nave ti Apwiya a mamwene oothene.’ Ohiya wi amwiiphe, Napukotonosori aamweera Taniyeli okhala mutokweene a anamiruku oothene ni mulamuleli a Papulu. Onnawerya woona mukhalelo Yehova aakhunleiye nivekelo na Taniyeli?