Afarisi hiyaasiveliwa ni Yesu nave yaanaavya miruku wi emphare. Awo yaaloca ni yoowo wi haaphwanela ompenuxa muchu nihiku na Sapata. Sapata mmoha, Yesu amphwanya mulopwana ahoona ari mphironi. Owo aaloca ni arummwa awe: ‘Moone ikuru sa Muluku imukhaviheryaka mulopwana ola.’ Yesu aameya echaya aakanyerya ni mara nave aamuhela mmiithoni. Nave aaloca: ‘Hawe wasusule vanchiyani o Silowe.’ Mulopwana ole aaheerano nave yaari ekwaha yoopacerya mu ekumi awe opacerya woona.

Achu yaanakhala ookacamiheya. Awo yaanaloca: ‘Tahi yoola aakiraathi avekaka yamahala, naari onamphwana ni yoowo?’ Mulopwana aahaakhula: ‘Ti yoomi.’ Achu yaamukoha: ‘Ahulen’ye hai miitho aa?’ Vaavaa aalonceiye echu yeeren’ye, awo yaamukuxa emukeriha wa Afarisi.

Mulopwana aahaaleela Afarisi ariki: ‘Yesu aaheetheya echaya ahikeela mmiithoni mwaka aloca hawe wasusule o muhice Silowe. Kaayawo kisusula nave kinoona.’ Afarisi yaaloca: ‘Muchu owo hanarwa wa Muluku woona wi hanakhapelela nihiku na Sapata.’ Nyenya akina yaanaloca: ‘Onaweryeya hai muchu ohinarweela wa Muluku weerano echu yeela?’

Afarisi yaawiichana asitiithi a mulopwana enaakoha eriki: ‘Mwaninyu ola, opacenrye woona hai?’ Asitiithi awe yaanoova ntakhara Afarisi  yaaloca wi muchu yoole ani anamuroromela Yesu ahaala wiikariwa mu sinakooka. Vano awo yaahaakhula: ‘Hiyaano hinnasuwela. Mmukohe mwaneene.’ Vano Afarisi yaamukohaaya mulopwana wiiliwiili, owo aahaakhula: ‘Kiholeelaani vale. Ntakhara heeni munakikohaanyu?’ Afarisi yaananariwa, yaamphara emvonyerya okhwipi.

Yesu aaya wa mulopwana ole amukoha: ‘Weyaano onnamweemererya Mesiya?’ Owo aahaakhula: ‘Taani Pwiya, wi kimweemererye.’ Yesu aaloca: ‘Ti yoowo onaloca ni weyaano.’ Apwanne hiyaari echu yaphaama Yesu oloca yeela? Tahi wi Yesu onne ompenuxa mulopwana owo, nyenya aamukhaviherya tho okhalano nroromelo.