Yesu amanle okhwa, mulopwana oovuwa awiichaniwa Yosefe amveka Pilato wi akuxe mwiili wa Yesu waari vamwirini. Yosefe aahuruwela mwiili wa Yesu ni ekuwo nave aamvitha mu nihiye nivyaani nave aawala ni nluku. Mutokweene aalipa eephepa aaloca ni Pilato: ‘Ninnoova wi amuhuserya awe enarwa emwiiyamo ekooke yaaleeleke achu wi oovinya mookhwani.’ Vano Pilato aamwaakhula: ‘Mwalipeleleke ntoko munakhwelaanyu.’

Evinre mahiku mararu, wooxixelo, athiyana akina yaaya o nihiye ephwanya nluku niviihiwevo. Munkeelo aari vanihiyeni aahaaleela ariki: ‘Muhoove. Yesu ooviihiwa mookhwani ntoko aalonceiye. Mwaaleele amuhuserya wi eye o Kalileya, munammoona Yesu weiwo.’

Mariya Makatala mwawaakuveya aaya wa Petro ni Yohani. Owo aahaaleela ariki: ‘Aaviihiwa Apwiya mu nihiyeni.’ Petro ni Yohani yaachimakela o nihiyeni. Vaavaa yonnaaya wi hiwaarimo echu, yaakookela mmawannyaya.

Vaavaa Mariya aakookenleiye o nihiyeni, aawoona ankeelo apiili nave aaloca ni yaawo ariki: ‘Ahaakuxa Apwiya aka nkisuwenle weiwo akuhiwaayawo.’ Voocharela aamoona mulopwana, uupuwelaka wi mwaneene eemaca, owo aaloca: ‘Pwiya mukileele nipuro mmukunhaanyuwo wi kamukuxe.’ Nyenya vaavaa mulopwana aalonceiye ariki: “Mariya!” owo aasuwela wi aari Yesu. Vano owo aatikhina nave aakhuwela ariki: ‘Muhusiha.’ Yesu aamuleela: ‘Hawe wa asinnaka waaleele wi wookoona.’ Mariya aachimakela wa arummwa aaleela wi oomoona Yesu.

Oxekuwakavo, arummwa apiili yaakhuma o Yerusalemu eyaaka o Emau. Aahaaphwanya mulopwana mu mphironi aakoha echu yaalocaaya. Awo yaamwaakhula: ‘Hosuwenle echu yeeren’ye mahiku yaala? Mmahiku mararu avinre asitokweene aalipa eephepa amperekha Yesu wi iiphiwe. Hiihaano tho athiyana akina aloca wi owo oovinya.’ Mulopwana owo aahaakoha: ‘Himunaaroromela alipa a miririmu? Awo yaaloca wi Kristu ahaala wiiphiwa ni oviihiwa.’ Owo  aahaatharihela Soorepa. Vaavaa yaacamelaaya ophiya o Emau, oohuserya yaamveka wi ekhale vamoha. Amanle ovekelela yoolya, awo yaasuwenlaaya wi aari Yesu. Nave aarimeela.

Oohuserya ale apiili yaaya mu empa ya Yerusalemu mummo arummwa yaathukumannaayamo nave yaaleela echu yeeren’ye. Vaavaa awo yaaryaaya mummo, Yesu aahaaphiyerya oothene. Wuupaceryani arummwa hiyaaroromela wi aari Yesu. Vano owo aaloca: ‘Moone mata aka ni inaani saka. Yaarempwa wi Kristu aahaala ohooxiwa.’