1, 2. (a) Yamahala taani enakhala yoochuneya wa nyuwaano? (b) Ntakhara heeni woopola yamahala etokweene ya Muluku?

YAMAHALA taani yoochuneya nyuwaano mwaakhenlaanyu? Wi yamahala ekhale yoochuneya wa nyuwo, henaphwanela okhala yoowalamela. Nyenya wakhala wi mwaanachuna naari ennoohakalalihaani, munnathamalela chiryene.

² Wa samahala soothene Muluku onivanheiye, yookhalavo naachunaahu vancipale opwaha ikina. Eyo yamahala etokweene ya Muluku wa achu. Mmwaha yoola, nnahaala ohuserya wi Yehova oomurumiha Mwanawe, Yesu Kiristu, wi niwerye okhalano ekumi yoohimala. (Mwaalakhanye Mateu 20:28.) Nthowa na omurumiha mwanawe wi akhwe ntakhara hiyo, Yehova ohooniherya wi onnanisivela.

3. Ntakhara heeni achu annakhwa?

³ Woopola mukhalelo Yehova opharihenleiye wi aavuluxe achu mu yoocheka ni okhwa. (Éfeso 1:7) Wi niiwexexe ntakhara heeni woopola waanachuneya, nnaphwanela osuwela yeeyo yeeren’ye mu iyaakha sincipale muculi mu emaca ya Eeteni. Asitiithi ahu oopacerya, Aatamu ni Haava, yaacheka. Nthowa na yeeyo, aakhwa. Hiyaano tho ninnakhwa nthowa na orava yoocheka ya Aatamu ni Haava.—Moone Yooleeliherya 9.

4. Aatamu aari taani, nave tiheeni aareiyeno?

⁴ Vaavaa aampatunxeiye mulopwana oopacerya, Aatamu, Owo aamvaha echu yavameekhaaya. Muluku aamvaha  ekumi yoophaameya. Aatamu aakhalano muupuwela ni mwiili woophaameya. Owo haahaala wiiceliwa, wuuluvala naari okhwa. Woona wi Aatamu aapatuxiwe ti Yehova, Owo aari ntoko tiithi awe. (Luka 3:38) Yehova wiiliwiili aanaloca ni yoowo. Muluku aanamuleela yeeyo aachuneiye, nave aamvaha muteko woohakalaliha.—Maphatxuwelo 1:28-30; 2:16, 17.

5. Enataphulela eheeni Piipiliya aalocaka wi Aatamu ari “òphwana” ni Muluku?

⁵ Muluku aampatunxe Aatamu “òphwana ni yowo.” (Maphatxuwelo 1:27) Yehova aamvaha mikhalelo soolikana ni sawawe, ntoko osivela, miruku, ekhaikhai, ni ikuru. Aamvaha othanla wootaphuwa. Aatamu haari ntoko maakina. Muluku aamvaha owerya othanla yaphaama naari yoonanara. Waakhanle wi Aatamu aathanla omwiiwelela Muluku, owo aahaala okhala Mparataiso okhala wookhala.

6. Vaavaa Aatamu aamuchekenleiye Muluku, tiheeni aayeleenleiye? Eyo enivolowenle hai?

⁶ Vaavaa aamuchekenleiye Muluku nave athoriheriwa okhwa, Aatamu aayeleela echu yoochuneyaxa. Owo aayeleela onthamwene awe ni Yehova, okumi woophaameya, ni nipuro nawe nooreera. (Maphatxuwelo 3:17-19) Aatamu ni Haava yaathanla ohimwiiwelela Muluku, mwawiihiiha hiyaarivo ewehereryo wa yaawo. Nthowa na yeeyo Aatamu eenreiye, “yòvolowa mwelaponi yotxheka, navetho ni yotxheka wòvolowa mwelaponi okhwa, hihatho okhwa wòhaphwanya atxhu othene, ntakhara atxhu othene àtxheka.” (Aroma 5:12) Vaavaa Aatamu aachenkeiye, owo ‘ahitumiha’ vamoha ni achu oothene mu okapuroni wa yoocheka ni okhwa. (Aroma 7:14) Apwanne yookhalavo ewehereryo wa hiyo? Aai, yookhalavo.

7, 8. Woopola onavolowela eheeni?

⁷ Woopola tiheeni? Onavolowela ichu piili soochuneya.  Yoopacerya, waaca wa ikhorowa sinaliveliwa wi oopoliwe muchu naari echu. Yanaawiili, nlivelo nawaakhwanela, naari oliva owalamela wa echu.

⁸ Haavo muchu aahaala owerya olivela yeeyo Aatamu aayeleenleiye vaavaa aachenkeiye ni onruuhela okhwa. Nyenya Yehova oovaha mukhalelo wa onivuluxa mu okapuro wa yoocheka ni okhwa. Hankooni noone mukhalelo woopola onalapaaya ni mphurelo nneeraahu nikhaleno.

9. Woopola onaphwanela oliveliwa hai?

⁹ Haavo muchu mmoharu aahaala owerya olivela ekumi yoophaameya yeeyo Aatamu oyeleenleiye. Ntakhara heeni? Ntakhara oothene na achu oohiphaameya. (Salumu 49:7, 8) Yaanachuneya ekumi ekina yoophaameya. Ti nthowa nene eneeriwaaya “woopola wawaakhwanela.” (1 Timóteo 2:6, Tradução do Novo Mundo) Woopola waaphwanela okhalano esisapo emohamoha ntoko ekumi yeeyo Aatamu oyeleenleiye.

10. Yehova ovanhe hai woopola?

¹⁰ Yehova ovanhe hai woopola? Yehova aamurumiha Mwanawe oochuneyaxa veelaponi yavathi. Mwaana yoowo aapacenryeiye ompatuxa. (1 Yohani 4:9, 10) Yesu aahiiveleela waahiya atiithi awe ni nipuro nawe wirimu. (Filipi 2:7) Yehova aamuthaamiha Yesu wirimu orwa veelaponi yavathi, nave Yesu aayariwa ntoko muchu oophaameya, ahirino yoocheka.—Luka 1:35.

11. Enaweryeya hai muchu mmoha owoopola achu oothene?

¹¹ Mulopwana oopacerya, Aatamu, ahaayeleeliha ekumi yoohimala achu oothene vaavaa aamuchekenleiye Yehova. Apwanne muchu mukina aanwerya oviihavo okhwa wa anamwane oothene a Aatamu? Aai (Mwaalakhanye  Aroma 5:19.) Yesu, yoowo ohintonko ocheka, oovaha ekumi awe yoophaameya ntoko woopola. (1 Korinto 15:45) Ekumi awe yoophaameya yoophariheliwa wi oviihiwevo okhwa wa anamwane oothene a Aatamu.—1 Korinto 15:21, 22.

12. Ntakhara heeni Yesu aahooxeya vancipale?

¹² Piipiliya onnanleela ohooxeya wa Yesu ahaakumve okhwa. Owo aatepa owaxuliwa, okhomeliwa vamwirini, nave ahoona ekoi ophiyerya okhwa. (Yohani 19:1, 16-18, 30) Ntakhara heeni Yesu aahooxeya vancipale? Ntakhara Satana aaloca wi haavo muchu aahaala okhala oororomeleya variyari va yaweeha. Yesu ahooniherya wi muchu oophaameya onanwerya okhala oororomeleya wa Muluku variyari va soohooxa. Mwaanyiherye ohakalala Yehova aareiyeno nthowa na Yesu!—Masiposipo 27:11; moone Yooleeliherya 15.

13. Woopola waaliveliwe hai?

¹³ Woopola waaliveliwe hai? Yesu aahaavaha Atiithi awe esisapo ya ekumi awe. Mu 14 a Nisani, muyakha wa 33 mu mahiku a Ayuuta, Yehova aheemererya wi amwiicani a Yesu emwiiphe. (Ahebri 10:10) Evinre mahiku mararu, Yehova aamukookiherya Yesu okumi, ohiya ntoko muchu, nyenya ntoko munepa. Voocharela, vaavaa Yesu aakookenleiye wa Atiithi awe wirimu, owo aaperekha esisapo ya okumi awe woophaameya wa Yehova ntoko yawoopola. (Ahebri 9:24) Mwawiihiiha, woopola waaliveliwa. Hiyaano nookhalano ekari ya okhala ootaphuwa wa yoocheka ni okhwa.—Mwaalakhanye Aroma 3:23, 24.

14, 15. Tiheeni nnaphwanelaahu weera wi nikhurumuweliwe soocheka sahu?

¹⁴ Hiyaano ninnapuha yamahala yeela etokweene ya  Muluku ovinyerya khalai. Nyenya hankooni noone mukhalelo nneeraahu niphure hiihaano ni omwaahiyu.

¹⁵ Okhurumuweliwa wa soocheka sahu. Ti woovila weera yeeyo eri yawookololowa ilukuluku soothene. Ninnahesa, nave ninnaloca naari weera yoonanara. (Kolosi 1:13, 14) Nnii nikhurumuweliwe hai? Nnaphwanela ocharuwa yoonanara yeeyo nenraahu nave mwawiiyeviha omveka Yehova wi anikhurumuwele. Nave nnaphwanela ororomela wi soocheka sahu sookhurumuweliwa.—1 Yohani 1:8, 9.

16. Tiheeni nnaphwanelaahu weera wi nikhaleno yawuupuxerya-ya-murima yaphaama?

¹⁶ Nnanwerya okhalano yawuupuxerya-ya-murima yaphaama. Wakhala wi yawuupuxerya-ya-murima ahu ennanleela wi noheera yoonanara, ninniisona okhalano nthowa, ophiyerya wiisoona okhala oohiphwanelela. Nyenya honachuneya okururyeya. Wakhala wi ninnamveka Yehova wi anikhurumuwele, nnaphwanela ororomela wi onahaala oniwiriyana ni onikhurumuwela. (Ahebri 9:13, 14) Yehova onachuna wi nimuleeleke makacamiho ni oceecheya wahu. (Ahebri 4:14-16) Ntoko yookhumelela, nnahaala okhalano murecele ni Muluku.

17. Mareeliho taani ari oweryeya nthowa na okhwa wa Yesu?

¹⁷ Nookhalano ewehereryo ya okumi woohimala. “Nlivelo na yotxheka ti okhwa, nto mahala Muluku onanivaheiye, ti ekumi yohimala mwa Yesu Kristu Pwiya ahu.” (Aroma 6:23) Woona wi Yesu ookhwa, hiyaano nnanwerya okhalano okumi woohimala ni opuha ekumi yoophaameya. (Wupulula 21:3, 4) Nyenya tiheeni nnaphwanelaahu weera wi naakhele mareeliho yaala?

18. Nnasuwela hai wi Yehova onnanisivela?

¹⁸ Mwaanyiherye ohakalala munakhalaanyuno wakhala  wi muchu ohoovahaani yamahala. Woopola yamahala yasisapo opwaha soothene, nave hiyaano nnaphwanela omuthamalela Yehova ni murima woothene. Yohani 3:16 onnanleela wi “Muluku òtepa wakhwela atxhu a mwelaponi, ophiyerya omvaha Mwana awe mmoharu.” Aai, Yehova onnanisivela vancipale ophiyerya anivaha Mwanawe oochuneyaxa, Yesu. Nave ninnasuwela wi Yesu tho onnanisivela, woona wi aahiiveleela okhwa ntakhara hiyo. (Yohani 15:13) Yamahala ya woopola enaphwanela woolekechaani wi Yehova ni Yesu chiryene annoosivelaani.—Galasya 2:20.

19, 20. (a) Munii muwerye hai okhala nthamwene a Muluku? (b) Munii mooniherye hai wi munneemererya mukucho wa woopola wa Yesu?

¹⁹ Mmanlaanyu ohuserya sa osivela otokweene wa Muluku, munii muwerye hai okhala nthamwene awe? Tahi wookhweya omusivela muchu muhimusuwenlaanyu. Yohani 17:3 onaloca wi nnaphwanela omusuwela Yehova. Wakhala wi munneerano yeela, omusivela wanyu onahaala wunnuwa, munahaala ochunaka omuhakalaliha, nave munahaala okhala nthamwene awe. Mwawiihiiha titelelani ohuserya sa Yehova moorweela wa omuhuserya Piipiliya.—1 Yohani 5:3.

²⁰ Mweemererye mukucho wa woopola wa Yesu. Piipiliya onaloca wi “ole onamwemererya Mwana, òkhalano ekumi yohimala.” (Yohani 3:36) Enataphulela eheeni omweemererya Mwana? Enataphulela weerano yeeyo Yesu onachuneiye wi neere. (Yohani 13:15) Henaakhwanela olocaru wi ninnamweemererya Yesu. Wi neemererye woopola, nnaphwanela wooniherya nroromelo nahu mu saweera. Mu Tiyako 2:26, ninnaalakhanya: “Nroromelo nahinatxharihiwa ni miteko . . . , nnakhala nokhwanene.”

21, 22. (a) Ntakhara heeni nnaphwanela ophiya va yawuupuxerya ya okhwa wa Yesu eyaakha ti eyaakha? (b) Tiheeni enahaala othokororyiwa mu Miyaha 6 ni 7?

 ²¹ Phiyani va yawuupuxerya ya okhwa wa Yesu. Ohiyu wookuchula Yesu ahaakumve okhwa, owo aahusiha wi nnaphwanela wuupuwelelaka okhwa wawe. Ninneerano yeela iyaakha soothene, nave ela eniichaniwa Yawuupuxerya naari “olya wa Apwiya”. (1 Korinto 11:20; Mateu 26:26-28) Yesu onachuna wi nuupuweleleke wi owo oovaha ekumi awe yoophaameya wi anoopole. Owo aaloca: “Mwereke yela mukupuwelaka miyano.” (Mwaalakhanye Luka 22:19.) Vaavaa munaphiyaanyu va Yawuupuxerya, munnooniherya wi munnuupuwelela woopola ni osivela otokweene yoowo Yehova ni Yesu aryaayano wa hiyo.—Moone Yooleeliherya 16.

²² Woopola yamahala etokweene yeeyo naaphwanelaahu waakhela. (2 Korinto 9:14, 15) Yamahala ela yoochuneya, enahaala tho waakhaviherya achu ancipale akhwile. Miyaha 6 ni 7 sinahaala othokororya mukhalelo oneeraaya okhale wooweryeya.