1-3. (1) Tuuvi ori moonelo wa achu ancipale vooloca sa muteko? (2) Makoho taani nnahaalaahu waakhula mmwaha yoola?

MU ELAPO yoothene, achu annatepa olapa wi yiikhaviherye ni waakhaviherya a veechokoni vaya. Ancipale hanasiveliwa ni muteko aya, ophiyerya wi akina waananara olapa mahiku oothene. Nyuwaano tho munoona hiiha? Tiheeni munaphwanelaanyu weera wi muhakalaleke ni muteko anyu?

² Yehova onnanleela ariki: “Wa muchu oothene, olya, owurya, ni opuha mmitekoni mwaya eri yoovaha ya Muluku.” (Eklesiyaste 3:13) Yehova onipatunxe wi nchuneke olapa. Nave owo onachuna wi nihakaleleke ni yeeyo nnapakaahu.—Mwaalakhanye Eklesiyaste 2:24; 5:18.

³ Vano, tiheeni eni enikhaviherye osiveliwa ni muteko ahu? Muteko wa mukhalelo taani Akristu anaphwanelaaya osepa? Nni niwerye hai ohaakanyerya muteko ahu vamoha ni omulapa wahu Yehova? Nave tuuvi ori muteko woochuneya nnaphwanelaahu ophara?

4, 5. Yehova onoona hai muteko?

⁴ Yehova onnatepa osiveliwa olapa. Maphatxuwelo 1:1 onaloca wi: “Woopaceryani, Muluku aapatusha erimu ni elapo ya vathi.” Amanle opatuxa elapo vamoha ni ichu  soothene iri mwemmo, owo aaloca wi soothene “saatepa okhala phaama.” (Maphatxuwelo 11:31) Mpatuxa ahu aatepa ohakalala ni yeeyo aapankeiye.—1 Timóteo 1:11.

⁵ Yehova hantonko ohiya olapa. Yesu aaloca: “Atiithi aka anamulapa ophiyerya olelo.” (Yohani 5:17) Eparipari wi hansuwenle ichu soothene sootikhiniha Yehova onapakeiye, nyenya ninnasuwela ichu savakhaani. Owo onnaathanla achu anahaala olamulela wirimu ni Mwaana awe, Yesu Kristu. (2 Korinto 5:17) Yehova tho nlelo onnaahoolela ni waakhapelela achu. Ntoko yootakiherya, nthowa na muteko woolaleerya oneereya elapo yoothene, achu ancipale annahuserya vooloca sa Yehova ni okhalano ewehereryo ya okhala mparataiso veelaponi yavathi okhala wookhala.—Yohani 6:44; Aroma 6:23.

6, 7. Yesu aari namalapa a mukhalelo taani?

⁶ Hiiha ntoko Atiithi awe, Yesu tho onnasiveliwa olapa. Ahaakumve orwa veelaponi yavathi, Yesu aari “kapara . . . ooteka” a Muluku, nave aakhaviherya mu opatuxiwa wa ichu soothene sa wirimu ni veelaponi yavathi. (Masiposipo 8:22-31; Kolosi 1:15-17) Ari veelaponi yavathi, Yesu aatitelela olapa moowetha. Ari mmiravo ene, owo aahuserya muteko wa okarpintero, nave akhweya aateka ipa ni ichu ntoko meesa, ikatera ni ichu ikina. Yesu aanaphara phaama muteko awe ophiyerya wi asuweliwa ntoko “kapara a miri.”—Marko 6:3.

⁷ Nyenya muteko waari woochuneyaxa wa Yesu veelaponi yavathi, waari olaleerya michaka yaphaama ni waahusiha achu vooloca sa Yehova. Owo aarino pahi iyaakha raru ni emeya wi aakhwanihe muteko awe. Variyari va iyaakha seiha, owo aanalapa moowetha, apaceryaka wooxixelo ene ophiyerya ohiyu. (Luka 21:37, 38; Yohani 3:2) Owo aheeca macikhwi macikhweene a mastatiya mu iphiro seiho  saasaren’ye nchupi, alaleeryaka michaka yaphaama wa achu oothene.—Luka 8:1.

8, 9. Nnasuwela hai wi Yesu aanatepa osiveliwa ni muteko awe?

⁸ Wa Yesu, opaka yookhwela ya Muluku yaari ntoko yoolya. Muteko yoola waanamvaha ikuru. Ophiyerya wi ikwaha ikina, Yesu aanalapa mwakuru nave ahinakhalano elukuluku wi alye. (Yohani 4:31-38) Owo aanapharihela ikari soothene wi aakhaviherye akina ohuserya vooloca sa Atiithi awe. Ni mathowa oophwanelela owo aaloca wa Yehova: “Miyo kihoocicimihaani veelaponi ya vathi, muteko yoowo mwaakinnyerenryaanyu wi kiphare, kookhwaaniherya.”—Yohani 17:4.

⁹ Chiryene ti yawooneya wi Yehova vamoha ni Yesu anamalapa oowetha nave annatepa ohakalala ni muteko aya. Nnaphwanela ‘omutakiheryaka Muluku,’ vamoha ni ‘ocharihaka ephiro’ ya Yesu. (Éfeso 5:1; 1 Pedro 2:21) Ti nthowa nene nnalapaahu moowetha ni wiilipixerya mu soothene nnapakaahu.

10, 11. Tiheeni enahaala onikhaviherya okhalano moonelo waphaama vooloca sa muteko ahu?

¹⁰ Ntoko achu a Yehova, ninnalapa moowetha wi niivakulele ni ovakulela echoko ahu. Ninnachuna ohakalala ni muteko ahu, nyenya eyo enanwerya okhala yoovila. Mwawiihiiha, wakhala wi hinnasiveliwa ni muteko ahu, tiheeni nnaphwanelaahu weera?

¹¹ Mukhaleno moonelo waphaama. Akhweya hinnawerya otoroka muteko naari nipuro nnalapaahuwo, nyenya nnawerya otoroka moonelo ahu. Wiiwexexa yeeyo Yehova onaweheryeiye wa hiyaano enanwerya onikhaviherya. Ntoko yootakiherya, Yehova onaweherya wi ahooleli a echoko yiilipixeryeke wi ekhwaaniherye soothowa sa  echoko aya. Navetho, Piipiliya onnaloca wi yoole ohinakhapelela echoko awe ‘toonanara ompwaha oohiroromela.’ (1 Timóteo 5:8) Wakhala wi ti nyuwaano munahoolela echoko, munniilipixerya vancipale wi mvakulele echoko anyu. Moohipwacha waakhanle wi munnasiveliwa naari hooye ni muteko anyu, musuwele wi, moorweela wa ovakulela echoko anyu, munnamuhakalaliha Yehova.

12. Olapa moowetha ni okhala moororomeleya onanikhaviherya hai?

¹² Mukhale namalapa oowetha ni oororomeleya. Mweerano yeela, munahaala osiveliwaka ni muteko anyu. (Masiposipo 12:24; 22:29) Echu ekina tho, apatarau anyu anahaala woororomelakaani. Ancipale annaacicimiha anamalapa ororomeleya, woona wi hewiiyerya ikhorowa, ichu soomutekoni naari elukuluku. (Éfeso 4:28) Nave echu yoochuneyaxa, Yehova onnasuwela mwaari namalapa ororomeleya ni oowetha. Nyuwaano munanwerya okhalano “eleela murima” yaphaama woona wi moosuwela wi munnamuhakalaliha Muluku yoowo munamusivelaanyu.—Ahebri 13:18; Kolosi 3:22-24.

13. Echu taani ekina eni yeererya wakhala wi naachu oororomeleya omutekoni?

¹³ Muhicuwale wi meecelo anyu omutekoni ananwerya oruuhela ncicimiho wa Yehova. Nla nthowa nikina nnaneeriha okhala oohakalala omutekoni. (Tito 2:9, 10) Nthowa na yootakiherya ahu yaphaama, anamalapa akhwiihu anahaala ochuna omuhuserya Piipiliya?—Mwaalakhanye Masiposipo 27:11; 1 Pedro 2:12.

14-16. Ephoole taani nnaphwanelaahu okhalano vaavaa nnathanlaahu muteko?

¹⁴ Mpiipiliyani horempwemo miteko Mukristu onaphwaneleiye naari ohinaphwaneleiye weemererya. Nyenya,  aakhalamo malakiheryo yaawo anahaala onikhaviherya opaka soothanla saphaama vooloca sa muteko. (Masiposipo 2:6) Nipharihelaka malakiheryo a Mpiipiliyani nnanwerya wiipakela makoho anacharela:

¹⁵ Mmuteko yoola, kinahaala opakaka ichu seiho Yehova onaloceiye wi ti soonanara? Noohuserya meerelo yaawo Yehova oniiceiye, ntoko wiiya ni wootha. (Mukwaha 20:4; Saweriwa T’arummwa 15:29; Éfeso 4:28; Wupulula 21:8) Mwawiihiiha, ninnakhalano ephoole wi nsepe muteko ori woothene yoowo ohiniiwanana ni malakiheryo a Yehova.—Mwaalakhanye 1 Yohani 5:3.

 ¹⁶ Apwanne muteko yoola onnakhaviherya naari ovuwiha echu yeeyo Yehova oniiceiye? Ntoko yootakiherya, nkaanyiheryani wi munavahiwa muteko wa oteka ekerexa. Tahi yoonanara okhala namateka a ipa. Nyenya noosuwela tiheeni Yehova onuupuweleiye vooloca sa malapelo atheru. Eparipari wi himwaahaala opaka makupa naari ovekela mu ekerexa eyo. Vano apwanne oteka ekerexa tahi echu emohamoha ni okhaviherya echu yeeyo Yehova oniiceiye?—Wupulula 18:4.

17. Tiheeni enahaala onikhaviherya opaka soothanla inamuhakalaliha Muluku?

¹⁷ Moorweela wa opharihela malakiheryo a Mpiipiliyani, nnanwerya okhala achu a mukhalelo yoowo analociwa mu Ahebri 5:14, “yaawo aniikhoveleliha weerano wiili-wiili wi enawerya ohiyaniha yaphaama ni yoonanara.” Mwiikohe: Apwanne achu akina anahaala okwaculeya wakhala wi koheemererya muteko yoola? Apwanne muteko ola onnakeeriha ohiya emusi aka ni othaamela elapo ekina? Othaama wuuwu oni waavolowele hai?

18. Ntakhara heeni onahaalaaya okhala woovila omukuha Yehova mu nipuro noopacerya?

¹⁸ Tahi echu yookhweya omukuha Yehova mu nipuro noopacerya variyari va “ilukuluku sa sookacamiha” nnakhalaahu. (2 Timóteo 3:1) Ophwanya muteko ni wiikhalelaru mmuteko yoowo onamukhala echu yoovila. Eparipari wi ti woochuneya okhapelela echoko ahu, nyenya omulapa wahu Yehova onaphwanela okhala mu nipuro noopacerya. Niheemererye wi ichu soomwiilini ikhale soochuneyaxa mu okumi ahu. (1 Timóteo 6:9, 10) Vano, nni niwerye hai “ohiyaniha yeeyo eri yaphaamasha” nave mu elukuluku emohamoha ovakulela echoko ahu?—Filipi 1:10.

19. Ti mwawiihai omuroromela Yehova onanikhaviheryaaya okhala oophimelela vooloca sa muteko?

 ¹⁹ Mmuroromele Yehova ni murima anyu woothene. (Mwaalakhanye Masiposipo 3:5, 6.) Noosuwela phaameene wi Muluku onnasuwela tiheeni enanthowa nave owo onnanipwacha. (Salumu 37:25; 1 Pedro 5:7) Masu awe annanleela: “Muhikhale oosivela ikhorowa, mukhwaaneliweke ni seiho muryaanyuno. Tiwi, mwaneene [Muluku] ooloca, ariki: ‘Nkirwa koohiya, nari woonyanyala mano.’” (Ahebri 13:5) Yehova hanachuna wi nikhaleke awuukhuwaxa vooloca sa mukhalelo nneeraahu nivakulele echoko ahu. Ikwaha sincipale owo ohooniherya wi onanwerya okhwaaniha soothowa sa achu. (Mateu 6:25-32) Moohipwacha mukhalelo ahu vooloca sa muteko, ntitelele ohuserya Masu a Muluku, olaleerya michaka yaphaama, ni ohicompela mithukumano sahu Seekristu.—Mateu 24:14; Ahebri 10:24, 25.

20. Nni ntitelele hai okhweiha okumi ahu?

²⁰ Mweerihe wi miitho anyu ekhale aphaama. (Mwaalakhanye Mateu 6:22, 23.) Ela enataphulela okhweiha okumi ahu wi niwerye omurumeela Yehova mwawaakhwanela. Noosuwela wi tahi yoophwanelela weemererya wi ikhorowa, okumi waphaama naari ikhankoonya sa mutano ikhale soochuneyaxa opwaha onthamwene ahu ni Muluku. Vano tiheeni enahaala onikhaviherya okuha mu nipuro noopacerya ichu soochuneya? Nnaphwanela wiilipixerya wi nihipake ivaale. Wakhala wi mookhalano ivaale, mweerevo echu wi mvukule naari oliva ivaale soothene. Wakhala wi hinaanono ekaasope, nnanwerya oyeleela elukuluku ni ikuru naasyaka ichu soomwiilini ophiyerya nihinakhalano elukuluku ya ovekela, omuhuserya Piipiliya ni olaleerya. Ohiya weemererya wi ichu soomwiilini ivutukanye okumi ahu, nnaphwanela ohakalalaka ni  ichu seiho nryaahuno, ntoko “soolya ni soowara.” (1 Timóteo 6:8) Moohipwacha mukhalelo wa okumi ahu, ti yaphaama wiisaalikhela elukuluku ni elukuluku wi noone waakhanle wi ninnavaha Yehova owetha wahu.

21. Ntakhara heeni nnaphwanelaahu olakelela yeeyo eni ekhale mu nipuro noopacerya mu okumi ahu?

²¹ Mukuhe mu nipuro noopacerya ichu soochuneya. Nnaphwanela opharihela mwamiruku elukuluku ahu, ikuru sahu ni ichu soomwiilini nryaahuno. Wakhala wi hinaanono ephoole, ichu soohichuneya, ntoko ohuserya wa vasulu naari ikhorowa, inahaala omaliha elukuluku ahu. Yesu ooloca: “Mpacerye waavya omwene wa Muluku.”  (Mateu 6:33) Soothanla sahu, sookhovelela, miteko sa nihiku nnihiku ni soolakelela sahu sinnooniherya tiheeni eri mu nipuro noopacerya mu okumi ahu.

22, 23. (1) Ntoko Akristu, tuuvi ori muteko ahu woochuneyaxa? (2) Tiheeni eni yookhaviheryeeni okhala oohakalala ni muteko anyu?

²² Echu yoochuneyaxa nnaphwanelaahu opaka ori omurumeela Yehova. Mukhalelo mmoha wa weerano yeela ori olaleerya michaka yaphaama wa akina. (Mateu 24:14; 28:19, 20) Hiiha ntoko Yesu, nnachuna opaka soothene ophiyerya vaavaa nnaweryelaahuvo mmuteko yoola. Akina annathaamela mapuro yaawo oriwo othowa otokotoko wa alaleeryi a michaka saphaama. Ophiyeryatho wi akina annahuserya elocelo ekina wi ewerye waalaleerya achu analoca elocelo yeeyo. Muloce ni anna yaawo eenreno ichu seiha, nave mwaakohe vooloca sa yeeyo. Awo anahaala wooleelaani wi vano aakhalano okumi woohakalaliha ni wa mphurelo.—Mwaalakhanye Masiposipo 10:22.

²³ Mmahiku ahu yaala, ancipale a hiyo ninnalapa iwora sincipale naari okhalano miteko sincipale wi niweryeke ovakulela soothowa sa echoko ahu. Yehova oosuwela yeela, nave onnatepa othamalela wiilipixerya woothene nnapakaahu wi nikhapelele echoko ahu. Mwawiihiiha hankooni oothene ntitelele omutakiherya Yehova vamoha ni Yesu moorweela wa olapa moowetha, moohipwacha muteko taani nnapharaahu. Nihicuwale wi muteko ahu woochuneyaxa ori omurumeela Yehova nave mukhalelo mmoha wa weerano yeela ori olaleerya michaka saphaama sa Omwene wa Muluku. Weerano yeela enahaala onivaha ohakalala weeparipari.