1-3. (1) Ntakhara heeni maai hanachuna omoona mwanawe ari oonyala? (2) Ntakhara heeni Yehova hanachuna wi achu awe ekhaleke oonyala?

MMWAANYIHERYE maai yoowo onamurehererya mwanawe wi aye osikola. Owo onnavareryela waakhanle wi oorapa naari waakhanle wi yoowara awe yooreheryeya phaama. Eyo ennooniherya wi owo onnathokororya ekumi ya mwanawe nave wi onnampwacha.

² Tiithi ahu, Yehova, hanachuna wi nikhaleke oonyala. (Salumu 18:26) Owo oosuwela wi ohikhala oonyala ti yaphaama  wa hiyo. Nave vaavaa nnakhalaahu a esipanti ni ooreheryeya, ninnamucicimiha yoowo.—Ezekiyeli 36:22; mwaalakhanye 1 Pedro 2:12.

³ Enataphulela eheeni ohikhala oonyala? Nave ntakhara heeni okhala a esipanti ti yaphaama wa hiyaano? Waakhula makoho yaala enahaala onikhaviherya woona waakhanle wi aakhalavo makupa nnaphwanelaahu orehererya.

4, 5. (1) Nthowa taani noochuneya nnaneeriha okhala a esipanti? (2) Soopatuxiwa inanihusiha hai vooloca sa moonelo wa Yehova vooloca sa esipanti?

⁴ Nthowa noochuneya nnaneeriha ohikhala oonyala ti nawi Yehova taweela. (Onamukutxho 11:44, 45) Nave hiyaano nnachuna ‘omutakiherya Muluku.’—Éfeso 5:1.

⁵ Soopatuxiwa sinnanihusiha vancipale vooloca sa moonelo wa Yehova mmwaha yoola. Yehova opatunxe elapo mmukhalelo oneeriha wi echeku ni maahi ikhaleke saphaama. (Yeremiya 10:12) Muupuwele makhalelo oohiyanahiyana elapo enaweryaaya wiirapiha wa ikokhola seiho achu anatannyaaya. Ntoko yootakiherya, Yehova oopatuxa mikropiyu, seiho iri nyuuku mikhaani inawerya wooniwa pahiru ni maakina. Mikropiyu mikina sinnawerya otatuxa ikokhola wi ekhale echu ehinapahula ekumi ya achu. Ela ti yootikhiniha. Ophiyeryatho masiyentista annapharihela mikropiyu wi emalihe onanarihiwa wa elapo mmapuro makina.—Aroma 1:20.

6, 7. Malamulo a Yehova anooniherya hai wi akapuro a Muluku anaphwanela okhala a esipanti?

⁶ Echu ekina enooniherya ochuneya wa esipanti nri nlamulo Yehova aavanheiye Aisarayeli orweela wa Mose. Ntoko yootakiherya, achu yaaphwanela okhala aweeliheya wi  Yehova eemererye malapelo aya. Nihiku na oleveleliwa soocheka, mulipa eephepa aaphwanela orapa ikwaha piili. (Onamukutxho 16:4, 23, 24) Nave alipa eephepa akina ehaakumve ophara muteko, awo tho yaaphwanela onawa ni orapiha manaani. (Mukwaha 30:17-21; 2 Matharihelo 4:6) Vakina vaya, yoole akhooca wiiwelela malamulo yaala, aniiphiwa.—Onamukutxho 15:31; Namarepela 19:17-20.

⁷ Malamulo yaala Yehova aavelenleiye wa nloko na Aisarayeli annanihusiha vancipale vooloca sa yoowo. (Malakiya 3:6) Awo annooniherya wi achu a Muluku yaaphwanela okhala a esipanti. Hanka vooloca sa olelo? Yehova hatoroken’ye. Olelo tho, owo onachuna wi akapuro awe ekhaleke a esipanti ni ooreheryeya.—Tiyako 1:27.

8. Mmoonelo wa Yehova, okhala aweela onavolowela eheeni?

⁸ Mmoonelo wa Yehova, okhala aweela naari esipanti onavolowela ichu sincipale ohiya pahiru orapa, oreherya empa ahu ni ochapa ikuwo sahu. Onavolowela ekumi ahu yoothene. Malapelo ahu, meerelo ahu vamoha ni mawuupuwelo ahu anaphwanela okhala aphaama. Vano hankooni nthokororye makupa yaala.

9, 10. Tiheeni nnaphwanelaahu weera wi malapelo ahu ekhale aweela?

⁹ Malapelo aweela. Hannaphwanela ovolowela malapelo atheru mmikhalelo soothene. Elukuluku ekina, Aisarayeli yaakhala akapuro mu epooma yo Papulu. Epooma yeele, awo yakhala vamoha ni achu yaawo yaalapa amuluku atheru vamoha ni ovuwiha ocapaheya. Mwawiihiiha, mulipa a miririmu Isaiya aaloherya wi Aisarayeli yaahaala okookela elapo aya nave wi yaahaala okookela omulapa Yehova. Yehova aaloca wa yaawo: “Vinyani, vinyani! Mukhumemo! Muhiphareru echu yoothanyeya.” Malapelo aya  hiyaaphwanela ovolowela meerelo, sookhovelela naari mihapo sa malapelo atheru o Papulu.—Isaiya 52:11.

¹⁰ Akristu eeparipari annasepa tho malapelo atheru. (Mwaalakhanye 1 Korinto 10:21.) Mmapuro oothene a elapo, sinnaphwanyeya sookhovelela, mihapo, naari mahusiheryo a malapelo atheru. Ntoko yootakiherya, mu ilapo sincipale, achu anneemererya wi yookhalavo echu enatitelela okhala ekumi naamwi muchu akhwile. Sookhovelela sincipale sinathipeleya mu mahusiheryo yaala atheru, ntoko opariha iveela wa alipa ookhwa. (Eklesiyaste 9:5, 6, 10) Akristu anaphwanela okhala ocai wa ichu seiha. Akhweya mmusi ahu onanwerya onikhinyererya opaka makupa mu sookhovelela seiha. Nyenya nnachuna omwiiwelela Yehova ni okhala aweela vamiithoni vawe.—Saweriwa T’arummwa 5:29.

11. Tiheeni nnaphwanelaahu weera wi Yehova anooneke okhala aweela mmeecelo?

¹¹ Meecelo aweela. Wi Yehova anooneke okhala achu aweela, nnaphwanela okhala ocai wa makhalelo oothene a ocapaheya. (Mwaalakhanye Éfeso 5:5.) Yehova onnanleela ariki: “Chawani mararuwo!” Owo ooloca mookwakwaleya wi yaawo ari acapaheya nave ehinacharuwa “hewerya waakhela omwene wa Muluku.”—1 Korinto 6:9, 10, 18; moone Yooleeliherya 22.

12, 13. Ntakhara heeni nnaphwanela okhala aweela mmuupuwelo ahu?

¹² Weela mmuupuweloni. Muupuwelo onnaneeriha weera ichu. (Mateu 5:28; 15:18, 19) Okhalano muupuwelo waweela onahaala oneeriha weera ichu mmukhalelo waweela. Eparipari wi naachu ohiphaameya, ti nthowa nene ikwaha ikina nnakhalaahuno muupuwelo wooheseya. Vaavaa enereyaaya yeela, nnaphwanela wuupuwela echu ekina. Naaheerano hiiha, murima ahu hokhala waweela.  Nnahaala weerano ichu soonanara nnuupuwelaahu. Mwawiihiiha, nnaphwanela osareiha muupuwelo ahu ni ichu saphaama. (Mwaalakhanye Filipi 4:8.) Ninnasepa othata ni ichu seiho sinavuwiha ocapaheya naari nlala. Ninnathanlela phaama yeeyo nnaalakhanyaahu, woona, naari oloca.—Salumu 19:8, 9.

¹³ Naachunaka otitelela omusivela Muluku, nnaphwanela okhala aweela mmalapelo, mmeecelo ni mmuupuwelo ahu. Nave tho ti woochuneya wa Yehova wi nikhaleleke esipanti mwiili ahu, yoowara ahu ni empa ahu.

14. Ntakhara heeni ti woochuneya okhapelela mwiili vamoha ni voorukurerya vahu?

¹⁴ Vaavaa nnakhapelelaahu mwiili ahu vamoha ni voorukurerya vahu, eyo ennanikhaviherya nave tho ennaakhaviherya akina. Nnahaala okhalaka ootaphuwa, nave akina anahaala osiveliwaka okhala ni hiyaano. Nyenya nookhalavo nthowa nikina noochuneya. Vaavaa nnakhalaahu a esipanti, ninnamucicimiha Yehova. Muupuwele ela: Wakhala wi munnamoona mwaana onakhala ooxuxaara elukuluku yoothene, himwaahaala owoonaka phaama asitiithi awe. Moolikana, waakhala wi naachu oonyala, achu anahaala omulocaka Yehova moonanara. Paulo aaloca: “Hiyo hinneerano echu yoomukwaculihano muchu, wi muteko ahu ohivaanyiwe. Ohiya yeeyo, ninniiseemererya mu soothesene ntoko anamuteko a Muluku.”—2 Korinto 6:3, 4.

15, 16. Nni niwerye hai okhalela esipanti mwiili ahu ni soowara sahu?

¹⁵ Mwiili ahu ni soowara. Nnaphwanela okhala a esipanti nihiku nnihiku. Ntoko yootakiherya, noosuwela wi nnaphwanela orapaka mahiku oothene. Onawa ni sapawu  nihaakumve olya naari orehererya soolya, nave tho nimanle okhuma otumpusi naari woola ikokhola echu yaphaama. Onawa onakhala ntoko echu ekhaani, nyenya ti yoochuneya wi nihimwaramwaxe ireca. Onawa onnavuluxa ikumi. Hanka wakhala wi vaate vahu hinaano etumpusi? Mmukhalelo yoola, onamukhala waphaama ochariha meerelo a Aisarayeli. Awo tho hiyaarino itumpusi, awo yaanaya ocai wa empa aya ni wa ehime, nave weiwo yaanakacela mari aya.—Malamulo 23:12, 13.

¹⁶ Nihinlele wi soowara sahu sikhale soowalamela, sooreeraxa ni samutano. Nyenya echu eri yoochuneya ori okhalela esipanti ni orehererya phaama. (Mwaalakhanye 1 Timóteo 2:9, 10.) Elukuluku yoothene nnachuna wi soowara ni mawarelo ahu emucicimiheke Yehova.—Tito 2:10.

17. Ntakhara heeni ninnarehererya empa ahu ni voorukurerya vahu?

 ¹⁷ Empa ahu ni voorukurerya vahu. Moohipwacha nipuro nnakhalaahuwo, empa ahu enaphwanela okhala yooreheryeya. Nave tho wakhala wi nookhalano yoowela ntoko (ekaaro, moota, naari ecika) nnaphwanela okhalela esipanti, xaxaxa wakhala wi ninnayano mmithukumano naari muteko woolaleerya. Nthowa nawi, naalaleeryaka ninnaloca ni achu vooloca sa Parataiso veelaponi yavathi wi nnahaala okhala nipuro naphaama ni nooreera. (Luka 23:43; Wupulula 11:18) Wakhala wi ninnarehererya empa ahu ni voorukurerya vahu ninnooniherya wi ninniirehererya wi nikhale mu elapo esyaani.

18. Ntakhara heeni nnachunaahu wi nipuro nahu na malapelo nikhale naphaama?

¹⁸ Nipuro nahu na omulapela Yehova. Ninnooniherya wi esipanti ti yoochuneya wa hiyaano vaavaa nnarehereryaahu nipuro nahu na mithukumano sa muloko, mithukumano sa ekulucu ni sa muceche. Vaava achu anavolowaaya mu Empa ya Omwene mu ekwaha yoopacerya, awo annoona wi wooreeramo. Eyo ennamucicimiha Yehova. Oothene hiyo nookhalano ekari ya opaka makupa mu orehererya ni ovela mu Empa ahu ya Omwene.—2 Matharihelo 34:10.

19. Sookhovelela taani nnaphwanelaahu osepa?

¹⁹ Piipiliya hanaloca sookhovelela soothene sooriipiheya seiho nnaphwanelaahu osepa. Nyenya owo onnanivaha malakiheryo yaawo ananikhaviherya osuwela moonelo wa Yehova. Ntoko yootakiherya, noosuwela wi Yehova hanachuna wi nihapaliweke, omulya soona, naari olya mirece. Wakhala wi na asinthamwene a Muluku, nnahaala osepa ichu seiha. Ntakhara heeni? Ntakhara  ninnacicimiha okumi. Sookhovelela iho sinnananariha ekumi nave tho sinnaapahula achu anakhala ni hiyaano. Achu ancipale anneererya ocharuwa sookhovelela seiha wi ekhale akumi. Nyenya hiyaano ntoko asinthamwene a Yehova, nookhalano mathowa aphaama a ohiya—nthowa na omusivela wahu Muluku. Namwali mmoha aaloca: “Nnikhaviheryo na Yehova kaawerya ocharuwa sookhovelela saka soonanara. . . . Kinoona wi waahaala okhala woovila opaka matorokelo yaala mukhataaka.” Hankooni nthokororye malakiheryo mathanu yaawo anahaala onikhaviherya ocharuwa sookhovelela sawoopiha.

20, 21. Sookhovelela sa mukhalelo taani Yehova onachuneiye wi ncharuwe?

²⁰ “Oosiveliwa, nroromelihiwaahu hiiha, hankoni niivase wa soothanyeya soothene sa mwiili ni sa munepa, naakhwanihaka weelihiwa wahu nimoovaka Muluku.” (2 Korinto 7:1) Yehova onachuna wi nikhale ocai wa sookhovelela soothene soonanara, nthowa nawi sinnananariha muupuwelo ni mwiili ahu.

²¹ Wakhala wi noocharuwa sookhovelela seiha, Yehova onnaroromeliha ariki: “Kinamuwaakhelaani. Kinarwa kikhala tiithinyu, nave nyuwo munarwa mukhala anaaka aasilopwana ni aasithiyana.” (2 Korinto 6:17, 18) Nave tho Yehova onnanlopola ariki: “Muhiphareru echu yoothanyeya.” Wakhala wi noocharuwa, Yehova onahaala onisivela hiiha ntoko tiithi onaasiveleiye anamwane awe. Hamunoona wi nla nthowa ntokotoko nnaphwanela oneeriha ocharuwa yookhovelela pure eri yooriipiheya vamiithoni va Muluku?

22-25. Malakiheryo taani a Mpiipiliyani anahaala onikhaviherya osepa sookhovelela soonanara?

²² “Waakhweleke Apwiya Muluku aa ni murima aa woothene, ni okumi aa woothene ni miruku aa  yoothene.” (Mateu 22:37) Nla nlamulo noochuneyaxa. (Mateu 22:38) Yehova onnaphwanela wi nimusiveleke ni murima ahu woothene. Vano nni nooniherye hai wi ninnamusivela Muluku ni murima woothene wakhala wi ninnapaka ichu seiho inakhuveiha okumi ahu naari opahula ocoopare ahu? Moohiyana, ninnapaka soothene nnaweryaahu wi nooniherye ncicimiho wa okumi yoowo onivanheiye.

²³ “[Yehova] tonavaha wa oothene okumi, nwiya ni soothesene.” (Saweriwa T’arummwa 17:24, 25) Wakhala wi nthamwene anyu ohoovahaani yamahala, apwanne munahaala oriha naari onyaanya? Hooye. Okumi tho yamahala enarweela wa Yehova. Nnaphwanela wooniherya othamalela wahu wa yamahala yeela. Mwawiihiiha, nnachuna opharihela okumi ahu mmukhalelo yoowo onahaala oruuhela ncicimiho wa Yehova.—Salumu 36:9.

²⁴ “Omukhweleke mukhwa aa ntoko onikhwelaa weyo mwaneene.” (Mateu 22:39) Sookhovelela soonanara hasinapahula pahi okumi ahu. Sookhovelela iho inanwerya tho opahula okumi wa achu akina, yaale nnaasivelaahu vancipale. Ntoko yootakiherya, muchu onakhala vamoha ni muchu oomulya soona onanwerya okhalano makacamiho mu okumi moorweela wa mwiixi yoole muchu ole mukina onakumihereiye vaate. Nyenya wakhala wi noocharuwa sookhovelela soonanara, nnooniherya wi ninnaasivela achu akina.—1 Yohani 4:20, 21.

²⁵ “Owupusherye anna oothene wi yaacicimiheke ni owiiwelela alipa oolamula ni mamwene.” (Tito 3:1) Mu ilapo sincipale sinnawatiihiwa okhalano naari olya mirece. Hiyaano ninniiwelela malamulo yaala woona wi Yehova onnaloca wi niwiiweleleke alamuleli.—Aroma13:1.

26. (1) Tiheeni nnaphwanelaahu weera wi nikhale asinthamwene a Yehova? (2) Ntakhara heeni okhala aweeliheya vamiithoni va Muluku ti yaphaama?

 ²⁶ Wakhala wi ninnachuna okhala asinthamwene a Yehova, akhweya nnahaala woona wi ti woochuneya opaka matorokelo. Wakhala wi ti hiiha, nnaphwanela weerano mwawaakuveya. Tahi wookhweya ohiya sookhovelela soonanara, nyenya ti wooweryeya! Yehova onnalaiherya onikhaviherya. Owo onnaloca: “Miyo ka Apwiya, Muluku aa, yoowo onoohusiha ichu sa mphurelo, onoohoola mmeecelo anoophwanelela.” (Isaiya 48:17) Wakhala wi ninniilipixerya weera soothene nnawarelaahu wi nikhale aweeliheya ni ooreera murima vamiithoni va Muluku, nnahaala oruuha ncicimiho wa Muluku ahu.