1, 2. Yoomesano taani Palamu aapharihenleiye wi aahuwelihe Aisarayeli?

MULIPA oomesa ihopa onnamesa nipuro nenlo onasuweleiye wi onahaala ophara ihopa seiho onachuneiye. Owo onnathanla yoomesano ahela va nimeso nave onnavonyerya nimeso nlo mmaahini. Moomaleleya owo onnaweherya wi ehopa enahaala omirya nimeso. Yamala omirya, mulipa oomesa onnaruula nimeso wi aphare ehopa.

² Ela enneereya ni achu. Ntoko yootakiherya, Aisarayeli yaacamelaka ophiya Elapo ya Nlakano, yaaheemela mu elukuluku yavakhaani waacamela elapo yo Mowape. Mwene o Mowape aalaiherya wa mulopwana awiichaniwa Palamu wi ahaala omvaha ikhorowa sincipale waakhanle wi owerya owuulumela Aisarayeli. Woona wi haawenrye weerano eyo, Palamu aahaasya mukhalelo mukina wi Aisarayeli yiisuulumele mukhataaya. Owo ahaapharihela athiyana o Mowape ntoko yoomesano. Awo yaanaya mmixakala sa Aisarayeli wi yaalekeche alopwana.—Namarepela 22:1-7; 31:15, 16; Wupulula 2:14.

3. Tiivi yaari yookhumelela ya yoolakelela ya Palamu?

³ Apwanne yoolakelela ya Palamu yaahaakhwanela? Aai. Macikhwi macikhweene Aisarayeli “yaapacerya oraruwa  ni athiyana oMowaape.” Awo tho yaapacerya waalapa amuluku atheru, ophitaanyerya Pala o Peyore, muluku a acapaheya. Ntoko yookhumelela, Aisarayeli awaakhwana 24 miili yaahikhwa ehalaka vakhaani ovolowa Elapo ya Nlakano.—Namarepela 25:1-9.

4. Ntakhara heeni Aisarayeli ancipale yaacheka?

⁴ Ntakhara heeni Aisarayeli oothene ala yaacheka? Yaacheka nthowa nawi yuupuwelela pahiru soochuna saya nave yaacuwala soothene Yehova aaweerenleiye. Aisarayeli yaakhalano mathowa oophwanelela wi ekhale oororomeleya wa Muluku. Ni mahala a Yehova awo yaahiya okhala akapuro Oyikuputu, hiyaakhwile etala mutakhwani, nave yaahanle vakhaani ovolowa mu Elapo ya Nlakano. (Ahebri 3:12) Naamwi hiiha, awo yaahuwelihiwa ni ocapaheya. Murummwa Paulo oriye: “Nihiraruweke ntokoko akina yenraaya, emora ookhwa ene nihiku nimoha nenlo.”—1 Korinto 10:8.

5, 6. Tiheeni nnahuseryaahu ni yeeyo yeeren’ye wa Aisarayeli?

⁵ Hiiha ntoko Aisarayeli yaahanlaaya vakhaani ovolowa mu Elapo ya Nlakano, hiyaano tho nihanle vakhaani ovolowa mu elapo esyaani. (1 Korinto 10:11) Olelo, ocapaheya ti wawunlaana opwaha elukuluku yeele. Ela enanwerya waavolowela alapeli a Yehova. Chiryene, ocapaheya yoomesano yeeyo Musaserya onaphariheleiye vancipale wi aachekihe achu.—Namarepela 25:6, 14; 2 Korinto 2:11; Yuda 4.

⁶ Mwiikohe: ‘Apwanne ti yamiruku otoroka okumi woohimala mu elapo esyaani ni opuha wa elukuluku yavakhaani?’ Hooye! Ti yamiruku wiiwelela olopola wa Yehova: “Chawani mararuwo.” Nyuwaano hamuneemererya?—1 Korinto 6:18.

7, 8. Ocapaheya tiheeni? Nave ntakhara heeni oryaaya mwaha mutokweene?

⁷ Ancipale olelo hanacicimiha malamulo a Muluku vooloca sa okonihana. Mpiipiliyani, ocapaheya onaahiwa ophitaana wa mulopwana ni muthiyana ehirepinhe othela. Nave tho ennavolowela okonihana wa achu a mwiikho woolikana, ni okonihana wa achu ni asinama. Vano okonihana woohiphwanelela tiheeni? Onaahiwa okonihana mmakupa oohiphwanelela ntoko mwaano, waanthumu, naari waapapela mwiikho wa muchu ohiri oothelana ahu.—Moone Yooleeliherya 23.

⁸ Piipiliya onnaloca mookwakwaleya wi, muchu yoole ohinahiya ocapaheya, onaphwanela wiikariwa mmulokoni. (1 Korinto 6:9; Wupulula 22:15) Yoowo onacapaheya haniicicimiha nave tho hanaroromeliwa ni akina. Ohiya yeeyoru, ocapaheya onnaruuha makacamiho, ntoko okhalano yawuupuxerya-ya-murima yoolimela, orupala moohilakelela, makacamiho va echoko, masooso, nave ophiyerya okhwa. (Mwaalakhanye Galasya 6:7, 8.) Wakhala wi muchu ohuupuwelela makacamiho anakhumelela nthowa na ocapaheya, hani eererye ocapaheya. Vano tiheeni enamweeriha muchu wuupuwelelaka pahiru soochuna sawe ophiyerya wuuwela mu ocapaheya? Echu yoopacerya ori woona epwitikiri.

9. Ntakhara heeni woona epwitikiri eryaaya yawoopiha?

⁹ Woona epwitikiri ennamweeriha muchu okhalano nchuno na opaka sa mwiikho. Olelo, epwitikiri eri voothevene—mu arevista, aliivuru, mmacipo, aprokrama a TV ni mu interneti. Achu ancipale anoona wi epwitikiri tahi echu yawoopiha, nyenya mweeparipari ti yawoopihaxa.  Woona epwitikiri, ennamweeriha muchu okhalano nchuno noopwahererya na opaka sa mwiikho. Woona epwitikiri tho enanwerya omweeriha muchu okhalano nchuno na oceha. Enanwerya tho oruuha makacamiho mu othela ophiyerya omwalana.—Aroma 1:24-27; Éfeso 4:19; moone Yooleeliherya 24.

10. Ti mwawiihai Tiyako 1:14, 15 onahaaleiye onikhaviherya osepa ocapaheya?

¹⁰ Ti yaphaama wiiwexexa tiheeni enamweeriha muchu ovolowela ocapaheya. Moone olopola onaphwanyeya mu Tiyako 1:14, 15: “Muchu ni muchu, oneereriwa ni yeeyo enamureerela mminkhela awe, enamulekechaaya, ennamuwooka. Hiihaa minkhela seekeya sinnayara ocheka, nave ocheka wunnuwale, onayara okhwa.” Mwawiihiiha, wakhala wi ninnuupuwela ichu soonanara, mwawaakuveya nnaphwanela otoroka muupuwelo ahu! Nave wakhala wi mootutuxa yookhumelela eruku ohoolo wanyu yeeyo enatannya nchuno na ocapaheya, nwehe okhwipi! Munwale komputatore anyu naari mutoroke ekanaale. Muheemererye wi soochuna soonanara ivolowe mmurimani mwanyu. Mwaheerano, inahaala wunnuwa nave onahaala okhala woovila ovareryela.—Mwaalakhanye Mateu 5:29, 30.

11. Wakhala wi ninnuupuwela ichu soonanara, Yehova onahaala onikhaviherya hai?

¹¹ Haavo onisuwenle phaama omuhiya Yehova. Owo oosuwela wi naachu oohiphaameya. Nave tho oosuwela wi nnanwerya ovootha soochuna soonanara. Yehova onnanleela: “Hiihaa, mwiiphe makhalelo a omuchu anyu veelaponi ya vathi: mararuwo, sootakhala, minkhela, soochunachuna soonanara, ni nrima, nenlo ori waalapa amuluku atheru.” (Kolosi 3:5) Naamwi ohiri wookhweya,  Yehova toopisa murima nave onahaala onikhaviherya. (Salumu 68:19) Moone yootakiherya ya mmiravo yoowo uwenle mmuraakhoni wa woona epwitikiri ni oceha. Asinthamwene oosikola yaanaloca wi yaari echu yaphaama weerano eyo, nyenya owo oriye: “Eyo yaananariha yawuupuxerya-ya-murima aka ophiyerya kahuuwela mmuraakho wa ocapaheya.” Owo aahoona wi aanaphwanela ovareryela soochuna sawe, nave nnikhaviheryo na Yehova owo aawerya ohiya soochuna seiha soonanara. Vaavaa munapaceryaanyu wuupuwela ichu soonanara, mvekele wa Yehova nave mumveke “owerya wene woopwaha” wi mukhaleno muupuwelo waphaama.—2 Korinto 4:7; 1 Korinto 9:27.

12. Ntakhara heeni ti woochuneya ‘okhapelela murima ahu?’

¹² Solomoni oorepa: “Vopwahasha, okhapelele murima aa; tiwi mwa yoowo tonaphacuwavo anaacuucu a  okumi.” (Masiposipo 4:23) “Murima” enaahiwa omuchu ahu, yoowo Yehova onooneiye. Nnaphwanela okhapelela murima ahu ntakhara onnavoloweliwa ni ichu seiho nnoonaahu. Ti nthowa nene naamweerinhe Yupu oloca: “Kaapaka waataana ni miitho aka, wi kihimuwehe ni omuchuna mwali.” (Yobi 31:1) Hiiha ntoko Yupu, nnaphwanela ovareryela yeeyo nnoonaahu ni yeeyo nnuupuwelaahu. Nnachuna ovekela hiiha ntoko mulipa oomurepa Salumu: “Mukuphihe miitho aka wi kihooneke ichu satheru.”—Salumu 119:37.

13. Asinthamwene a mukhalelo taani Tina aareiyeno?

¹³ Asinthamwene ahu ananwerya onivolowela mmukhalelo woonanara naari waphaama. Wakhala wi munnaathanla asinthamwene yaawo anasivela malamulo a Muluku, awo anahaala wookhaviheryaani weerano emohamoha. (Masiposipo 13:20; mwaalakhanye 1 Korinto 15:33.) Ninnawerya woona ochuneya waya waathanla asinthamwene aphaama moorweela wa othokororya yeeyo yeeren’ye ni Tina. Owo aari mwaana a Yakopo, mwawiihiiha unnunwe veechokoni yaamulapa Yehova. Tina haari capaheya, nyenya aapaka onthamwene ni asimwali o Kanani yaawo yahaamurumeela Yehova. Akanani yaakhalano moonelo woohiyana vooloca sa okonihana nave achu oothene ophitaanyerya achu a Yehova yaanasuwela wi Akanani yaari acapaheya. (Onamukutxho 18:6-25) Moorweela wa asinthamwene awe, Tina aamusuwela Sikemi, yoowo aamonne Tina oreera. Sikemi “aari oocicimiheya” wa amiravo oothene va emusi awe. Nyenya owo haamusivela Yehova.—Maphatxuwelo 34:18, 19.

14. Tiheeni yeeren’ye ni Tina?

 ¹⁴ Sikemi aheera yeeyo aakhovelenleiye nave yaari yaweemereryeya wa yoowo. Woona wi aamuchuna Tina, owo “amphara, akonano.” (Mwaalakhanye Maphatxuwelo 34:1-4.) Yaweereya ela yaaheeriha wi ekhumelele makacamiho, ohiya pahiru wa Tina, nave tho wa echoko yoothene.—Maphatxuwelo 34:7, 25-31; Galasya 6:7, 8.

15, 16. Nni niwerye hai okhala a miruku?

¹⁵ Tahi woochuneya ohesa ntoko Tina wi niiwexexe wi malakiheryo a Yehova ennanikhaliha phaama. Piipiliya oni: “Oneeca ni achu a miruku, owo tho tamiruku, ntoko nthamwene a alolo, yoonanara ennamphacuwela.” (Masiposipo 13:20) Mukhale oolakelela ompharihela Piipiliya wi mwiiwexexe “meecelo oothene aphaama,” nave munahaala osepa makacamiho mancipale.—Masiposipo 2:6-9; Salumu 1:1-3.

¹⁶ Nnanwerya okhala amiruku moorweela wa omuhuserya Piipiliya, ovekela wa Yehova nihaakumve opaka yoolakelela eri yoothene ni ochariha malakiheryo a namuteko oororomeleya. (Mateu 24:45; Tiyako 1:5) Noosuwela wi naachu ookotakota ni oohiphaameya. (Yeremiya 17:9) Nyenya tiheeni mwaahaalaanyu weera wakhala wi muchu ohoolopolaani wa yawoopiha ya ocapaheya? Apwanne mwaahaala onanariwa, naari mwaahaala weemererya nikhaviheryo nawe?—2 Mamwene 22:18, 19.

17. Mvahe yootakiherya enooniherya ti mwawiihai miruku sa Mukristu mukhwiihu inaweryaaya onikhaviherya.

¹⁷ Mwaanyiherye ela: Omutekoni wa murokora, mulopwana mmoha onnapacerya omuthokororya vancipale nave onnanwopa wi ekhume vamoha. Mulopwana owo tahi namoona a Yehova, nyenya onakhala wi muchu aphaama. Voocharela murokora mukina onnawoona yeecaka  vamoha nave onneererya omukhaviherya murokora ole woona yawoopiha ya weeca vamoha ni mulopwana ole. Akhweya murokora ole onahaala wiikuphelela, naari akhweya onahaala woona mphurelo wa miruku iho. Murokora owo onnaloca wi onnamusivela Yehova nave onachuna opaka ichu saphaama. Nto, wakhala wi ootitelela weeca ni mulopwana ole, apwanne onahaala ‘ochawa oraruwa’ naari wi ‘onamwiiroromela’?—Masiposipo 22:3; 28:26; Mateu 6:13; 26:41.

18, 19. Yosefe aawenrye hai ochawa ocapaheya?

¹⁸ Vaavaa aareiye mmiravo, Yosefe aari kapuro o Yikuputu nave aanamulapa mulopwana awiichaniwa Potifare. Nihiku ti nihiku, mwaara a Potifare aanamukhinyererya  Yosefe wi akone ni yoowo, nyenya owo aasuwela wi ti yoonanara. Yosefe aari kapuro, vanthowa na yeeyo owo haaphwanela woona opwahavo vaate va Potifare. Nyenya Yosefe anamusivela Yehova nave aachuna omuhakalaliha. Mwawiihiiha, vaavaa mwaara a pwiya awe aamukhinyereryeiye, owo aanakhooca. Nave vaavaa Yosefe aaphariweiye ni mwaara a Potifare, owo aachawa, akhumela vaate.—Mwaalakhanye Maphatxuwelo 39:7-12.

¹⁹ Waakhanle wi Yosefe aanuupuwela sa mwiikho naari waanyiherya akonaka ni mwaara a Potifare, waahaala okhala woovila okhala oororomeleya wa Yehova. Nto wa Yosefe, onthamwene awe ni Yehova waari woochuneyaxa opwaha echu eri yoothene. Owo aahi wa mwaara a pwiya awe: “Soothesene kinalamulela woohiyaani nyuwo, muri mwaaraya. Kini kiwerya hai weera echu yoonanarasha yawihiihaa, wi kimuchekele Muluku?”—Maphatxuwelo 39:8, 9.

20. Nnasuwela hai wi Yosefe aamuhakalaliha Yehova?

²⁰ Naamwi Yosefe aari ocai ni emusi awe, owo aatitelela okhala oororomeleya wa Yehova, nave aareelihiwa. (Maphatxuwelo 41:39-49) Yehova aatepa ohakalala ni ororomeleya wa Yosefe. (Masiposipo 27:11) Eparipari wi onamukhala woovila ochawa ocapaheya. Nto muhicuwale ela: “Apwiya anaakhwela yaawo aniicanano yoonanara, enakhapelela okumi wa oosiveliwa aya, enawaakiha mmatatani wa aweera soonanara.”—Salumu 97:10.

21. Ti mwawiihai mmiravo mmoha aamutakihenryeiye Yosefe?

²¹ Nihiku ti nihiku, achu a Yehova anniilipixerya okhala oolipa murima. Awo annooniherya wi ‘annahiya soonanara’ nave ‘annachuna yaphaama.’ (Amosi 5:15) Nyuwaano munanwerya okhala oororomeleya wa Yehova  moohipwacha iyaakha muryaanyuno. Hankooni nthokororye yeeyo yeeren’ye osikola ni mmiravo mmoha yoowo ori namoona a Yehova. Namwali mmoha aaloca wa mmiravo owo wi wakhala wi oomukhaviherya mu eporova ya matematika, aahaala weema okona ni yoowo. Tiheeni mmiravo owo enreiye? Aamutakiherya Yosefe. Owo ooloca: “Mwawaakuveya kaakhooca yoovaha. Nthowa na okhala waka oororomeleya wa Yehova, kookhalano yawuupuxerya-ya-murima yaphaama, nave kiri oohakalala.” Ocapaheya onanwerya oruuha “opuha wovira” nyenya ohoolo waya onnaruuha makacamiho mancipale ni ohooxeya. (Ahebri 11:25, Bibiliya Nsu na Muluku) Nyenya, omwiiwelela Yehova onnaruuha ohakalala woohimala.—Masiposipo 10:22.

22, 23. Wakhala wi noocheka, Yehova onahaala onikhaviherya hai?

²² Satana onahaala weererya opharihela ocapaheya wi nihimwiiwelele Yehova. Ela enamukhala yaweeha etokotoko. Ilukuluku ikina, oothene hiyo nnanwerya okhalano muupuwelo woonanara. (Aroma 7:21-25) Yehova onniiwexexa nave oosuwela “wi hiyo na nchupi.” (Salumu 103:14) Nyenya hanka wakhala wi Mukristu oopaka yoocheka ya ocapaheya? Apwanne hiyaavo ewehereryo? Hooye. Wakhala wi owo oocharuwa mweeparipari, Yehova onahaala omukhaviherya. Muluku ‘taphaama ni oolevelela.’—Salumu 86:5; Tiyako 5:16; mwaalakhanye Masiposipo 28:13.

²³ Yehova tho onnanikhaviherya orweela wa atokweene oosivela, yaawo ari “samahala” wa achu. (Éfeso 4:8, 12; Tiyako 5:14, 15) Awo ananwerya onikhaviherya okookela onthamwene ahu ni Yehova.—Masiposipo 15:32.

24, 25. Olapiha “muru” onataphulela eheeni?

²⁴ Wi nipake soothanla saphaama, nnaphwanela wiiwexexa ti mwawiihai malamulo a Yehova ananikhaviheryaaya. Hinnachuna okhala ntoko mmiravo yoowo onalociwa mu Masiposipo 7:6-23, yoowo “muru” awe wahaalapa, aahuwelihiwa ni muraakho wa ocapaheya. Olapiha muru onnapwaha okhala oosyaka. Olapiha muru onataphulela wiiwexexa muupuwelo wa Muluku ni opharihela mu okumi ahu. Piipiliya oni: “Yoole muru awe onlapa, onnakhwela okumi awe, nave onthokororya osuwelasha, onnaphwanya saphaama.”—Masiposipo 19:8.

²⁵ Nyuwaano muri oolekecheya wi malakiheryo a Yehova taphaama? Munneemererya wi wiiwelela yaawo enahaala oweerihaani okhala oohakalala? (Salumu 19:7-10; Isaiya 48:17, 18) Wakhala wi nyuwaano nivano munnakhwa minikwa, muupuwele ichu soothene saphaama seiho Yehova oweerenleiyeni. Salumu 34:8 oriye: “Nkaalawihani, nave onani wi Apwiya taphaama.” Vaavaa munacharaanyu nlakiheryo nla, omusivela wanyu Yehova onahaala waacereryeya. Musivele yeeyo owo onasiveleiye nave mwiice yeeyo owo oniiceiye. Musareihe muupuwelo anyu ni ichu saphaama—ichu seiho siri seeparipari, sawookololowa, soothamaleya, sookhweleya, soophwanelela, ni saweela. (Filipi 4:8, 9) Nnanwerya okhala ntoko Yosefe, yoowo ahooleliwe ni miruku sa Muluku.—Isaiya 64:8.

26. Tiheeni nnahaalaahu othokororya mu miyaha 10 ni 11?

²⁶ Yehova onachuna wi nipuhe okumi nave nikhale oohakalala, moohipwacha waakhanle wi na atheli naari aciye. Miyaha 10 ni 11 sinahaala onikhaviherya okhalano echoko yoohakalala.