Wa yaale anamusivela Yehova Muluku ni Masu awe, Piipiliya:

Yesu aaloca masu ala: “Munarwa musuwela eparipari nave eparipari eyo enamootaphulaani.” (Yohani 8:32) Nkuupuwelani mukhalelo monnaanyu vaavaa mu ekwaha yoopacerya mwiiwalaanyu eparipari ya Mpiipiliyani! Chiryene yaari echu yootikhiniha osuwela wi naamwi nikhalaka mu elapo esaren’ye ni sawootha, nnanwerya ohuserya eparipari.—2 Timóteo 3:1.

Yehova Muluku onachuna wi nisuwele eparipari. Nave, woona wi ninnaasivela achu, ninnachuna waaleela iparipari seiha. Nyenya omurumeela Muluku onnavolowela ichu sincipale ohiya pahiru waaleela akina iparipari. Nnaphwanela wiilipixerya wi nikhaleke ntoko Akristu woona wi ninnacicimiha malakiheryo a Yehova. Yesu oothariha mukhalelo mmoha woochuneya nnaphwanelaahu opaka wi nooniherye wi ninnamusivela Muluku. Owo ooloca: “Mwanachariha malamulo aka, munamukhala mu osivela waka, ntoko miyo tho kinacharihaaka malamulo a Atiithi aka, kinakhala mu osivela waya.”—Yohani 15:10.

Chiryene Yesu onnaasivela Atiithi awe, nave onneera soothene Atiithi awe anavekaaya wi owo apake. Wakhala wi ninnamutakiherya Yesu mu okumi ahu woothene, Yehova onahaala wooniheryaka osivela wawe wa hiyaano nave nnahaala okhalano ohakalala weeparipari. Hiiha ntoko Yesu olonceiye, “mwasuwela ichu seiya, munachariha, muri ooreeriwa,” ela tiwi, nnahaala okhala achu oohakalala.—Yohani 13:17.

Ninnaweherya wi liivuru ola onahaala wookhaviheryaani ohuserya mukhalelo wa okhala mwawiiwanana ni eparipari enaphwanyeya Mpiipiliyani vamoha ni okhala nthamwene a Muluku. Ninnavekela wi omusivela wanyu Muluku wunnuwe nave mutitelele “mu osivela wa Muluku, muwehereryaka  . . okumi woohimala.”—Yuda 21.