1. Tiheeni muchu ti muchu a hiyo onaphwaneleiye weera, nave ntakhara heeni?

YESU aalonce ariki: “Achu awaalapa Atiithi ni murimeene, yaalapeke yaawo mwa munepa ni mwa eparipari. Tiwi Atiithi anawaavya achu hiiha wi ekhale owaalapa yaawo.” (Yohani 4:23; 6:44) Muchu ti muchu a hiyo onaphwanela ‘ovareryeka yeeyo enaahakalaliha Apwiya.’ (Éfeso 5:10) Ela tahi echu yookhweya. Satana onachuna oniwoka wi neereke ichu seiho inamuthananiha Yehova.—Wupulula 12:9.

2. Muloce yeeyo yeeren’ye ni Aisarayeli waacamela o Mwaako Sinai.

² Satana oneererya hai oniwoka? Mukhalelo mmoha ori onuupuweliha wi yoonanara ti yaphaama nave yaphaama ti yoonanara. Moone yeeyo yeeren’ye ni nloko na Aisarayeli ehalaka vakhaani ophiya va Mwaako Sinai. Mose aawela omwaako nave achu yaahala enweheryaka. Moovira wa elukuluku, awo yaavelavela onweherya nave yaamveka Aroni wi aapakele muluku. Aroni aampaka mwaasaana a emope a ewooro. Voocharela awo yaapaka efesta. Achu yaapacerya wiina emurukureryaka mwaasaana a emope nave yaanamukokhorela. Awo yuupuwela wi, omukokhorela mwaasaana a emope waalikana ni omukokhorela  Yehova. Nyenya nthowa na wuupuwela wi yaari “efesta ya Apwiya” hiyeerinhe eyo okhala yaweemereryeya. Wa Yehova, weerano hiiha waari olapela soophwaniherya, nave ancipale yaakhwa. (Mukwaha 32:1-6, 10, 28) Tiheeni nnahuseryaahu? Ninnahuserya wi nnaphwanela wiikasoopa wi nihiwokiwe. Hannaphwanela ‘ophara echu yoothanyeya,’ ela ti wi, hannaphwanela opaka makupa a malapelo atheru. Neemererye wi Yehova anihusihe yeeyo eri yaphaama ni yoonanara.—Isaiya 52:11; Esekiyeli 44:23; Galasya 5:9.

3, 4. Ntakhara heeni ti woochuneya osuwela mapacereryo a ifesta seiho siri sawunlaana olelo?

³ Vaavaa Yesu aareiye veelaponi ya vathi, owo aahaahusiha arummwa mukhalelo waphaama wa omulapela Yehova. Yesu amanle okhwa, arummwa yaatitelela waahusiha akina emohamoha. Nyenya emanle okhwa arummwa, ahusiha oowoka yaapacerya ohusiha miruku sooheseya nave yaaheeriha wi sookhovelela ni ifesta sahaari Seekristu ivolowe mmulokoni. Awo yaatoroka masina a ifesta ikina wi ikhale ntoko wi ti sa Akristu. (2 Tesalónika 2:7, 10; 2 Yohani 6, 7) Ikina sa seiho ti sawunlaana olelo. Nyenya nlelo sinavuwiha mahusiheryo ooheseya, ophiyerya onamulosiwe. *—Wupulula 18:2-4, 23.

⁴ Mu elapo yoothene, ifesta ni iferiyatu ti soochuneyaxa mu okumi wa achu ancipale. Nyenya vaavaa munahaalaanyu ohuserya moonelo wa Yehova vooloca sa ichu, akhweya nyuwaano munahaala woona wi ti woochuneya otoroka moonelo anyu vooloca sa ifesta.

5. Ichu taani inooniherya wi Yesu haayariwe nihiku na 25 a Tesempuru?

⁵ Achu ancipale anuupuwela wi Yesu oyariwe nihiku na 25 a Tesempuru, nave mu nihiku nenla, mmapuro mancipale, achu anamulya nataale. Piipiliya hanaloca nihiku naari mweeri Yesu aayariweiye, nyenya onaloca sa elukuluku ya eyaakha. Luka aarempe wi vaavaa Yesu aayariweiye, “makupa yaale, naakhalawo nikuwa akukhula yaakonaayawo ewehereryaka muhuwo ohiyu” ela ti wi, vanlakani vene ekhapelelaka muhuwo aya. (Luka 2:8-11) Mweeri wa Tesempuru, elapo ya o Petelehemu weiwo Yesu aayariweiyewo, yaari elukuluku ya epula, oriirya ni nakhutu. Mwawiihiiha akukhuli hiyaahaala okhalaka vanlakani vene ni muhuwo aya ohiyu. Ela ennooniherya wi vaavaa Yesu aayariweiye, yaari elukuluku ya elimwi ohiya mweeri wa Tesempuru. Piipiliya vamoha ni miyaha soorempwa sinnooniherya wi woonaru Yesu aayariwe miyeeri seiho olelo nniichanaahu Setempuru ni Otupuru.

6, 7. (1) Sookhovelela sincipale sa Natale sikhumelenle woowi? (2) Tiheeni enaphwanela oneeriha ovaha sa mahala?

⁶ Vano nataale opacenrye woowi? Opacenrye ni ifesta sa malapelo atheru, ntoko ifesta sa Aroma sawiichaniwa saturnu. Ifesta seiha saaneeriwa achapeliwaka muluku a olima awiichaniwa Saturnu. Liivuru mmoha awiichaniwa Encyclopedia Americana ooloca: “Sookhovelela sincipale sa Natale ipacenrye ni saturnu, seiho seereya mweeri wa Tesempuru. Ovinyerya vaavaa, yaapacerya yookhovelela ya opaka soolya sa vameekhaaya, ovaha sa mahala ni opariha iveela.” Ohiya yeeyoru, naari nihiku na 25 a Tesempuru waachapeliwaaya oyariwa wa muluku nsuwa awiichaniwa Mitra.

 ⁷ Nyenya achu ancipale anamulya Natale olelo hanuupuwela yeela. Wa yaawo, Nataale onnaavaha ekari ya okhala vamoha ni amusi, olya phaama ni ovaha sa mahala. Evelevelo wi ninnaasivela amusi ahu ni asinthamwene, nave tho Yehova onachuna wi achu awe ekhaleke a mahala. Yoorepa ya 2 Korinto 9:7 eni: “Muluku onnamusivela yoole onavaha moohakalala.” Nyenya Yehova hanachuna wi nivaheke pahiru mu ilukuluku sa vameekhaaya. Achu  a Yehova annasiveliwa ovaha samahala ni okhala vamoha ni asinthamwene ni amusi mu elukuluku syakala ya eyaakha, ehiweheryaka waakhela echu. Awo annavaha samahala nthowa na osivela ohiya nthowa na ophareliwa.—Luka 14:12-14.

8. Mpwanne anamiruku yaamvanhe Yesu sa mahala ari nikwiya? Mutharihe.

⁸ Wi etharihe nthowa na ovaha sa mahala nihiku na Natale, ancipale analoca wi anamiruku a elapo onakhumawo nsuwa yaavaha sa mahala wa Yesu vaavaa aareiye nikwiya ari munikholani. Eparipari wi nikhuuru na achu naamuxekurya Yesu nave yaamvaha samahala. Mu elukuluku yeele yaari yawunlaana ovaha samahala wa muchu oochuneya. (1 Mamwene 10:1, 2, 10, 13) Apwanne nyuwaano mwaanasuwela wi alopwana ale yaari anamiruku, achu awiisaaciherya yahaamurumeela Yehova? Ohiya yeeyoru, tahi wi awo yaamuxekunrye Yesu ari nikwiya munikholani. Awo yaamuxekunrye unnunwe akhalaka vaate.—Mateu 2:1, 2, 11.

9. Ifesta taani sa oyariwa Piipiliya onaloceiye?

⁹ Nihiku mwaana onayariweiye, ti noohakalaliha. (Salumu 127:3) Nyenya henataphulela wi nnaphwanela woonaka okhala nihiku navameekhaaya. Muupuwele ela: Piipiliya onaloca pahiru ifesta sa oyariwa sa achu apiili. Efesta emoha yaari ya Farawo, nave ekina yaari ya Herote Antipa. (Mwaalakhanye Maphatxuwelo 40:20-22; Marko 6:21-29.) Nave haavo mmoha a yaala aamurumeela Yehova. Ohiya yeeyo, Piipiliya hanamuloca mulapeli a Yehova yoowo aapanke efesta ya oyariwa wawe.

10. Akristu oopacerya yoona hai ifesta sa nihiku na oyariwa?

 ¹⁰ Liivuru mmoha awiichaniwa Enciclopédia Delta Universal olonce wi Akristu oopacerya “yoona wi ochapela nihiku na oyariwa yaari yookhovelela ya achu ahinamurumeela Muluku” naari wi, yookhovelela ya malapelo ahiri Eekristu. Sookhovelela seiha saarweela mu miruku sooheseya. Ntoko yootakiherya, Akriki yaaneemererya wi muchu ti muchu aanakhapeleliwa ni munepa yoowo waakhanlevo nihiku aayariweiye. Wa yaawo, munepa yoola waaniiwanana ni muluku yoowo aayariwe mu nihiku nimohamoha. Awo yeemererya wi muchu aariki atitelele okhapeleliwa, aaphwanela opaka efesta ya oyariwa wawe. Ohiya yeeyoru, nihiku na oyariwa naanaphitaanyeryiwa tho ni meerelo a waalikhela ineneeryo sa wirimu.

11. Tiheeni Yehova onaweheryeiye wa hiyaano?

¹¹ Achu ancipale anuupuwela wi nihiku yaayariwaaya ti navameekhaaya nenlo awo anaphwanelaaya okhalihiwa phaama ni wooniheryiwa osivela. Nyenya nnanwerya waakhaliha phaama asinthamwene ni amusi ahu eyaakha yoothene, ohiya nihiku nimoharu pahi. Yehova onaweherya wi nikhaleke ooreera murima ni amahala elukuluku yoothene. (Mwaalakhanye Saweriwa T’arummwa 20:35.) Mahiku oothene ninnahakalala ni ekumi yeeyo Yehova onanivaheiye, ohiya pahi nihiku na efesta ya oyariwa wahu.—Salumu 8:3, 4; 36:9.

12. Ti mwawiihai nihiku nookhwa nryaaya noochuneya opwaha nihiku na oyariwa?

¹² Eklesiyaste 7:1 oni: “Ovuwa onnareera opwaha makhurwa awunkhela phaama. Nihiku nookhwa tinooreera opwaha nihiku nooyariwa.” Ti mwawiihai nihiku nookhwa nryaaya noochuneya opwaha nihiku na oyariwa? Vaavaa nnaayariwaahu, nneera nihenre echu  eri yoothene yaphaama naari yoonanara. Nyenya vaavaa nnapharihelaahu okumi ahu wi nimulapele Yehova ni weera yaphaama, ninnapaka “ovuwa” wooreera nave Yehova hanicuwala naamwi nikhwile. (Yobi 14:14, 15) Alapeli a Yehova hanapaka efesta ya oyariwa waya naari wa Yesu. Mweeparipari, yaweereya emoha yeeyo Yesu olamulenleiye weerano ori wuupuxerya okhwa wawe.—Luka 22:17-20; Ahebri 1:3, 4.

13, 14. Taavi ari mapacereryo a Paskowa?

¹³ Ancipale aneemererya wi vaavaa anampakaaya Paskowa anuupuserya ovinya mookhwani wa Yesu. Nyenya, mweeparipari, sookhovelela sincipale sa Paskowa sineeriwa olelo, siniiwanana ni meerelo a muluku oocapaheya a malapelo atheru. Moone muhapo wa anamarokolo ni mooce a Paskowa. Ovinyerya khalai, anamarokolo annaphariheliwa ntoko eneneeryo ya ocapaheya. Tisiyonariyu mmoha awiichaniwa Dictionary of Mythology aaloca wi orocolo wa waasya mooce a Paskowa “onarweela wa yookhovelela ya ocapaheya.” Ti yawooneya wi Paskowa haniiwanana ni ovinya mookhwani wa Yesu.

¹⁴ Apwanne Yehova onnasiveliwa vaavaa achu anaakanyeryaaya ichu sa malapelo atheru ni ovinya mookhwani wa Yesu? Ti yawooneya wi hooye. (2 Korinto 6:17, 18) Mweeparipari Yehova halamulenle wi nuupuxeryeke ovinya mookhwani wa Yesu.

15. Taavi ari mapacereryo a efesta ya eyaakha esyaani?

¹⁵ Elapo ti elapo yookhalano mukhalelo aya wa ochapela eyaakha esyaani. Nyenya mmakupa mancipale ti yawunlaana opaka ifesta itokweene wookuchulani wa eyaakha. Nave mu ifesta sene seiha, achu annacapaheyamo ni ohapaliwa. Ohiya yeeyoru, mapacereryo aya tahi Eekristu. Liivuru mmoha awiichaniwa The World Book Encyclopedia ooloca: “Aroma yaanachapela eyaakha esyaani wa Yano, muluku a mikhora ni a mapacereryo. Mweeri woopacerya wa eyaakha oniichaniwa Yaneru nthowa na Yano, yoowo aarino ithoi piili emoha ewehaka ohoolo ekina oculi.”

16, 17. Tiheeni nnaphwanelaahu weera waakhanle wi nnachuna opaka efesta ya othela?

¹⁶ Nihiku na othela nihiku noohakalaliha. Nyenya yeeyo achu aneeraaya va efesta ya othela ennakhala yoohiyana mwawiiwanana ni elapo ti elapo. Nyenya wiiliwiili achu hanuupuwelela maphacuwelo a sookhovelela seiho. Mwawiihiiha, akhweya hanasuwela wi sookhovelela ikina inarweela mmalapelo atheru. Nyenya Mukristu yoowo onaya othela onnachuna weera soothene wi efesta awe emuhakalalihe Yehova. Owo onaphwanela otholathola maphacuwelo a sookhovelela siri sawunlaana mu ifesta sa othela mu elapo aya. Yeerano hiiha, anahaala owerya opaka soolakelela saphaama.—Marko 10:6-9.

¹⁷ Sookhovelela ikina irino yoolakelela ya ochuna waavaha “ekari” atheli asyaani. (Isaiya 65:11) Mmapuro makina achu annavonyerya osulu mvuka (naari ichu ikina) wa atheli. Awo anuupuwela wi eyo enahaala waakhaviherya oothelana awo okhalano anamwane, ohakalala ni okhalano okumi wawaaca. Anuupuwela tho wi eyo enahaala owaakiha wa ichu sawoopiha. Nyenya Akristu anaphwanela okhalano ekaasoope wi eheereno echu eri yoothene eniiwanana ni malapelo atheru.—Mwaalakhanye 2 Korinto 6:14-18.

18. Malakiheryo taani makina anaphwanela othokororyiwa va efesta ya othela?

¹⁸ Mutheli Eekristu onachuna wi efesta ya othela wawe ekhale elukuluku yoohakalaliha ni yaphaama, nave wi oowompwa oothene ekhale ootaphuwa. Ntoko yootakiherya, wakhala wi muchu oowompwa onnachuna oloca masu wa achu oothene, hanaphwanela oloca echu yoohiphwanelela, yawuuliha muru naari enahaala wooniherya  oyeleela ncicimiho wa atheli naari achu akina. (Masiposipo 26:18, 19; Luka 6:31; 10:27) Efesta ya othela wa Akristu henaphwanela wooniherya “okareela muhakhu” naari wiirumiha ni muhakhu. (1 Yohani 2:16) Wakhala wi munapaka marehereryo a efesta ya othela, mweere echu eri yoothene wi mukhaleke oohakalala ohiya oothanana vaavaa munuupuwelaanyu nihiku nenlo.—Moone Yooleeliherya 28.

19, 20. Yookhovelela ya waamaniha akoopho enarweela woowi?

¹⁹ Akina aakhalano yookhovelela ya waamaniha akoopho va efesta ya othela naari va ifesta ikina. Variyari va efesta, akhweya muchu mmoha ooloca yoochuna awe yaphaama, nave akina annaakuxa akoopho aya enammaniha ni koopho a muchu yoowo yeemereryaka yeeyo olonceiye. Apwanne ela echu yaphaama?

²⁰ Liivuru awiichaniwa International Handbook on Alcohol and Culture ooloca wi waamaniha akoopho woonaru orwenle mu yookhovelela ya “okuxa maahi aweela ni waavaha amuluku” yeeyo yeeriwano ni amalapo. Ela yeeriwano “mu otorokana sooveka, vamoha nnivekelo mmasu ala ‘ekumi yoolekela’ naari ‘ekumi!’” Khalai achu yaakhalano yookhovelela ya waaviiha akoopho wi ephime mareeliho a amuluku aya. Nyenya okhalano mareeliho a Yehova honarweela mwa yeeyo.—Yohani 14:6; 16:23.

21. Ifesta sa mukhalelo taani Akristu ahinaphwanelaaya opaka makupa?

²¹ Muhaakumve olakelela oya va efesta eri yoothene, muupuwelele vooloca sa meecelo ni muupuwelo efesta  eyo enahaalaaya ovuwiha. Ntoko yootakiherya, ifesta ikina inavolowela wiina woohiphwanelela ophiyerya ocapaheya. Ifesta ntoko seiha sinnavuwiha okonihana wa achu a mwiikho woolikana ni wiirumiha nthowa na elapo. Wakhala wi ninnapaka makupa mu ifesta ntoko seiha, apwanne nnahaala wooniheryaka wi ninniica yeeyo Yehova oniiceiye?—Salumu 1:1, 2; 97:10; 119:37.

22. Tiheeni eni yookhaviheryeeni olakelela waakhanle wi munahaala oya va efesta yammoori?

²² Akristu anaphwanela okhalano ekaasoope wi ehipake makupa mu ifesta iri soothanyeya wa Yehova. Murummwa Paulo aarepa: “Hiiha mwaalyaaka naari owurya, nari weerano echu ekina, mweereno soothene wi mmucicimiheke Muluku.” (1 Korinto 10:31; moone Yooleeliherya 29.) Eparipari wi tahi wi ifesta soothene sinnavolowela ocapaheya, malapelo atheru naari ovuwiha elapo. Wakhala wi efesta henavuhana ni malakiheryo a Piipiliya, muchu ti muchu onaphwanela olakelela waakhanle wi onahaala oyawo naari hooye. Nave tho nnaphwanela wuupuwela mukhalelo soolakelela sahu inahaalaaya waavolowela akina.

23, 24. Nni niwerye hai waaleela ahima ahu ahiri Anamoona a a Yehova mathowa ananeeriha ohipaka makupa mu ifesta ikina?

²³ Akhweya nyuwaano moolakelela ohipaka makupa mu ifesta soothene sinamunanara Yehova. Nyenya ahima anyu ancipale ahiri Anamoona a Yehova akhweya anamuupuwela wi hamunachuna okhalaka vamoha ni yaawo. Akhweya awo anuupuwela wi ekari ya okhala vamoha ni amusi enakhala pahiru mmahiku a ifesta. Tiheeni munaphwanelaanyu weera? Aakhalavo makhalelo mancipale  a owooniherya wi awo toochuneya wa nyuwaano ni waasivela. (Masiposipo 11:25; Eklesiyaste 3:12, 13) Nyuwaano munanwerya waawopa wi mukhale vamoha mu nihiku nikina.

²⁴ Nave wakhala wi asitiithi anyu annachuna osuwela ntakhara heeni nyuwaano muhinapakaanyu makupa mu ifesta, munaphwanela otholathola mu soolaleeryiwa sahu naari mu jw.org wi mphwanye sooleeliherya sinahaala wookhaviheryaani othariha mathoweene. Nyenya muhikhale ntoko wi mwa mwaneene a eparipari nave tho muhaakhinyererye wi awo yuupuweleke ntoko nyuwaano. Mweerihe wi ahima anyu yoone wi nyuwaano mpacenrye ohuserya mwaha owo muhaakumve opaka yoolakelela. Mukhale oomaaleleya nave “masu anyu ekhaleke a mahala, oosiva, si awuulukiwa [naari aweeleeliwa ni maakha.]”—Kolosi 4:6.

25, 26. Asitiithi eni yaakhaviherye hai anaaya osivela malakiheryo a Mpiipiliyani?

²⁵ Ti yoochuneya osuwela mathowa a ohipaka makupa mu ifesta ikina. (Ahebri 5:14) Nnachuna omuhakalaliha Yehova. Nave wakhala wi nookhalano anamwane, nnaphwanela waasyaka elukuluku wi naakhaviherye anamwane ahu wiiwexexa ni osivela malakiheryo a Mpiipiliyani. Wakhala wi Yehova tawooneya wa yaawo, anahaala ochuna tho omuhakalaliha.—Isaiya 48:17, 18; 1 Pedro 3:15.

²⁶ Yehova onnahakalala vaavaa onooneiye wi ninniilipixerya wi nimulapele mmukhalelo waweemereryeya. (Yohani 4:23) Nave tho ninnamuhakalaliha Yehova vaavaa nnakhalaahu oororomeleya. Apwanne ti wooweryeya okhala oororomeleya mu elapo yeela yoonanara? Mmwaha onacharela nnahaala ohuserya sa yeela.