1, 2. Okhalano makacamiho mu othela onataphulela wi mooviliwa? Ntakhara heeni?

OTHELA yamahala ya Yehova nave onanwerya oruuha ohakalala. Naamwi hiiha, atheli ari oothene annakumanano makacamiho. Ophiyerya wi onakhala wi makacamiho a othela herwaru emala. Nave ela enanwerya waamwalaniha achu yaawo athelanne.

² Mwawiihiiha, hannaphwanela okhala ootikhiniheya wakhala wi ilukuluku ikina ninnakumanano makacamiho mu othela. Nyenya ela henataphulela wi mooviliwa. Ophiyerya tho atheli yaarino makacamiho oovilaxa aawerya ophwanya mukhalelo wa omaliha makacamiho aya ni olipiha othela waya. Yenreno hai?

3, 4. Ilukuluku ikina tiheeni akhweya eni ekhumelele mu othela?

³ Othela ori ophitaana wa achu eeli oohiyana. Mmoha ti mmoha akhweya ookhalano sookhovelela sawe, soochuna sawe, mukhalelo awe wa wuupuwela ni wa weerano ichu. Vakina vaya, mulopwana ni muthiyana aphwiiwale mmukhalelo woohiyana. Mwawiihiiha, onachuneyavo elukuluku yincipale ni wiilipixerya wi esuwelane phaama mukina ni mukhwaawe.

⁴ Moovira wa elukuluku, nthowa na oweiwa, mulopwana ni muthiyana ananwerya okhala ocai mukina ni  mukhwaawe. Ophiyerya enakhala ntoko wi ari achu apiili ahisuwelanne yaawo anakhala empa emoha. Tiheeni enahaala waakhaviherya atheli okhala awiiwanana?

5. (1) Tiheeni enahaala waakhaviherya atheli okhala awiiwanana? (2) Mwawiiwanana ni Ahebri 13:4, tuuvi onaphwanela okhala moonelo ahu vooloca sa othela?

⁵ Yehova onnavaha miruku soophara muteko seiho inahaala omukhaviherya mutheli okhala awiiwanana ni omwaacamela Yehova. (Salumu 25:4; Isaiya 48:17, 18) Owo onnanleela: “Othela ocicimihiweke ti achu oothene.” (Ahebri 13:4) Echu eri yoochuneya echu yasisapo. Nave echu si yeeyo, nyuwaano munnakhapelela phaama ohiya othatano mwaapuremwaapure. Yehova onachuna tho wi nooneke othela mmukhalelo mmohamoha.

6. Mwawiiwanana ni Mateu 19:4-6, tiheeni Yehova onaweheryeiye wa yaale athelanne?

⁶ Yehova taatikithenrye othela woopacerya. Yesu, mwaana a Muluku, aaloca: “Himwalakhannye wi Mpatusa, wopatxeryani, apatunse yawo mulopwana ni muthiyana, ni àlotxa: Tivanto mulopwana onereiye ahiye atithinya ni amannya ni aphitàne ni mwariye, nave oweli awo eni ekhale mutxhu mmoharu. Vano hari eli, nto mutxhu mmoharu. Tiva, yeyo Muluku ophitànnyeiye, mutxhu ahimwalanye.” (Mateu 19:4-6, Bibiliya Nsu na Muluku) Ovinyerya woopaceryani, yoolakelela ya Yehova yaari wi achu athelanne ekhaleke vamoha okhala wookhala. Owo aachuna wi ichoko ikhaleke sawiiwanana, soohakalala ni opuha okumi vamoha.

7. Achu athelanne, eni elipihe hai othela waya?

⁷ Nyenya mmahiku ahu yaala atheli ancipale annakumanano makacamiho oovila ni oopwesa muru. Ilukuluku ikina makacamiho annatepa wunnuwa ophiyerya wi enoona wi othela waya honi okhumelele phaama nave annamwalana. Nyenya wiiwexexa phaama moonelo wa Yehova vooloca sa othela onanwerya onikhaviherya.—1 Yohani 5:3.

8, 9. (1) Ophiyerya mweeryo taani nnaphwanelaahu ocharihaka ohoolela wa Yehova mu othela wahu? (2) Nnooniherya hai wi othela wahu ti woochuneya wa hiyaano?

⁸ Ilukuluku soothene ohoolela wa Yehova onnatepa onikhaviherya. Ntoko noonaahu, owo onnanlopola ariki: “Othela ocicimihiweke ti achu oothene.” (Ahebri 13:4; Eklesiyaste 5:4) Wakhala wi ninnachara ohoolela wa Yehova naamwi okhalaka woovila, nnahaala ophura vancipale.—1 Tesalónika 1:3; Ahebri 6:10.

 ⁹ Woona wi othela ti woochuneya wa hiyaano, nnachuna osepa opaka naari oloca echu yeeyo enahaala onanariha. Ohiya yeeyo, nnaphwanela olipiha othela wahu. Nni neereno hai?

10, 11. (1) Makacamiho taani matokweene atheli akina anahoolelaaya? (2) Ntakhara heeni ti yaphaama okhalano ekaasoope ni yeeyo nnalocaahu ni oothelana ahu?

¹⁰ Noosuwela wi Akristu hanaphwanela owana. Naamwi hiiha, aakhalavo makhalelo mancipale atheli aneeraaya ephoreihane mukina ni mukhwaawe. Vakina vaya, masu anniicela vancipale opwaha omaniwa. Muthiyana mmoha aaloca: “Aiyaka anakiwaxula ni masu. Eparipari wi nkaano maharipa mmwiilini mwaka. Nyenya awo ilukuluku soothene anakhala oonyeenyeya ni miyaano ophiyerya oloca ichu ntoko: ‘Koophweeleya ni weyaano! Weyaano hi wa muthiyana.’ Ala makhwaca ari oovila ovola.” Mulopwana mmoha ooloca wi amwaariye yaanamuyeviha ni omuroha. Owo onnaloca: “Nkinawerya oloca masu amwaaraka anakilocelaaya. Nkinawerya ochekula ni yaawo. Kiniileliwa omuteko koovaka ophiya owaani, wi kirapele waakhulana.” Oloca masu oophoreiha ti wawunlaana olelo.

¹¹ Wakhala wi mulopwana ni muthiyana annalocelana masu oophuca, eyo ennaruuha makhwaca mmuupuwelo, yaawo anakhala oovila ovola. Mweeparipari, tahi hiiha Yehova onachuneiye wi atheli ekhalihaneke. Vakina vaya, ti wooweryeya mmoha omphoreiha mukina ahisuwelaka. Nyuwaano munanwerya wiisoona okhala muchu aphaama elukuluku yoothene, nyenya aiyanyu naari amwaarinyu anawoonaani hai? Wakhala wi awo annakhala oohica  ni echu yeeyo munalocaanyu, apwanne munneemererya otoroka?—Galasya 5:15; mwaalakhanye Éfeso 4:31.

12. Wa ale athenle naari atheliwe, tiheeni eni enanarihe onthamwene aya ni Yehova?

¹² Mukhalelo alipa oothelana analocihanaaya mukina ni mukhwaawe ti woochuneya wa Yehova, moohipwacha waakhanle wi arivo mukhataaya naari ni achu akina. (Mwaalakhanye 1 Pedro 3:7.) Yoorepa ya Tiyako 1:26 eni: “Muchu aaniiseera oomulapa Muluku, ahinahiiha nlumi nawe, onniiwoka mmurimani mwawe nave olapa wawe ti wasiiyo.”

13. Makhalelo taani makina muchu oneereiye amphoreihe oothelana awe?

¹³ Ale athenle naari atheliwe anaphwanela okhalano ekaasoope wi ehiphoreihane mukina ni mukhwaawe  mmakhalelo makina tho. Ntoko yootakiherya, oothelana anyu aahaala woona hai wakhala wi munnamaliha elukuluku yincipale ni muchu mukina a mwiikho woohiyana? Akhweya eyo enanwerya weereya ni mathowa aphaama, ntoko olapa vamoha mmuteko woolaleerya naari omukhaviherya omaliha nikacamiho nammoori. Nyenya apwanne amwaarinyu naari aiyanyu anahaala osooseya? Muthiyana mmoha ootheliwa aaloca: “Kinnatepa osooseya kaawoonaka aiyaka emuthokororyaka vancipale murokora mukina mmulokoni. Kinniisoona ohikhala echu.”

14. (1) Tiheeni nnahuseryaahu mu Maphatxuwelo 2:24? (2) Nikoho taani nnaphwanelaahu wiipakela?

¹⁴ Ntoko Akristu, nnaphwanela waakhaviherya asitiithi ahu vamoha ni anna mmulokoni. Nyenya wakhala wi noothela naari nootheliwa, oothelana ahu onaphwanela okhala mu nipuro noopacerya. Yehova olonce wi mulopwana “aphitaane ni mwaariye.” (Maphatxuwelo 2:24) Moonelo wa iyahu naari wa mwaarihu onaphwanela okhala woochuneyaxa wa hiyaano. Mwiikohe: ‘Kinnaavaha aiyaka naari amwaaraka elukuluku, opwacha ni osivela yoowo awo anachunaaya?’

15. Ntakhara heeni nnaphwanela osepa waataana ni muchu a mwiikho woohiyana ohiri oothelana ahu?

¹⁵ Wakhala wi nootepa waataana ni muchu mukina a mwiikho woohiyana omuhiya mwaarihu naari iyahu, eyo enahaala oruuhela makacamiho mu othela wahu. Muupuwelo ahu onanwerya ovoloweliwa ni muchu yoowo nnakhalaahuno ilukuluku sincipale ophiyerya opacerya omukhwela. (Mateu 5:28) Moonelo owo onanwerya waaceereryeya ophiyerya oneeriha weera echu enahaala onanariha othela wahu.

16. Nlamulo taani Piipiliya onaavaheiye atheli?

¹⁶ Amanle oloca wi “othela ocicimihiweke ti achu oothene,” Piipiliya onnaloca: “Okumanela wa atheli okhaleke woohichekeliwa; tiwi Muluku onamwaathoriha aweeca pure ni anamararuwe.” (Ahebri 13:4) Mpiipiliyani, masu awi “okumanela wa atheli” anataphulela okonihana variyari va mulopwana ni mwaariye. (Masiposipo 5:18) Mutheli oni ooniherye hai ncicimiho mmukhalelo yoola?

17. (1) Achu ancipale olelo anoona hai opaka mararuwo? (2) Akristu anaphwanela woonaka hai mararuwo?

¹⁷ Olelo, achu ancipale anuupuwela wi hiyaavo yoonanara opaka mararuwo ni muthiyana naari mulopwana ohiri othelana aya. Nyenya niheemererye wi muupuwelo yoola onivolowele. Yehova onnaloca mookwakwaleya wi owo onniica mararuwo ni ocapaheya. (Mwaalakhanye Aroma 12:9; Ahebri 10:31; 12:29) Wakhala wi nookona ni muchu mukina ohiri mwaarihu naari iyahu, nnahaala ophotowela othela wahu. Naahaala wooniheryaka wi hinnacicimiha Malamulo a Yehova, nave tho nnahaala oyeleela onthamwene ahu ni yoowo. Mwawiihiiha, nnaphwanela osepa weera echu yaahaala oneeriha opaka mararuwo. Eyo enavolowela osepa waanyiherya nipakaka sa mwiikho ni muchu mukina.—Yobi 31:1.

18. (1) Mmukhalelo taani mararuwo analikanaaya ni waalapa amuluku atheru? (2) Yehova onoona hai mararuwo?

¹⁸ Malamulo a Mose yaanaloca wi oraruwa yaari yoocheka etokweene, yeeyo yaalikana ni waalapa amuluku atheru. Nave olaka aavahiwa muchu yoole aapaka soocheka seiha piili, waari okhwa. (Onamukutxho 20:2, 10) Mmukhalelo taani oraruwa waaryaaya ntoko waalapa amuluku atheru? Wakhala wi Muisarayeli onnamulapa muluku atheru,  owo onaakanyerya nlakano nawe na okhala oororomeleya wa Yehova. Mmukhalelo woolikana, Muisarayeli yoowo aararuwa aanaakanyerya nlakano na okhala oororomeleya wa oothelana awe. (Mukwaha 19:5, 6; Malamulo 5:9; mwaalakhanye Malakiya 2:14.) Ti yawooneya wi wa Yehova oraruwa yoocheka etokotoko.

19. Olikanyiha taani onanikhaviherya okhala oolakelela ohipaka mararuwo?

¹⁹ Hanka olelo? Olelo hanri vathi va Malamulo a Mose, nyenya yeeyo Yehova onuupuweleiye vooloca sa mararuwo hetoroken’ye. Hiiha ntoko naahihaalaahu omulapa muluku atheru, hannaphwanela tho ohikhala oororomeleya wa mwaarihu naari iyahu. (Salumu 51:1, 4; Kolosi 3:5) Yoowo onararuwa, tahi wi pahiru onayeleela ncicimiho wa oothelana awe, nyenya tho wa Yehova.—Moone Yooleeliherya 26.

20. Miruku inakhaviherya hai othela?

²⁰ Muni muwerye hai olipiha othela wanyu? Piipiliya oni: “Mwa miruku tenatekiwaaya empa, mwa osuwela tentikithereyaaya.” (Masiposipo 24:3) Empa yeeyo epakiwe phaama enakhala yoophwaneliwa, yookhapeleleya ni yoolipa. Othela tho onanwerya okhala hiiha, nyenya mutheli onaphwanela okhalano miruku. Miruku inahaala okhaviherya othela okhala woolipa vancipale, woohakalala ni woopuheya.

21. Masuwelelo analipiha hai othela?

²¹ Piipiliya onnaloca vancipale sa empa yeeyo ariki: “Mwa osuwelano tenasareyaayano sookhweleyasha ni sooreera soothene.” (Masiposipo 24:4) Yeeyo munahuseryaanyu Mpiipiliyani, enahaala wookhaviheryaani orehererya othela wanyu. (Aroma 12:2; Filipi 1:9) Vaavaa nyuwaano munamwaalakhanyaanyu Piipiliya naari soolaleeryiwa  vamoha ni oothelana anyu, munavaanela mukhalelo wa opharihela muteko yeeyo muhusenryaanyu. Moone makhalelo nyuwaano munaphwanelaanyu wooniherya okhala oolevelela, amahala, ni wooniherya ncicimiho variyari va othela. Mveke nikhaviheryo na Yehova wi nwerye okhalano makhalelo yaala ni makina ari oochuneya. Hiiha, othela wanyu onahaala okhala woolipaxa nave nyuwaano munahaala okhala muchu a mukhalelo yoowo iyanyu naari mwaarinyu onamusiveleiye.—Masiposipo 15:16, 17; 1 Pedro 1:7.

22. Ntakhara heeni nnaphwanelaahu wiilipixerya vancipale wi nimucicimihe ni omusivela mwaarihu naari iyahu?

²² Nnaphwanela wiilipixerya wi nooniherye wa iyahu naari mwaarihu ncicimiho, opwacha, ni othokororya. Neerano hiiha, othela wahu onahaala okhala woolipaxa ni woohakalala. Nave echu yoochuneyaxa, nnahaala omuhakalaliha Yehova.—Salumu 147:11; Aroma 12:10.