1, 2. Tiheeni nnaphwanelaahu weera wi nititelele omusivela Muluku?

OOTHENE ahu ninnachuna okhalano ekumi yaphaama. Mwawiihiiha ninnaasyaasya olya yoolya yaphaama, wookola mwiili ahu vamoha ni oreeriha. Naamwi ori muteko mutokweene, woona mphurelo ene ti waphaama, hiyaano hannavelavela. Vano hankooni noone mukhalelo mukina nnaphwanelaahu okhala oolipa ni ekumi yaphaama.

² Hiyaano noomusuwela Yehova, nave ala mapacereryo aphaama. Nyenya nnaphwanela otitelela olipiha onthamwene ahu ni yoowo. Vaavaa Yuta aaceenyenreiye Akristu ariki “mwiikhapelele meekhiinyu mu osivela wa Muluku,” owo aaloca tho mukhalelo wa weerano yeela. Owo ahaaleela: “[Mwiinnuwe] mu nroromelo naweelasha.” (Yuda 20, 21) Vano nni nunnuwihe hai nroromelo nahu vamoha ni wiikhalelaru mu osivela wa Muluku?

3-5. (1) Satana onachuna wi mooneke hai malakiheryo a Yehova? (2) Munoona hai vooloca sa malamulo ni malakiheryo a Yehova?

³ Ti woochuneya okhala oolekecheya wi soothene Yehova oneereiye ti sawookololowa. Satana onachuna wi muupuweleke wi ti woovila omwiiwelela Muluku nave wi munahaala okhala oohakalala wakhala wi munalakelela meekhinyu yeeyo  eri yaphaama naari yoonanara. Ovinyerya mu emaca ya Eteni, Satana onnaweererya achu weemererya yeela. (Maphatxuwelo 3:1-6) Nave nlelo onneerano mmahiku yaala.

⁴ Apwanne Satana onaloca eparipari? Apwanne yookhala nnayeleelaahu vaavaa nnamwiiwelelaahu Yehova? Hooye. Wi nlikanyihe, nkaanyiheryani wi muri mu nipuro nenlo onaphwiiwaawo axinama. Mwaawehaka ohoolo munnoona mukuso woorakama ociyelenle makupa makina a ephiro. Akhweya nyuwaano munniikoha: ‘Ntakhara heeni oheliwaayavo mukuso ola?’ Elukuluku vakhaani, munnamwiiwa mwaco inlaka mpuwa. Vano munniiwexexa ntakhara heeni oheliwaayavo mukuso? Waahirivo mukuso yoowo, nyuwaano mwaahaala okhuuriwa! Malakiheryo a Yehova ari ntoko mukuso, nave Musaserya ori ntoko mwaco. Piipiliya oni: “Muwehereryeke mwiisuwelelaka, vawi mwiicani anyu musaserya, onnoorukureryaani oopaka murika ntoko mwaco onamwaavya muchu wi amukhuure.”—1 Pedro 5:8.

⁵ Yehova onachuna wi nikhaleno ekumi yaphaama. Owo hanachuna wi nihuwelihiwe ni Satana. Ti nthowa nene Yehova onivanheiye malamulo ni malakiheryo wi enikhapeleleke ni oneeriha okhala oohakalala. (Éfeso 6:11) Tiyako oorepa: “Muchu onavarerya malamulo awaakhwanela, yaale anantaphula, anachariha ni weerano . . . tooreeriwa mu saweera sawe.”—Tiyako 1:25.

6. Nni niwerye hai olekecheya wi malakiheryo a Yehova taphaama?

⁶ Wakhala wi ninnamwiiwelela Yehova, ninnakhalano ekumi yaphaama nave onthamwene ahu ni yoowo onamvira okhalaka woolipa. Ntoko yootakiherya, Yehova onnaniwopa ovekela wa yoowo. (Mateu 6:5-8; 1 Tesalónika 5:17) Ninnakhala oohakalala vaavaa nniiwelelaahu nlamulo nawe na othukumana wi nimurumeele nave tho wi nlipihane mukina ni mukhwaawe. Nave tho ninnahakalala vaavaa nniilipixeryaahu moowetha opaka makupa mu olaleerya ni  weeciha soohuserya sa Piipiliya. (Mateu 28:19, 20; Galasya 6:2; Ahebri 10:24, 25) Wuupuwelela mukhalelo ichu iha inalipihaaya nroromelo nahu, ninnaroromela wi malakiheryo a Yehova chiryene taphaama.

7, 8. Tiheeni nnaphwanelaahu wuupuwela wi nihikhale awuukhuwa ni saweeha seiho akhweya inahaala weereya omwaahiyu?

⁷ Akhweya nnanwerya okhala awuukhuwa nuupuwelaka wi nnahaala okumana ni yaweeha yeeyo nihinahaalaahu owerya. Wakhala wi nyuwaano montoko wuupuwela hiihaa, muupuwele masu a Yehova: “Miyo ka Apwiya, Muluku aa, yoowo onoohusiha ichu sa mphurelo, onoohoola mmeecelo anoophwanelela. Mano wiiwelenle malamulo aka, murecele aa waamukhala ntoko muhice, wookololowa wa murima aa waamukhala ntoko macumusha a mphareya!”—Isaiya 48:17, 18.

⁸ Wakhala wi ninnamwiiwelela Yehova, murecele ahu onakhala ntoko muhice yoowo ohinaweleela. Nave wookololowa  wahu, ela tiwi, meerelo ahu oophwanelela, anakhala ntoko macumuxa a mphareya yaawo ahinamala. Moohiphwacha echu eni yeereye mu okumi ahu, nnanwerya okhala oororomeleya. Muupuwele yoororomeliha ya Mpiipiliyani: “Oveleele sawuukhula saa wa Apwiya nave anarwa yoolipiha, ntakhara herwa yeemaru wi awookololowa murima yuuwe.”—Salumu 55:22.

9, 10. Enataphulela eheeni okhala Mukristu a winnuwa omunepani?

⁹ Vaavaa nnalipihaahu onthamwene ahu ni Yehova, nnanwerya okhala Akristu a “winnuwa” omunepani. (Ahebri 6:1) Enataphulela eheeni okhala Mukristu a winnuwa omunepani?

¹⁰ Hinnakhala Akristu awunnuwa omunepani pahiru nthowa na wuuluvala. Wi nikhale Akristu awunnuwa omunepani nnaphwanela wi Yehova akhale nthamwene ahu avanikuthani ni wuupuwela hiiha ntoko owo onuupuweleiye. (Yohani 4:23) Murummwa Paulo oorepa: “Achu ammakhalelo oomuchu anuupuwelela sa omuchu, nto ammakhalelo a Munepa anuupuwela sa Munepa.” (Aroma 8:5) Muchu ori a winnuwa omunepani hanaasya ovuwa naari muhakhu. (Masiposipo 27:11; mwaalakhanye Tiyako 1:2, 3.) Owo haneemererya wi okhinyereryiwa ni akina omweerihe opaka yeeyo eri yoonanara. Muchu a winnuwa omunepani oosuwela tiheeni eri yaphaama nave ori oolakelela weerano yeeyo.

11, 12. (1) Tiheeni Paulo olonceiye vooloca sa ‘owerya ohiyaniha’? (2) Ti mwawiihai okhala Akristu a winnuwa omunepani onalikanaaya ni okhala muchu oochimaka?

¹¹ Ti woochuneya wiilipixerya wi muchu akhale a winnuwa omunepani. Murummwa Paulo oorepa: “Yoolya yoolipa  ti ya achu atokweene yaawo anniikhoveleliha weerano wiili-wiili wi enawerya ohiyaniha yaphaama ni yoonanara.” (Ahebri 5:14) Masu awi “anniikhoveleliha weerano wiili-wiili” annanuupuxerya mulipa oochimaka oniikhoveleliha wiiliwiili.

¹² Vaavaa nnamoonaahu mulipa oochimaka ari variyari va mapokha, ninnasuwela wi waanachuneyavo ikuru ni elukuluku wi awereke ochimaka ntoko oneereleiye. Owo hayariwe ntoko mulipa oochimaka. Vaavaa mwaana oonayariweiye, owo hanasuwela opharihela phaama mataawe ni inaani. Nyenya moovira wa elukuluku, wakhala wi onniisyakiha onanwerya okhala mulipa oochimaka. Mmukhalelo mmohamoha, ti woochuneya ikuru ni elukuluku wi nikhale Akristu a winnuwa omunepani.

13. Makoho taani anahaala onikhaviherya wuupuwela hiiha ntoko Yehova onuupuweleiye?

¹³ Mu liivuru yoola noohuserya mukhalelo nneeraahu nuupuweleke hiiha ntoko Yehova onuupuweleiye ni woonaka ichu hiiha ntoko owo onooneiye. Noohuserya osivela ni othamalela malamulo ni malakiheryo awe. Vaavaa nnapakaahu yoolakelela syakala, ninniikoha: ‘Nlamulo taani naari nlakiheryo taani na Mpiipiliyani nnaphariheleya mmwaha yoola? Kini kipharihele hai nlakiheryo nenla? Tiheeni Yehova onawehereiye wi kipake?’—Mwaalakhanye Masiposipo 3:5, 6; Tiyako 1:5.

14. Wi nikhaleno nroromelo noolipa, tiheeni nnaphwanelaahu weera?

¹⁴ Nihirwe nihiye oteka nroromelo nahu wa Yehova. Hiiha ntoko olya yoolya yaphaama enakhaviheryaaya mwiili ahu, ohuserya tho vooloca sa Yehova onahaala onikhaviherya okhalano nroromelo noolipa. Woopaceryani wa omuhuserya wahu Piipiliya, naahusenrye pahiru iparipari sookhweleya vooloca sa Yehova ni mukhalelo oneereiyeno ichu. Nyenya moovira wa elukuluku, ti woochuneya wiiwexexa  ichu sa sawiixeela. Ti yeela murummwa Paulo aachuneiye oloca vaavaa aalonceiye ariki: “Yoolya yoolipa ti ya achu atokweene.” Moorweela wa opharihela yeeyo nnahuseryaahu, ninnakhala achu a miruku. Piipiliya oni: “Miruku echu yoopacerya.”—Masiposipo 4:5-7; 1 Pedro 2:2.

15. Ntakhara heeni oryaaya woochuneya omusivela Muluku vamoha ni annihu ni arokora?

¹⁵ Muchu onanwerya okhalano ekumi yaphaama ni oolipa, nyenya wi atitelele mukhalelo yoole, owo onaphwanela otitelela wiikhapelelaka. Mmukhalelo mmohamoha, Mukristu awunnuwa omunepani oosuwela wi ti woochuneya wiilipixerya wi onthamwene awe ni Yehova otitelele okhala woolipa. Paulo onuupuxerya echu ariki: “Mwiivarerye nyuwo mwaaroromelaka; mwiiseererye mukhatinyu.” (2 Korinto 13:5) Ti woochuneya okhalano nroromelo noolipa, nyenya sookhalavo ichu ikina tho soochuneya. Omusivela wahu Yehova vamoha ni waasivela wahu annihu ni arokora onaphwanela otitelela winnuwa. Paulo ooloca: “Nari kiweryaka . . . osuwela sawiiphini soothene ni miruku soothene, naari kirino nroromelo noothene nooteeshano miyaako, kaahikhalano osivela, kiri etheru ene.”—1 Korinto 13:1-3.

16. Satana onachuna wi nuupuweleke eheeni?

¹⁶ Satana onachuna wi nuupuweleke wi hinirwa neera ichu saphaama ophiyerya omuhakalaliha Yehova. Owo onachuna wi nceecheye ni wuupuwela wi hiwaavo mukhalelo wa omaliha makacamiho ahu. Owo hanachuna wi naaroromeleke annihu nave hanachuna wi nihakalaleke. (Éfeso 2:2) Satana oosuwela wi muupuwelo woonanara onanwerya onanariha mukhalelo ahu vamoha ni onthamwene ahu ni Muluku. Nyenya Yehova oonivaha echu yeeyo enahaala onikhaviherya owana ni mawuupuwelo onanara. Owo oonivaha ewehereryo.

17. Ntakhara heeni okhalano ewehereryo ti woochuneya?

 ¹⁷ Mu 1 Tesalónika 5:8, Piipiliya onaloca wi ewehereryo ahu enalikana ni kapasete yoowo onakhapelela muru wa mukhoco vaavaa onawaniheiye okhoconi. Piipiliya onamwiichana kapaseti owo ntoko “owehererya ovulushiwa.” Owehererya soolaiherya sa Yehova onanwerya okhapelela muupuwelo ahu ni onikhaviherya owaniha ni mawuupuwelo oonanara.

18, 19. Ti mwawiihai ewehereryo yaamulipihaaya Yesu?

¹⁸ Ewehereryo Yesu aareiyeno yaanamulipiha. Mu ohiyu wookuchula, ari veelaponi yavathi owo aakumana ni makacamiho oohiyanahiyana. Owo aatumihiwa ni nthamwene awe a vamurimani. Nthamwene mukina aaruna wi haamusuwenle. Akina yaamuhiya nave echawa. Achu a elapo awe yaamwiica ophiyerya wi eveka wi athomeiwe vamwirini woohooxa. Tiheeni yaamukhavihenrye ovilela makacamiho yaala oothene? “Wa nthowa na otheya othonyeriweiye, vaiye aavilelano mwiikimanyo [“mwiri woohooxa” TNM], ahiphwacha  wuuliwa muru, nave aakilaathi vamoha ni Muluku alamulaka.”—Ahebri 12:2.

¹⁹ Yesu aanasuwela wi moorweela wa okhala oororomeleya, owo ahaala oruuhela ncicimiho wa Atiithi awe nave ahaala wooniherya wi Satana mulipa a wootha. Ewehereryo yeela yaamuruuhela Yesu ohakalala otokweene. Owo tho aanasuwela wi moohilekela ahaala okooka okhala wanaawiili ni Atiithi awe wirimu. Ewehereryo ela yaamukhaviherya ovilela. Hiiha ntoko Yesu, nnaphwanela wuupuwelelaka ewehereryo ahu. Ela enahaala onikhaviherya ovilela moohiphwacha makacamiho nneeraahu nikumaneno.

20. Tiheeni enahaala wookhaviheryaani osepa mawuupuwelo oonanara?

²⁰ Yehova onnoona nroromelo nanyu vamoha ni ovilela wanyu. (Isaiya 30:18; mwaalakhanye Malakiya 3:10.) Owo onnalaiherya woovahaani ‘seiyo onakhwelaaya murima anyu.’ (Salumu 37:4) Mwawiihiiha, mutikithere muupuwelo anyu mu ewehereryo anyu ya muhoolo. Satana onachuna  wi muyeleele ewehereryo ni wuupuwela wi soolaiherya sa Yehova hisirwa saakhwanela. Nyenya muheemererye wi mawuupuwelo oonanara yaala etikitheryeye mmuupuweloni mwanyu. Wakhala wi munnoona wi moopacerya oyeleela ewehereryo, mumveke Yehova nikhaviheryo. Muupuwele masu anaphwanyeya mu Filipi 4:6, 7: “Muhiipele murima echu ekina, nto mu soothene mmuleeleke Muluku seiyo munavekaanyu, mmavekelo ni ophara meco, muthamalaka. Hiihaa, murecele wa Muluku, yoowo opwanhe wuupuwela wahu woothene, onarwa waakiha murima anyu ni muupuwelo anyu mwa Yeesu ori Kristu.”

21, 22. (1) Tiheeni Yehova olaihenryeiye weera omwaahiyu? (2) Tiheeni mulakelenlaanyu weera?

²¹ Ilukuluku ni ilukuluku, mwaasyeke elukuluku wi muupuwelele sa soolaiherya Yehova oniroromelinheiye. Moohilekela, achu oothene eni ekhale veelaponi yavathi ahaala omulapelaka Yehova. (Wupulula 7:9, 14) Okumi ahu mu elapo esyaani onahaala okhala wootikhiniha opwaha waanyiherya wahu! Satana, masololo awe, ni ichu soothene soonanara hikhalavo tho. Himurwa muniiceliwa naari mano okhwa. Mahiku oothene, munahaala okona ni ovinya murinono ikuru ni ohakalala ni okumi anyu. Oothene anahaala olapaka vamoha wi yeerihe elapo okhala parataiso. Oothene anahaala okhalano yoolya yaphaama ni nipuro noophwanelela na okhalavo. Haavo oni akhale mulipa awiipha naari oowali; oothene anahaala okhala ooreera murima. Moovira wa elukuluku, achu oothene veelaponi ya vathi anahaala ‘otaphuliwa mu okapuro wa wunca, wi epuhe ocicimihiwa wa anamane a Muluku.’—Aroma 8:21.

²² Yehova onachuna okhala Nthamwene anyu avamurimani. Mwawiihiiha, mpake soothene munawerelaanyuvo wi mmwiiwelele Yehova ni olipiha onthamwene anyu ni yoowo. Aai, neerano hiiha, oothene ahu nnahaala otitelela omusivela Muluku mahiku oothene!—Yuda 21.