1. Yesu aavekenle vooloca sa eheeni mu ohiyu awe wookuchula?

WAARI ohiyu wookuchula wa Yesu ahaakumve wiiphiwa. Owo aanasuwela wi aahaala waahiya oohuserya awe, nave aari awuukhuwa ni omwaahiyu aya. Yesu ahaaleela ariki: “Muhikhale . . . a elapo yavathi.” (Yohani 15:19) Ohoolo waaya, owo aavekela wa Atiithi awe ntakhara oohuserya awe ariki: “Awo hari a elapo ya vathi, ntoko miyo tho kihikhanlaaka a elapo ya vathi.” (Yohani 17:15, 16) Masu ala a Yesu anataphulela eheeni?

2. Masu awi “elapo” Yesu aalonceiye anawaaha taani?

² Masu a Yesu awi “elapo” anawaaha achu yaale ahimusuwenle Muluku nave anahooleliwa ni Satana. (Yohani 14:30; Éfeso 2:2; Tiyako 4:4; 1 Yohani 5:19) Nni niwerye hai ohikhala a “elapo”? Mmwaha yoola, nnahaala othokororya makhalelo oohiyanahiyana a: Otitelela ororomeleya wa Omwene wa Muluku ni ohipaka makupa a elapo, yeeyo enataphulela ohipaka makupa a epoliitika. Hiyaano ninnasepa munepa wa elapo. Ninniilipixerya othanla mawarelo ni soowara soophwanelela, nave nookhalano moonelo woophimeleleya vooloca sa ikhorowa. Navetho ninnawara sawiisaakihano seiho Muluku onanivaheiye.—Moone Yooleeliherya 16.

3. Tuuvi waari moonelo wa Yesu vooloca sa epoliitika?

³ Yesu ari veelaponi yavathi, aanoona wi achu yaakhalano makacamiho mancipale nave wi ekumi aya hiyaari yookhweya. Owo chiryene aanaathokororya nave aanachuna waakhaviherya. Apwanne eyo yaamweeriha okhala muhooleli a epoliitika? Hooye. Owo aasuwela wi echu yaahaala waakhaviherya achu waari Omwene wa Muluku, naari olamulelo. Yesu taahaala okhala Mwene a Omwene yoowo, ti nthowa nene Omwene waaryaaya mwaha woochuneya mu olaleerya wawe. (Daniyeli 7:13, 14; Luka 4:43; 17:20, 21) Elukuluku yoothene, Yesu aanakhala ocai wa miyaha sa epoliitika. Variyari va othorihiwa ni Mulamuleli Pilato, Yesu aaloca: “Omwene aka honarweela weelapo yeela ya vathi.” (Yohani 18:36) Oohuserya awe tho hiyaapaka makupa a epoliitika. Liivuru mmoha a saweereya oniichaniwa On the Road to Civilization onnaloca wi Akristu oopacerya “hiyeemererya okhalano muteko wa epoliitika.” Olelo Akristu eeparipari anoona hiiha. Moororomeleya hiyaano ninnakhaviherya Omwene wa Muluku nave ninniivalaanya mmiyaha sa epoliitika ni ikhoco sa elapo.—Mateu 24:14.

4. Akristu eeparipari anakhaviherya hai Omwene wa Muluku?

⁴ Achu yaawo anarummwa ni alamuleli aya wi eye elapo ekina, awo anavuwiha soochuna sa elapo aya. Awo hanavolowela miyaha sa epoliitika sa elapo yeeyo. Oothanliwa, yaawo arino ewehereryo ya olamulela ni Yesu wirimu, ari mmukhalelo mmohamoha. Paulo aahaarepela Akristu yaawo ariki: “Hiyo noorummwa . . . mu nipuro na Kristu.” (2 Korinto 5:20) Oothanliwa aneemelela olamulelo wa Muluku. Awo hanavolowela miyaha sa epoliitika sa elapo yeela. (Filipi 3:20) Moohiyana, awo annaakhaviherya  achu ancipale ohuserya vooloca sa Omwene wa Muluku. “Ipucepuche ikina” seiho inahaala okhala veelaponi yavathi okhala wookhala, sinnaakhaviherya oothanliwa. Akristu awo tho hanapaka makupa a elapo yeela. (Yohani 10:16; Mateu 25:31-40) Chiryene, Akristu eeparipari hanavolowela miyaha sa epoliitika sa elapo yeela.—Mwaalakhanye Isaiya 2:2-4.

5. Tiheeni enaweeriha Akristu okhooca oya okhoconi?

⁵ Akristu eeparipari anawoona akhwaaya ntoko amusi aya nave tawiiwanana moohipwacha sookhovelela naari elapo anarweelaayawo. (1 Korinto 1:10) Waakhanle wi ninnayawo okhoconi, naahaala owanaka ni amusi ahu, Akristu akhwiihu, yaawo Yesu olonceiye wi naasiveleke. (Yohani 13:34, 35; 1 Yohani 3:10-12) Ohiya yeeyoru, Yesu aahaaleela oomuchara awe wi yaasiveleke ophiyerya tho amwiicani aya.—Mateu 5:44; 26:52.

6. Akapuro awiiveleela a Yehova anaakhaliha hai alamuleli?

 ⁶ Naamwi nihipakaka makupa a elapo yeela, ntoko Akristu ninniilipixerya okhala achu aphaama. Ntoko yootakiherya, ninnooniherya ncicimiho wa alamuleli moorweela wa wiiwelela malamulo ni oliva muxokho onachuneya. Nyenya ikwaha soothene ninniilipixerya omvaha Muluku iri “sa Muluku.” (Marko 12:17; Aroma 13:1-7; 1 Korinto 6:19, 20) Ichu “sa Muluku” inavolowela omusivela wahu, omwiiwelela wahu, ni omulapa wahu. Hiyaano ninneemererya oyeleela ekumi ahu ohiya ohimwiiwelela Yehova.—Luka 4:8; 10:27; mwaalakhanye Saweriwa T’arummwa 5:29; Aroma 14:8.

7, 8. “Munepa wa veelaponi ya vathi” tiheeni, nave onaavolowela hai achu?

⁷ Ohipaka makupa a elapo ya Satana onataphulela oheemererya wi “munepa wa veelaponi ya vathi” onihooleleke. Munepa owo onnooneya mmukhalelo wa wuupuwela ni meerelo yaawo anarwa wa Satana, nave munepa ola onnaahoolela yaale ahinamurumeela Yehova. Nyenya Akristu annasepa meecelo yaawo. Ntoko Paulo olonceiye, “hiyo hinaakhenle munepa wa veelaponi ya vathi, nto Munepa onarweela wa Muluku.”—1 Korinto 2:12; Éfeso 2:2, 3; moone Yooleeliherya 17.

⁸ Munepa wa elapo onnaweeriha achu okhala a nrima, awiirumiha, ni oomwareya. Owo onnaweeriha achu wuupuwela wi hanaphwanela omwiiwelela Muluku. Satana onachuna wi achu yeereke yeeyo anachunaaya ehuupuwenle sookhumelela sene. Owo aamusiveliwa oweeriha achu weemererya wi “soochunachuna sa mwiili, soochunachuna sa miitho,” tiri soochuneyaxa mookumini mwaya. (1 Yohani 2:16; 1 Timóteo 6:9, 10) Musaserya  onniilipixerya xaxaxa wi aahuwelihe akapuro a Yehova ni oweeriha wuupuwela mmukhalelo ntoko owo onuupuweleiye.—Yohani 8:44; Saweriwa T’arummwa 13:10; 1 Yohani 3:8.

9. Munepa wa elapo oni onivolowele hai?

⁹ Ntoko echeku yeeyo nnapharihelaahu wi nimumule, munepa wa elapo ori voothevene. Wakhala wi hanniilipixerya wi nsepe, onahaala onivolowela. (Mwaalakhanye Masiposipo 4:23.) Eyo enanwerya opacerya mmukhalelo woovitheya, ntoko weemererya wi nivoloweliwe ni muupuwelo naari meerelo a achu yaawo ahinamurumeela Yehova. (Masiposipo 13:20; 1 Korinto 15:33) Naari nnanwerya ovoloweliwa ni ichu ntoko woona epwitikiri, michaka sa achu oomwaryeya, naari mapokha.—Moone Yooleeliherya 18.

10. Nni niwerye hai ovootha munepa wa elapo?

¹⁰ Vano, nni nsepe hai ohooleliwa ni munepa wa elapo? Nnaphwanela otitelela omwaacamela Yehova ni weemererya wi miruku sawe sinihooleleke. Nnaphwanela ovekela moohihiyererya nivekaka munepa awe ni okhala ooweiwa mmuteko awe. Yehova ta Ikuru soothene ompwaha muchu pure mweelaponi. Hiyaano nnaphwanela ororomela wi owo onahaala onikhaviherya wi nivoothe munepa wa elapo.—1 Yohani 4:4.

11. Ti mwawiihai munepa wa elapo onavolowelaaya mukhalelo achu anawaraaya?

¹¹ Hiyaano tho ninnooniherya wi hinnapaka makupa a elapo moorweela wa soowara ni mawarelo ahu. Achu ancipale mu elapo yeela anawara wi ethamaliwe, wi etannye nchuno na ocapaheya, wooniha omwareya waya, naari wi yooniweke wi aakhalano ikhorowa sawaaca. Achu akina  hanapwacha mawarelo aya. Awo anoona owara moohipwacha waakhanle wi yoowara eyo yooxuxaara naari ti yoohiphwanelela. Hinnaphwanela weemererya wi mikhalelo seiha inivolowele mmukhalelo nnathanlaahu soowara sahu vamoha ni mukhalelo nnawaraahu.

12, 13. Malakiheryo taani anahaala onikhaviherya olakelela tiheeni nnahaalaahu owara?

¹² Ntoko achu a Yehova, ilukuluku soothene nnaphwanela owaraka soowara sooreera, saphaama, nave mwawiiwanana ni nipuro naari elukuluku. Ninnawara soowara soophwanelela, seiho inooniherya “omulapa Muluku” ahu.—1 Timóteo 2:9, 10; Yuda 21.

 ¹³ Mukhalelo nnawaraahu onanwerya waavolowela akina mukhalelo anamoonaaya Yehova ni achu awe. Piipiliya onnanleela ariki: “Mweereno soothene wi mmucicimihe Muluku.” (1 Korinto 10:31) Owara moophwanelela onavolowela ocicimiha moonelo ni muupuwelo wa akina. Mwawiihiiha, vaavaa nnathanlaahu soowara sahu naari mukhalelo nnahaalaahu owara, nnaphwanela wuupuwela wi soothanla sahu sinnaavolowela achu akina.—1 Korinto 4:9; 2 Korinto 6:3, 4; 7:1.

14. Tiheeni nnaphwanelaahu wuupuwelaka vaavaa nnathanlaahu soowara nnahaalaahu owara naayaaka mmithukumano naari mmuteko woolaleerya?

¹⁴ Nnawara hai vaavaa nnayaahu mmithukumano sahu naari mmuteko woolaleerya? Apwanne nnawara wi nthamaliwe? Soowara sahu sinnawuuliha muru achu akina? Apwanne ninnuupuwela: ‘Miyaano kookhalano owerya wa othanla yoowara aka, ohiya muchu mukina’? (Filipi 4:5; 1 Pedro 5:6) Eparipari wi ninnachuna oophwaneliwa, nyenya ichu inahaala oneeriha okhala oophwaneliwa chiryene ari makhalelo ahu Eekristu. Awo makhalelo yaawo Yehova onooneiye vaavaa onanivareryeiye. Makhalelo awo annooniherya echu eri mpuwa mwahu, ela ti wi “murima” ahu. Nave ti “yoowo ori wookhweleya vamiithoni wa Muluku.”—1 Pedro 3:3, 4.

15. Ntakhara heeni Yehova hananleela soowara taani xaxaxa nnaphwanelaahu othanla ni mukhalelo wa owara?

¹⁵ Yehova hanivanhe yoochariha ni malamulo vooloca sa tiheeni nnaphwanelaahu naari nihinaphwanelaahu owara. Moohiyana, owo oonivaha malakiheryo anaphwanyeya Mpiipiliyani, yaawo anahaala onikhaviherya opaka soothanla saphaama. (Ahebri 5:14) Owo onachuna wi soolakelela sahu, moohipwacha saari ikhaani naari itokotoko, ithipeleyeke mu osivela wahu wa yoowo ni wa akina.  (Mwaalakhanye Marko 12:30, 31.) Mu elapo yoothene, achu a Yehova anawara mmukhalelo woohiyana mwawiiwanana ni sookhovelela sa elapo aya ni yoochuna ya muchu. Ohiyana wuuwu ti wooreera, waphaama ni woohakalaliha.

16. Moonelo wa elapo vooloca sa ikhorowa onahiyana hai ni yeeyo Yesu olonceiye? Makoho taani nnaphwanelaahu wiipakela?

¹⁶ Satana onachuna wi achu yuupuweleke wi ikhorowa vamoha ni muhakhu sinahaala oweeriha okhala oohakalala, nyenya achu a Yehova aasuwela wi muupuwelo owo tahi weeparipari. Hiyaano ninnaroromela masu a Yesu awi: “Okumi wa muchu hori mu waaca wa muhakhu  awe.” (Luka 12:15) Ikhorowa hinnahaala onivaha ohakalala weeparipari. Iho hinnahaala onivaha asinthamwene eeparipari, murecele weeparipari wa mmuupuweloni, naari ekumi yoohimala. Nyenya eparipari wi ninnachuna ichu soomwiilini, nave ninnachuna opuha okumi ahu. Naamwi hiiha, Yesu oonileela wi nnahaala okhala oohakalala wakhala wi nookhalano onthamwene waphaama ni Muluku nave wakhala wi omulapa wahu Muluku echu yoochuneyaxa mu okumi ahu. (Mateu 5:3; 6:22) Mwiikohe: ‘Moonelo wa elapo vooloca sa ikhorowa onnakivolowela? Apwanne ilukuluku soothene kinuupuwela naari kinaloca pahiru sa ikhorowa?’—Luka 6:45; 21:34-36; 2 Yohani 6.

17. Okumi anyu onahaala okhala hai wakhala wi munnakhooca moonelo wa elapo vooloca sa ikhorowa?

¹⁷ Wakhala wi ninnaweiwa mmuteko wa Yehova ni okhooca moonelo wa elapo vooloca sa ikhorowa, ekumi ahu enahaala okhalano yootaphulela aya. (Mateu 11:29, 30) Nnahaala ohakalalaka ni yeeyo nryaahuno nave nnamukhalano murecele wa mmuupuweloni ni mmurimani mwahu. (Mateu 6:31, 32; Aroma 15:13) Hiyaano hinni nnuukhuwa ni muhakhu. (Mwaalakhanye 1 Timóteo 6:9, 10.) Nnahaala opuha ohakalala onarweela mu ovaha. (Saweriwa T’arummwa 20:35) Nave nnamukhalakano elukuluku ya okhala ni achu yaawo nnaasivelaahu. Ophiyerya tho wi nnanweryaka okona phaama.—Eklesiyaste 5:11.

18. Tiheeni Satana oneereryeiye weera wa hiyaano?

¹⁸ Satana onneererya onanariha onthamwene ahu ni Yehova, mwawiihiiha nnaphwanela weera soothene nnaweryaahu wi nikhapelele onthamwene ahu. Nookhalano ekhoco ni “minepa soonanara.” (Éfeso 6:12) Satana ni masololo awe hanachuna wi nikhale oohakalala ni okhalano  okumi woohimala. (1 Pedro 5:8) Amwiicani yaala akuru anawana ni hiyaano, nyenya nnikhaviheryo na Yehova nnanwerya waavootha!

19. Tisivi siri sawiisakiha soothene sa Mukristu inaromoliwa mu Éfeso 6:14-18?

¹⁹ Mu ilukuluku sa khalai, anakhoco yaanawara sawiisakihano soothene eyaaka owana ekhoco. Mmukhalelo mmohamoha, nnaphwanela owara sawiisakihano soothene naari opharihela ‘mavaka Muluku onanivaheiye.’ (Éfeso 6:13) Sawiisakihano iha inahaala onikhapelela. Ninnaalakhanya vooloca sa sawiisakihano seiha mu Éfeso 6:14-18: “Hiiha, mulipe mwiimakenle muyuununi eparipari ntoko nrampa, muwanre tho wookololowa murima ntoko muthipo wa vachirima. Muwarihe inaani sanyu michaka yaphaama ya murecele, wi mukhale ooreheryeya. Vamoha ni soothesene iha, mpharele yawiisaakihano ya nroromelo, yeeyo muneeraanyu mushipihekeno mavaka oovarela a mulipa oonanara. Mukushe tho ovulusha vamuru ntoko kapaseeti ni nlema na munepa, nenlo nri masu a Muluku, mvekelaka ilukuluku soothene mwa munepa mu ophara meco. Mutitelele wiivarerya, mwaavekelelaka aweela murima oothene.”

20. Tiheeni nnaphwanelaahu weera wi sawiisakihano sahu inikhapelele?

²⁰ Wakhala wi mukhoco oocuwala yawiisaakiha syakala, amwiicani awe ananwerya omvootha. Vano naachunaka wi sawiisakihano nari “mavaka” ahu enikhapelele, hannaphwanela ocuwalaka. Nnaphwanela owaraka sawiisakihano sahu ilukuluku soothene ni okhapelela phaama. Owana wahu onahaala otitelela ophiyerya otoloxiwa wa Satana, masololo awe, vamoha ni elapo awe. (Wupulula 12:17; 20:1-3) Vano, wakhala wi nnawana ni soochuna soonanara naari yooceecheiha syakala, hannaphwanela ovelavela!—1 Korinto 9:27.

21. Nni nivoothe hai owana wahu?

 ²¹ Meekhihu, hinnawerya omvootha Musaserya. Nyenya nnikhaviheryo na Yehova nnanwerya omvootha. Wi ntitelele okhala oororomeleya, nnaphwanela ovekelaka wa Yehova, ohuserya Masu awe, ni okhala vamoha ni annihu ni arokora ahu. (Ahebri 10:24, 25) Ichu seiha inahaala onikhaviherya okhala oororomeleya wa Muluku ni ooreheryeya wi naakihe nroromelo nahu.

22, 23. (1) Nni niwerye hai okhala ooreheryeya wi naakihe nroromelo nahu ilukuluku soothene? (2) Tiheeni nnahaalaahu othokororya mmwaha onacharela?

²² Ilukuluku soothene nnaphwanela okhalaka ooreheryeya wi naakihe nroromelo nahu. (Yohani 15:19) Mmiyaha mikina, Anamoona a Yehova annapaka yoolakelela eri yoohiyana ni achu akina. Mwiikohe: ‘Apwanne kinniiwexexa phaama ntakhara heeni kipankaaka yoolakelela yeela? Kiri oolekecheya wi yeeyo Piipiliya vamoha ni namuteko oororomeleya ni amiruku analocaaya eparipari? Apwanne kinnasiveliwa okhala mmoha a Anamoona a Yehova? (Salumu 34:2; Mateu 10:32, 33) Kinnawerya othariha soororomela saka wa akina?—Mateu 24:45; Yohani 17:17; mwaalakhanye 1 Pedro 3:15.

²³ Wiiliwiili, onakhala wawooneya vanlakani vene vooloca sa yeeyo eri yoophwanelela weera wi ntitelele okhala ocai wa elapo. Nyenya ilukuluku ikina, sinnakhalavo miyaha sinakhala soovila osuwela echu yoophwanelela weera. Satana onneererya onihuweliha mmikhalelo soohiyanahiyana. Mukhalelo mmoha Satana onaphariheleiye ti mathatelo. Nni nthanle hai mathatelo ahu mwamiruku? Nnahaala othokororya yeela mmwaha onacharela.