1, 2. (1) Ohoolela taani nnaphwanelaahu ocharihaka? (2) Makoho taani nnahaalaahu othokororya mmwaha yoola?

VAAVAA mwaaryaanyu mwaana, ti wawooneya wi asitiithi anyu ikwaha ikina yaanoorumaani weera ichu seiho mwahichunaanyu. Woona wi mwaanaasivela asitiithi anyu mwaanawiiwelela. Naamwi hiiha, ikwaha ikina waanakhala woovila owiiwelela.

² Noosuwela wi Yehova, Tiithi ahu, nave onnanisivela. Owo onnanikhapelela nave onnanivaha ichu soothene nnachunaahu wi nipuhe okumi ahu. Owo oonivaha ohoolela yoowo nnachunaahu wi nikhumelele phaama. Ilukuluku ikina, onnaapharihela achu wi enihooleleke. Nnaphwanela wiiwelela ohoolela wa Yehova. (Masiposipo 24:21) Vano ntakhara heeni ikwaha ikina onakhalaaya woovila wiiwelela ohoolela? Ntakhara heeni Yehova onanivekeiye ochara ohoolela wawe? Nave nni nooniherye hai wi ninnacicimiha olamulelo awe?—Moone Yooleeliherya 9.

3, 4. Ohiphaameya opacenrye hai? Ntakhara heeni ela enneeriha okhala woovila wiiwelela ohoolela wa achu akina?

³ Ntoko achu, nookhalano mathitimanelo a ohiiwelela. Ela epacenrye vaavaa mulopwana ni muthiyana  oopacerya yaachenkaaya. Naamwi yaari oophaameya, awo hiyiiwelenle ohoolela wa Muluku. Ovinyerya vaavaa, achu oothene anayariwa oohiphaameya. Mwawiihiiha, nthowa nimoha nnaneeriha okhala woovila wiiwelela ni weemererya ohoolela wa Yehova ni wa achu ori ohiphaameya wahu. Nthowa nikina ti nawi, achu yaawo Yehova onaaphariheleiye wi enihooleleke, toohiphaameya tho.—Maphatxuwelo 2:15-17; 3:1-7; Salumu 51:5; Aroma 5:12.

⁴ Woona wi naachu oohiphaameya, nookhalano mathitimanelo a wiirumiha. Wiirumiha onneeriha okhala woovila weemererya ohoolela. Ntoko yootakiherya, khalai mmahiku a Aisarayeli, Yehova aamuthanla Mose wi ahoolele nloko Nawe. Mulopwana mmoha awiichaniha Kora, yoowo aari kapuro a Yehova mu iyaakha sincipale, aakhala awiirumiha nave ahinamucicimiha Mose. Naamwi Mose aari muhooleli a achu a Muluku, owo haari muchu awiirumiha. Moohiyana, ennalociwa wi Mose aari muchu awiiyeviha yoowo aakhanle. Nyenya Kora heemererya ohoolela wa Mose. Ophiyerya ahaalekecha achu ancipale wi ekhale o makupa awe nave emmwareele Mose. Tiheeni yeeren’ye ni Kora vamoha ni achu yaawo yaamwaren’ye? Awo yaahiiphiwa. (Namarepela 12:3; 16:1-3, 31-35) Mpiipiliyani, ninnaphwanya sootakiherya sincipale seiho inanihusiha wi wiirumiha echu yawoopiha.—2 Matharihelo 26:16-21; moone Yooleeliherya 10.

5. Ti mwawiihai Sawuli vamoha ni Tavite yaapharihenlaaya moonanara owerya waya wa olamulela?

⁵ Akhweya montoko wiiwa masu awi “Owerya onnahooxa.” Moovira wa iyaakha, achu ancipale anavahiwa owerya annapharihela moonanara owerya yoowo. (Mwaalakhanye Eklesiyaste 8:9.) Ntoko yootakiherya, Sawuli aari muchu aphaama ni awiiyeviha vaavaa Yehova aamuthanlileiye  wi akhale mwene o Isarayeli. Nyenya owo aheemererya wi wiirumiha vamoha ni nrima sivolowele murima awe, nave mikhalelo seiha soonanara saamweeriha omwiikara Tavite, mulopwana yoowo aahipanke echu yoonanara. (1 Samuwele 9:20, 21; 10:20-22; 18:7-11) Ohoolo waya, Tavite aakhala mwene, nave owo aari mwene aphaama a nloko na Aisarayeli. Naamwi hiiha, ophiyerya tho Tavite aapharihela moonanara owerya wawe wa olamulela. Owo aararuwa ni Patesepa, muthiyana a mulopwana mukina awiichaniwa Uriya, nave aheererya ovitha yoocheka awe moorweela wa olamulela wi Uriya iiphiwe okhoconi.—2 Samuwele 11:1-17.

6, 7. (1) Omusivela wahu Yehova onaneeriha opaka eheeni? (2) Tiheeni enahaala onikhaviherya okhala awiiwelela naamwi okhalaka woovila weerano yeeyo?

⁶ Ninnacicimiha ohoolela wa Yehova woona wi ninnamusivela. Omusivela wahu Yehova opwaha echu eri yoothene onnaneeriha opaka soothene wi nimuhakalalihe. (Mwaalakhanye Masiposipo 27:11; Marko 12:29, 30.) Ovinyerya woopaceryani, mu emaca ya Eteni, yoochuna ya Satana waari oweeriha achu waakaaha olamulelo wa Yehova. Musaserya onachuna wi nuupuweleke wi Yehova haano ophwanelela wa onleela echu yaweera. Nyenya noosuwela wi eyo yawootha. Ninneemererya masu ala: “Nyuwo Apwiya Muluku ahu, munnaphwanela waakhela ncicimiho, ovuwa ni owerya. Ti nyuwo mpatunshe ichu soothesene.”—Wupulula 4:11.

⁷ Vaavaa mwaaryaanyu mwaana, akhweya mwaanawiiwelela asitiithi anyu naamwi yahaari yoochuna anyu.  Mmukhalelo mmohamoha, ntoko akapuro a Yehova, ilukuluku ikina onamukhala woovila wiiwelela olamulelo. Nyenya nthowa na omusivela ni omucicimiha Yehova, ninneera soothene nnaweryaahu wi nimwiiwelele yoowo. Yesu oonihiyerya yootakiherya yaphaama. Owo aamwiiwelela Yehova naamwi yahaari yookhwela awe naari wookhweya weerano yeeyo. Ti nthowa nene aalonceiye wa Atiithi awe: “Oheereye okhwela waka, weereye okhwela wanyu.”—Luka 22:42; moone Yooleeliherya 11.

8. Yehova onanihoolela hai? (Moone ekaaxa “ Mweemereryeke Ikano.”)

⁸ Olelo, Yehova onnapharihela makhalelo oohiyanahiyana wi anihoolele. Ntoko yootakiherya, owo oonivaha Piipiliya. Oonivaha tho atokweene mmulokoni. Ninnooniherya wi ninnacicimiha ohoolela wa Yehova vaavaa nnawiiwelelaahu yaale ananihoolela. Wakhala wi ninnakhooca ohoolela waya, ori ntoko okhooca ohoolela wa Yehova. Vaavaa Aisarayeli yaakhoncaaya ohoolela wa Mose, Yehova oonne wi achu awo yaamukhonce yooweene.—Namarepela 14:26, 27; moone Yooleeliherya 12.

9. Ti mwawiihai osivela oneeraaya oneerihe wiiwelela ohoolela nnavahiwaahu?

⁹ Vaavaa nniiwelelaahu ohoolela, nnooniherya wi ninnaasivela annihu vamoha ni arokora ahu. Ntoko yootakiherya, wakhala wi yoophacuwa epahu, annapakiwa marehereryo wi nikhalevo nikhuuru na okhaviherya wi elape vamoha ni yoolakelela ya waakhaviherya achu ancipale. Voocharela onnathanliwa muchu mmoha wi ahooleleke, nave mmoha ti mmoha a nikhuuru nenla onaphwanela ocharihaka ohoolela woothene. Vano, tiheeni enahaala weereya wakhala wi mmoha a nikhuuru nenlo haniiwelela ohoolela naari wi onapaka echu onachuneiye? Naamwi eerakano  ni yoolakelela yaphaama, ohiiwelela wawe onahaala oruuhela nikacamiho wa nikhuuru, ophiyerya tho wi akina anahaala ohooxeya. Mmukhalelo mmohamoha, wakhala wi hannachariha ohoolela nnavahiwaahu ni Yehova vamoha ni yaale owo aavanheiye owerya, akina annahooxeya. Nyenya wakhala wi ninnamwiiwelela Yehova, nnooniherya wi ninnaasivela annihu nave ninnacicimiha marehereryo awe.—1 Korinto 12:14, 25, 26.

10, 11. Tiheeni nnahaalaahu othokororya hiihaano?

¹⁰ Echu eri yoothene Yehova onanivekeiye weera, ennanikhaliha phaama. Wakhala wi ninniiwelela ohoolela wa veechokoni, mmulokoni, vamoha ni ahooleli a elapo, ninnakhalano mphurelo.—Malamulo 5:16; Aroma 13:4; Éfeso 6:2, 3; Ahebri 13:17.

¹¹ Wiiwexexa phaama mathoweene anamweeriha Yehova oniveka owiiwelela akina onnanikhaviherya weerano  yeeyo. Vano hankooni nthokororye mwawaaceererya mukhalelo nneeraahu nooniherye wiiwelela wahu mu makupa mararu a okumi ahu.

12. Mulopwana oni ooniherye hai wi onnamucicimiha Yehova?

¹² Yehova ootikitherya echoko nave oomvaha muchu ti muchu a veechokoni murici awe. Wakhala wi muchu ti muchu onniiwexexa yeeyo Yehova onaweheryeiye wa yoowo, echoko enahaala okhalaka yoohakalaliha nave muchu ti muchu a veechokoni onahaala okhumelelaka phaama. (1 Korinto 14:33) Yehova oomuthanla mulopwana wi akhale muru wa echoko. Yehova onachuna wi owo aahooleleke amwaariye vamoha ni anamwane awe moosivela. Mwawiihiiha, mulopwana onahaala waakhula wa Yehova mmukhalelo owo onaakhaliheiye a veechokoni vawe. Mulopwana ori Mukristu, onaphwanela okhala  oosivela ni ohoolela echoko awe mmukhalelo ntoko Yesu onahooleleiye muloko. Vaavaa mulopwana oneereiyeno yeela, owo onnooniherya wi onnamucicimiha Yehova.—Éfeso 5:23; moone Yooleeliherya 13.

13. Muthiyana oni ooniherye hai wi onnacicimiha ohoolela?

¹³ Muthiyana tho oovahiwa murici woochuneya ni woocicimiheya. Owo onnaakhaviherya aiyawe vaavaa awo aniilipixeryaaya wi ehoolele phaama echoko. Moolikana ni mulopwana, muthiyana tho ookhalano murici wa waasyakiha anamwane. Mukhalelo mmoha wa waahusiha anamwane okhala oocicimiha ori moorweela wa yootakiherya awe. (Masiposipo 1:8) Owo onnacicimiha aiyawe nave onnakhaviherya soolakelela saya. Naamwi owo aheemereryaka ichu ikina, owo onnaloca moonelo awe mmukhalelo woocicimiha. Wakhala wi muthiyana ori Namoona otheliwa ni mulopwana ohiri Namoona a Yehova, owo ookhalano murici mutokweene. Nyenya wakhala wi ootitelela waakhaliha aiyawe moosivela ni waacicimiha, akhweya omwaahiyu anamuchuna omusuwela ni omurumeela Yehova.—Mwaalakhanye 1 Pedro 3:1.

14. Anamwane eni yooniherye hai wi annacicimiha ohoolela?

¹⁴ Anamwane tasisapo wa Yehova, nave tho awo annachuna ohooleliwa ni okhapeleliwa. Wakhala wi anamwane annaacicimiha asitiithi aya, asitiithi aya annahakalala. Echu eri yoochuneyaxa, wakhala wi anniiwelela annooniherya ncicimiho wa Yehova nave annamuhakalaliha. (Masiposipo 10:1) Mu ichoko sincipale, anamwane anaphuiwa ni muchu mmoha tiithi naari mai pahiru. Ela enanwerya okhala yoovila wa ole onaaphuwa vamoha ni anamwane. Nyenya wakhala wi anamwane annaakhaviherya amama aya naari apapa aya, echoko enakhala yoohakalaliha. Moohipwacha makhalelo taani, hiyaavo echoko eri yoophaameya.  Nyenya echoko eri yoothene enanwerya okhala yoohakalala wakhala wi muchu ti muchu onnachariha ohoolela wa Yehova. Ela ennaruuha ncicimiho wa Yehova, Mpatuxa a ichoko soothene.—Éfeso 3:14, 15.

15. Nni nooniherye hai wi ninniiwelela ohoolela mmulokoni?

¹⁵ Yehova onnapharihela muloko wi anihoolele, nave oomvaha Yesu owerya wi ahoolele muloko. (Kolosi 1:18) Yesu oomvaha “namuteko oororomeleya ni a miruku” murici wa waahoolela achu a Muluku veelaponi yavathi. (Mateu 24:45-47) Olelo “namuteko oororomeleya ni a miruku” ti Nikhuuru Noolamulela. Nikhuuru Noolamulela ninnanivaha soothene nnachunaahu wi ntitelele olipiha nroromelo nahu. Atokweene, arummwa oorumeela, ni owehererya a ekulucu annaakhela ohoolela orweela wa Nikhuuru Noolamulela. Anna oothene ala aakhalano murici wa onikhapelela nave awo anahaala waakhula wa Yehova mukhalelo aneecihaaya murici aya. Vaavaa nnaacicimihaahu alopwana yaala, nnamucicimiha tho Yehova.—Mwaalakhanye 1 Tesalónika 5:12; Ahebri 13:17; moone Yooleeliherya 14.

16. Ntakhara heeni nnanwerya oloca wi atokweene ni arummwa orumeela anathanliwa ni munepa waweela?

¹⁶ Atokweene ni arummwa oorumeela annakhaviherya muloko okhala woororomeleya ni wawiiwanana, naamwi eri ohiphaameya hiiha ntoko hiyaano. Vano, awo anathanliwa hai? Anna yaala anaphwanela okhalano mikhalelo inaromoliwa Mpiipiliyani. (1 Timóteo 3:1-7, 12; Tito 1:5-9) Yehova aapharihela munepa awe waweela wi aakhaviherye anamarepa a Piipiliya othariha mikhalelo seiha. Atokweene annavekela wa Yehova evekaka munepa wa weela wi waakhaviherye omuthanla munna yoowo onahaala okhala  mutokweene naari murummwa oorumeela. Chiryene, muloko onahooleliwa ni Yesu vamoha ni Yehova. (Saweriwa T’arummwa 20:28) Anna yaawo anathanliwa wi enikhaviheryeke ni onikhapelela yamahala enarweela wa Muluku.—Éfeso 4:8.

17. Ilukuluku ikina, tiheeni murokora onaphwaneleiye weera wi ooniherye ncicimiho?

¹⁷ Akhweya ikwaha ikina onamukhalavo othowa wa atokweene naari murummwa oorumeela wi ahoolele makupa mmulokoni. Wakhala wi yoheereya hiiha munna mukina opatisiwe onanwerya okhaviherya. Nyenya wakhala wi haavo munna opatisiwe, murokora opatisiwe onanwerya opharelela nikupa nenlo wiiliwiili nnapakiwa ni munna oopatisiwa. Mmukhalelo si yoola, murokora onaphwanela ohuruwela muru awe ni nleeso naari ciphewa. (1 Korinto 11:3-10) Mwa weerano yeeyo, murokora onooniherya ncicimiho wa marehereryo a Yehova, atikitheryiwe va echoko ni mmulokoni.—Moone Yooleeliherya 15.

18, 19. (1) Tiheeni nnahuseryaahu mu Aroma 13:1-7? (2) Nni nooniherye hai wi ninnaacicimiha alamuleli?

¹⁸ Mmahiku ahu yaala, Yehova onneemererya wi alamuleli ekhaleno owerya, nave hiyaano nnaphwanela owiiwelelaka. Awo annarehererya ichu mu epooma naari elapo, nave tho annaavaha achu muteko. Akristu anniiwelela nlakiheryo nnaphwanyeya mu Aroma 13:1-7. (Mwaalakhanye.) Ninnaacicimiha “asitokweene anlamula” nave ninniiwelela malamulo a epooma naari elapo nnakhalaahuwo. Malamulo yaawo ananwerya ovolowela echoko ahu, sookhalano sahu naari wakhala wi ninnatumiha echu. Ntoko yootakiherya, ninnaliva musokho ni ovahererya sooleeliherya  alamuleli anachunaaya osuwela. Vano, tiheeni nnahaalaahu weera wakhala wi alamuleli aaniveka opaka echu yeeyo ehiniiwanana ni malamulo a Muluku? Murummwa Petro aaloca: “Onakhweleya omwiiwelela Muluku, opwaha achu.”—Saweriwa T’arummwa 5:28, 29.

¹⁹ Wakhala wi nnaloca ni alamuleli a elapo, ntoko mulipa oothoriha milacu naari mpilisa, nnaphwanela ilukuluku soothene wooniheryaka ncicimiho. Osikola, anaamiravo anaphwanela waacicimihaka ahusiha aya vamoha ni akina analapa weiwo. Omutekoni, nnaphwanela owiiwelela ahooleli ahu naamwi akina eheerakano. Wakhala wi ninneerano hiiha, nnamutakiherya murummwa Paulo aawiiwelela alamuleli naamwi ilukuluku ikina waari woovila. (Saweriwa T’arummwa 26:2, 25) Naamwi akina enikhalihaka moonanara, nnahaala otitelela wooniherya ncicimiho.—Mwaalakhanye Aroma 12:17, 18; 1 Pedro 3:15.

20, 21. Echu taani yaphaama enahaala weereya wakhala wi ninnaacicimiha akina?

²⁰ Mu elapo yoothene, achu ancipale hanaacicimiha akina. Nyenya achu a Yehova toohiyana. Yoolakelela ahu, ori waacicimiha achu oothene. Ninnachariha ohoolela wa murummwa Petro oni: “Mwaacicimiheke achu oothene.” (1 Pedro 2:17) Vaavaa nnaacicimihaahu akina, awo annoona. Yesu onleela: “Omwaleela wanyu waaryeke vamiithoni va achu, anoonaaya miteko anyu yaphaama yaacicimihe atiithinyu ari wirimu.”—Mateu 5:16.

²¹ Vaavaa nnooniheryaahu ncicimiho va echoko ahu, mmulokoni mwahu, ni mmikhalelo mikina sa okumi ahu, yootakiherya ahu yaphaama enahaala oweeriha akina ochuna ohuserya sincipale vooloca sa Yehova. Nave moorweela wa waacicimiha akina, nnooniherya ncicimiho wa Yehova. Weerano yeela, ennamuhakalaliha Yehova nave ennooniherya wi ninnamusivela yoowo.