1, 2. Tiheeni enaweerihaani omusivela Yehova Muluku?

NYUWAANO munnamusivela Muluku? Ti yawooneya wi munnamusivela vancipale, ophiyerya wi mwiiveleela wa yoowo. Muluku nthamwene anyu oochuneyaxa. Nyenya ovinyerya khalai, muhipacenrye omusivela Yehova, owo aanoosivelaaani. Ninnaalakhanya Mpiipiliyani masu ala: “Hiyo ninnamukhwela ni okhwelana, ntakhara owo topacenrye onikhwela.”—1 Yohani 4:19.

² Nkuupuwelani mikhalelo soothene Yehova oonihenryeiye osivela wawe wa hiyaano. Owo oonivaha elapo yeeyo eri nipuro naphaama vamoha ni ichu soothene nnachunaahu wi nipuhe okumi. (Mateu 5:43-48; Wupulula 4:11) Owo onachuna wi nikhaleno onthamwene waphaama ni yoowo, nave onneeriha wi okhale wooweryeya moorweela wa ohuserya vooloca sa yoowo. Vaavaa nnamwaalakhanyaahu Piipiliya, hiyaano nnanwiriyana Yehova. Nave vaavaa nnavekelaahu, owo tonaniwiriyana. (Salumu 65:2) Owo onnanihoolela ni onilipiha moorweela wa opharihela munepa awe waweela. (Luka 11:13) Ophiyerya wi oomurumiha Mwanawe oochuneya wi anoopole mu yoocheka ni okhwa.—Mwaalakhanye Yohani 3:16; Aroma 5:8.

3. Nni nikhapelele hai onthamwene waphaama ni Yehova?

³ Muupuwele mu elukuluku vakhaani vooloca sa nthamwene anyu eeparipari, yoowo onakhala ni nyuwaano mu  ilukuluku saphaama ni ilukuluku sookacamiha. Onachuneya wiilipixerya wi okhalevo onthamwene woolipa ntoko yoowo. Ti yeeyo tho eneereya ni onthamwene ahu ni Yehova, Nthamwene oochuneya nnaphwanelaahu okhalano. Onthamwene ahu ni yoowo onanwerya wiikhalelaru. Mwawiihiiha Piipiliya onnanleela: “Mwiikhapelele meekhiinyu mu osivela wa Muluku.” (Yuda 21) Nni neereno hai yeela? Piipiliya onnaakhula: “Tiwi, omukhwela wahu Muluku ti wu: Wiiwelela malamulo awe. Malamulo awe hanalimela.”—1 Yohani 5:3.

4, 5. (1) Masu awi “omukhwela . . . Muluku” anataphulela eheeni? (2) Omukhwela wanyu Yehova waapacenrye hai?

⁴ Masu awi “omukhwela . . . Muluku” anataphulela eheeni? Tahi okhwela naari osivela Muluku onooniheryeiye wa hiyaano, nyenya enaahiwa osivela wahu wa yoowo. Nyuwaano munnuupuwela ti liini mwaapacenryaanyu omusivela Yehova?

⁵ Muupuwele ohakalala mwaaraanyuno vaavaa mwaahusenryaanyu mu ekwaha yoopacerya wi Yehova onachuna wi mukhaleno okumi woohimala mu elapo awe esyaani. Mwaahuserya ichu sincipale opankeiye wi yoochuna awe yaakhwanele, nave mwaahiwexexa vooloca sa yamahala yoochuneya Yehova onivanheiye moorweela wa omurumiha mwanawe. (Mateu 20:28; Yohani 8:29; Aroma 5:12, 18) Vaavaa mwaahusenryaanyu wi Yehova onnoosivelaani vancipale, mwaakuxeya murima nave mpacerya tho omusivela.—Mwaalakhanye 1 Yohani 4:9, 10.

6. Onavolowela eheeni omusivela muchu mukina? Omusivela wanyu Muluku waaweerinheeni opaka eheeni?

⁶ Nyenya ala yaari pahi mapacereryo a omusivela wanyu Muluku. Ntoko yootakiherya, wakhala wi ninnamukhwela  naari omusivela muchu mukina, ninnapaka ichu sincipale ohiya pahiru oloca “kinnoosivela.” Osivela onnaneeriha opaka ichu seiho inahaala omuhakalaliha muchu yoowo nnamusivelaahu. Mmukhalelo mmohamoha, omusivela wanyu Yehova onaphwanela oweerihaani ochuna okhala mwawiiwanana ni yeeyo enahaala omuhakalaliha. Vaavaa osivela owo wunnunwaaya, mwaahiiveleela wa yoowo ni opatisiwa. Moorweela wa weerano yeela, mwaaroromeliha wi mwahaala omurumeelaka Yehova mahiku oothene. (Mwaalakhanye Aroma 14:7, 8.) Muni mukhapelele hai nroromeliho nenla?

7. Wakhala wi ninnamusivela Yehova, tiheeni nnahaalaahu weera? Taavi ari malamulo awe yaawo nnaphwanelaahu wiiwelelaka?

⁷ Woona wi ninnamusivela Yehova, ‘ninniiwelela malamulo awe.’ Nneerano hai yeela? Moorweela wa omwiiwelela. Ninnahuserya Mpiipiliyani mukhalelo Yehova onachuneiye wi neeciheke okumi ahu. Ntoko yootakiherya, owo onnanleela wi ti yoonanara ohapaliwa, wiiya, wootha, oraruwa, ocapaheya naari omulapela muchu ntoko muluku omuhiya Yehova.—1 Korinto 5:11; 6:18; 10:14; Éfeso 4:28; Kolosi 3:9.

8, 9. Nni nsuwele hai echu yoophwanela weera wakhala wi hinaavo nlamulo nnaloca mookwakwaleya mwaha yoowo? Mvahe yootakiherya.

⁸ Nyenya wi nimuhakalalihe Yehova, nnaphwanela weera sincipale ohiya pahiru wiiwelela malamulo awe. Owo hanivanhe malamulo oothene analoca echu ti echu mu okumi ahu. Mwawiihiiha, enamukhalavo elukuluku nihinahaalaahu ophwanya Mpiipiliyani nlamulo nooluluwanya nnaloca echu yoophwanela weera. Vano nni niwerye hai opaka soolakelela saphaama? (Éfeso 5:17) Mpiipiliyani  ninnaphwanyamo malakiheryo, yaawo ari mathipelo a iparipari yaawo ananikhaviherya wiiwexexa mukhalelo Yehova onooneiye ichu. Vaavaa nnamwaalakhanyaahu Piipiliya, ninnamusuwela Yehova ntoko Muchu. Ninnahuserya mukhalelo onuupuweleiye, ophitaanyerya ichu inamusivela ni sinamunanara.—Mwaalakhanye Salumu 97:10; Masiposipo 6:16-19; moone Yooleeliherya 1.

⁹ Ntoko yootakiherya, tiheeni eni enikhaviherye olakelela vooloca sa yeeyo nnaphwanelaahu woona mu TV naari mu interneti? Yehova hananleela mwawooneya echu nnaphwanelaahu weera. Nyenya malakiheryo onivanheiye anamunikhaviherya opaka soolakelela saphaama. Mathatelo mancipale olelo aaphotoweleya ni ocapaheya vamoha ni owali. Ninnahuserya Mpiipiliyani wi Apwiya Yehova “annamwiica aweera soonanara” nave wi “Muluku onamwaathoriha aweeca pure ni anamararuwe.” (Salumu 11:5; Ahebri 13:4) Malakiheryo ala eni enikhaviherye hai opaka soolakelela saphaama? Wakhala wi noosuwela wi Yehova onniica echu naari onnathanya, nnaphwanela osepa echu yeeyo.

10, 11. Tiheeni enaneeriha omwiiwelela Yehova?

¹⁰ Ntakhara heeni nnamwiiwelelaahu Yehova? Tahi nthowa na woova olakiwa naari nthowa na makacamiho anakhumelela wakhala wi noopaka soolakelela soonanara. (Galasya 6:7) Ninnamwiiwelela Yehova nthowa nawi ninnamusivela. Hiiha ntoko anamwane anachunaaya waahakalaliha asitiithi aya, hiyaanotho nnachuna omuhakalaliha Tiithi ahu a wirimu. Hiyaavo eri yaphaamaxa opwaha osuwela wi Yehova onnahakalala ni hiyaano!—Salumu 5:12; Masiposipo 12:2; moone Yooleeliherya 2.

¹¹ Hiyaano hinnamwiiwelela Yehova pahiru wakhala wi echu eyo ti yookhweya naari wakhala wi hinaano yoothanla ekina. Nave hinnathanla malamulo naari malakiheryo  taani nnahaalaahu ochariha nave taavi nihinahaalaahu wiiwelela. (Malamulo 12:32) Moohiyana, ninnamwiiwelela Muluku ni murima ahu woothene, hiiha ntoko namarepa a Salumu aalonceiye: “Kinnahakalalano malamulo anyu, yaawo kinakhwelaaka.” (Salumu 119:47; Aroma 6:17) Hiyaano nnachuna okhala ntoko Nowa, yoowo oonihenrye ororomeleya wawe wa Yehova moorweela wa opaka ichu soothene Yehova aamurummeiye opaka. Piipiliya onnaloca wi Nowa “aaheerano soothene.” (Maphatxuwelo 6:22) Hamunachuna wi Yehova aloce masu mamohamoha wa nyuwaano?

12. Nni nimuhakalalihe hai Yehova?

¹² Yehova onoona hai vaavaa nnamwiiwelelaahu? Hiyaano ‘ninnahakalaliha’ murima awe. (Masiposipo 11:20; 27:11) Nkuupuwelani ela! Ninnamuhakalaliha Mpatuxa a elapo yoothene vaavaa nnamwiiwelelaahu. Nyenya owo hananikhinyererya omwiiwelela yoowo. Moohiyana, owo oonivaha othanla wootaphuwa. Ela enataphulela wi, nookhalano otaphuwa wa othanla opaka yeeyo eri yaphaama naari eri yoonanara. Yehova onachuna wi omusivela wahu oneerihe opaka soolakelela seiho sinahaala oneeriha okhalano okumi waphaama.—Malamulo 30:15, 16, 19, 20; moone Yooleeliherya 3.

13, 14. Nnasuwela hai wi malamulo a Muluku tahi oovila wiiwelela? Mvahe yootakiherya.

¹³ Vano hanka wakhala wi nnuupuwela wi malamulo a Yehova toovilaxa wiiwelela naari wi anahaala oneeriha ohikhalano othanla wootaphuwa? Piipiliya onnaloca mookwakwaleya: “Malamulo awe hanalimela.” (1 Yohani 5:3) Masu ala mu Ekiriki awi “olimela” anataphulela “ohokola.” Mu soorepa sikina, masu ala anaphariheliwa wi ethoonyerye  malamulo anaahooxa akina naari achu yaawo anahoolela ni waahooxa akhwaaya. Piipiliya Masu a Muluku onaloca ha: “Malamulo awe hanalimela.” Malamulo a Yehova ‘hanahokola,’ ela ti wi, malamulo awo hari oovilaxa wa hiyaano wiiwelela. Owo toophimelela vooloca sa ichu onanivekeiye.

¹⁴ Ntoko yootakiherya, nkaanyiheryani wi munamukhaviherya nthamwene anyu othaamela empa ekina. Owo onnamaka maphuta oohiyanahiyana. Maphuta makina tooveya, nyenya makina toolimela nave annachuneya achu apiili wi eteexe. Apwanne nthamwene anyu ahaala woovekaani wi muteexe meekhiinyu niphuta nenle noolimela? Hooye, owo hi eereno! Ntakhara heeni? Woona wi owo hanachuna wi muhooxeye. Ntoko nthamwene yoola, Yehova harwa aniveka opaka echu yeeyo eri yoovilaxa. (Malamulo 30:11-14) Apwiya Yehova “annasuwela opakiwa wahu. Annuupuwela wi hiyo na nchupi.”—Salumu 103:14.

15. Ntakhara heeni nnaphwanelaahu ororomela wi malamulo a Yehova annanikhaviherya okhala phaama?

¹⁵ Mose aaloca wa nloko na Isarayeli wi malamulo a Yehova yaari wi yaakhaviherye ‘okhala phaama’ nave moorweela wa wiiwelela yahaala otitelela “okhala akumi.” (Malamulo 5:28-33; 6:24) Emohamoha tho olelo. Echu eri yoothene Yehova onanivekeiye weera, enahaala weeriha wi okumi ahu okhale waphaama. (Mwaalakhanye Isaiya 48:17.) Tiithi ahu Yehova, ilukuluku soothene onnasuwela tiheeni eri yaphaama wa hiyaano. (Aroma 11:33) Piipiliya onnanleela: “Muluku ti osivela.” (1 Yohani 4:8) Ela enataphulela wi osivela tonamweeriha Yehova oloca ni weera echu eri yoothene.

16. Nnasuwela hai wi ti wooweryeya omwiiwelela Yehova naamwi nri achu oohiphaameya nave nikhalaka mu elapo yeela yootakhala?

¹⁶ Tahi wi ilukuluku soothene ti wookhweya wa hiyaano omwiiwelela Muluku. Nnakhala mu elapo yootakhala  yeeyo enalamuleliwa ni Musaserya. Owo onnaahuweliha achu wi enapaka yeeyo eri yoonanara. (1 Yohani 5:19) Navetho ninnawaniha ni ichu seiho inahaala oneeriha ohimwiiwelela Muluku ntoko ohiphaameya wahu, mukhalelo nnuupuwelaahu ni nnoonaahu. (Aroma 7:21-25) Nyenya omusivela wahu Yehova onnanivaha olipa murima wi nipake yeeyo eri yaphaama. Owo onnoona wiilipixerya wahu woothene wa omwiiwelela, nave onnanikhaviherya moorweela wa onivaha munepa awe waweela. (1 Samuwele 15:22, 23; Saweriwa T’arummwa 5:32) Munepa waweela onnanikhaviherya winnuwiha mikhalelo seiho inaneeriha wi okhale wookhweya omwiiwelela Yehova.—Galasya 5:22, 23.

17, 18. (1) Tiheeni nnahaalaahu ohuserya mu liivuru yoola? (2) Tiheeni nnahaalaahu othokororya mmwaha onacharela?

¹⁷ Mu liivuru yoola, nnahaala ohuserya mukhalelo wa okumi yoowo onamuhakalaliha Yehova. Nnahaala tho ohuserya mukhalelo wa opharihela malakiheryo awe vamoha ni malamulo awe mu okumi ahu. Muupuwele wi Yehova harwa anikhinyererya omwiiwelela. Vaavaa nnathanlaahu okhala awiiwelela, okumi ahu onnakhala waphaama nave nnahaala okhalano omwaahiyu woohakalaliha ni wooreera. Nave echu yoochuneyaxa, wiiwelela wahu onahaala wooniherya omusivela wahu Muluku.—Moone Yooleeliherya 4.

¹⁸ Wi anikhaviherye osuwela yeeyo eri yaphaama ni eri yoonanara, Yehova oonivaha yawuupuxerya-ya-murima. Wakhala wi ninnasyakiha yawuupuxerya-ya-murima ahu, enanwerya onikhaviherya ‘wiikhapelela meekhihu mu osivela wa Muluku.’ Mwawiihiiha, yawuupuxerya-ya-murima tiheeni, nave nni nisyakihe hai? Nnahaala othokororya makoho yaala mmwaha onacharela.