1-3. (1) Yamahala taani yoohakalaliha Yehova onivanheiye? Mmukhalelo taani nahaalaahu opharihela moonanara? (2) Nnaphwanela opharihela hai yamahala yeela ya oloca?

TIITHI mmoha onnamvaha mwanawe mutokweene ecika. Tiithi onnahakalala nthowa na omvaha mwanawe yamahala yeela. Nyenya hanka wakhala wi mwaana owo haano ekaasoope vaavaa oneeciheiye ecika eyo ophiyerya amphoreiha muchu mukina? Apwanne Atiithi awe anahaala osiveliwa?

² Yehova Mulipa oovaha “yoovaha yoothene yaphaama” vamoha ni “yamahala yoothene yawaakhwana.” (Tiyako 1:17) Emoha ya samahala owo onivanheiye ori owerya oloca. Moorweela wa oloca, ninnawerya okumiherya vaate moonelo ahu. Ninnawerya oloca ichu sinaahakalaliha akina. Nyenya yeeyo nnalocaahu tho enanwerya waaphoreiha akina ni oruuha wiicela.

³ Yehova oosuwela wi masu aakhalano ikuru, va nthowa na yeeyo onnanihusiha mukhalelo waphaama wa opharihela masu. Owo onnanleela: “Mwaano mwaa, ohikhumekemo masu oonanara, nto yaaworu aphaama, oolipiha ntoko onakhweleyaaya, awaavaha mahala yaawo anawiiwa.” (Éfeso 4:29) Hankooni noone mukhalelo wa  opharihela yamahala yeela ya Muluku enahaala omuhakalaliha Yehova ni waahakalaliha akina.

4, 5. Tiheeni Liivuru a Masiposipo onanihusiheiye vooloca sa ikuru sa masu?

⁴ Masu aakhalano ikuru, vanthowa na yeeyo nnaphwanela okhalano ekaasoope ni yeeyo nnalocaahu ni mukhalelo nnalocaahu. Masiposipo 15:4 oni: “Masu ookurunusha murima, murece, mwiri wa ekumi, nto masu ootakhala, wiiceliha murima.” Hiiha ntoko mwiri waphaama onavahaaya muuruxi waphaama, masu aphaama annahakalaliha ni ohakararya. Nto masu oopwaalu wiiceliha murima.—Masiposipo 18:21.

⁵ Masiposipo 12:18 oni: “Muchu eemwaanomwaano, masu awe weetha ntoko nlema.” Mwawiihiiha masu ootakhala annaruuha wiicela otokweene nave annawiicaniha achu yaari asinthamwene. Akhweya nyuwaano montoko ophoreihiwa ni masu yaawo muchu mukina aalonceiye. Nyenya yoorepa yeela ennaloca makupa aphaama eriki: “Masu a muchu a miruku murece.” Masu oophwanelela ananwerya openusa murima woophoreya. Nave tho ananwerya waakhaviherya asinthamwene yaawo yaarino makacamiho ophiyerya okhurumuwelana. (Mwaalakhanye Masiposipo 16:24.) Wuupuwela wi masu ahu annaavolowela akina, enahaala onikhaviherya opharihela ni ekaasoope.

6. Ntakhara heeni ti woovila ovareryela yeeyo nnalocaahu?

⁶ Mathowa makina nryaahuno wi nikhalekeno ekaasoope ni yeeyo nnalocaahu tiwi oothene hiyo na achu oohiphaameya. Piipiliya onaloca wi “wuupuwela waya [achu] ti woonanara, opacerya woonamwane waya,” nave  masu ahu annooniherya yeeyo nryaahuno mmurimani mwahu. (Maphatxuwelo 8:21; Luka 6:45) Vanthowa na yeeyo, ovareryela yeeyo nnalocaahu onamukhala woovila. (Mwaalakhanye Tiyako 3:2-4.) Nyenya sookhalavo ichu seiho nnaphwanelaahu weera wi nrehererye mukhalelo nnalocaahu.

7, 8. Ntakhara heeni nnaphwanelaahu okhalano ekaasoope ni yeeyo nnalocaahu ni mukhalelo nnalocaahu?

⁷ Nave tho nnaphwanela ovareryela yeeyo nnalocaahu ni mukhalelo nnalocaahu nthowa nawi eyo ennavolowela omulapa wahu Yehova. Tiyako 1:26 oni: “Muchu aaniiseera oomulapa Muluku, ahinahiiha nlumi nawe, onniiwoka mmurimani mwawe nave olapa wawe ti wasiiyo.” Mwawiihiiha, wakhala wi hannakhalano ekaasoope ni yeeyo nnalocaahu, nnahaala onanariha naari oyeleela onthamwene ahu ni Yehova.—Tiyako 3:8-10.

⁸ Chiryene, nookhalano mathowa aphaama a okhalakano ekaasoope ni yeeyo nnalocaahu ni mukhalelo  nnalocaahu. Wi niwerye opharihela masu ahu mmukhalelo Yehova onachuneiye, hankooni noone masu taani nnaphwanelaahu osepa.

9, 10. (1) Masu a mukhalelo taani ari awunlaana olelo? (2) Ntakhara heeni ninnasepa masu oonanara?

⁹ Opharihela masu oonanara, ni oloca sa pure, ti wawunnlaana olelo. Ancipale anuupuwela wi pahiru anahaala owiriyaniwa wakhala wi aapharihela masu oohiphwanelela naari masu a munyemu. Achu analoca miyaha sootheiha annasiveliwa opharihela masu oophuca naari oloca ichu sa pure wi yaatheihe achu. Nyenya murummwa Paulo aaloca: “Nto vano, muhiye seiya soothene: Onanariwa, esara, sootakhala, munyemu, ni sooloca sawuuliha muru sookhuma mwaano mwanyu.” (Kolosi 3:8) Owo aaloca wi “sootakhala sikina” sihooneye “nari mano oromoliwa” variyari va Akristu eeparipari.—Éfeso 5:3, 4.

¹⁰ Masu oohiphwanelela annamuthananiha Yehova vamoha ni yaale nnakhalaahuno. Eyo echu yoonanara, yoothanyeya. Galasya 5:19-21, onaloca wi “weeca pure” onnapaka makupa a “miteko sa mwiili.” Soocheka soohiyanahiyana sinniichaniwa tho ntoko “weeca pure,” nave yookhovelela yooriipiheya emoha ennakeriha wa ekina. Wakhala wi muchu ookhalano yookhovelela ya oloca masu oonanaraxa nave ahinachuna ocharuwa, owo onahaala wiikariwa mmulokoni.—2 Korinto 12:21; Éfeso 4:19; moone Yooleeliherya 23.

11, 12. (1) Ti mwawiihai ochekula onaweryaaya okhala waapa? (2) Ntakhara heeni nnaphwanelaahu osepa omootherya muchu?

¹¹ Nave tho hinnachuna okhala alipa awaapa. Ti yaphaama waapwacha achu ni ochuna oloca yeeyo eneereya ni ahima vamoha ni asinthamwene ahu. Mu elukuluku  ya arummwa, Akristu yaanachuna osuwela murecele wa annaya ni echu yeeyo awo yaaphwanelaaya weera wi yaakhaviherye. (Éfeso 6:21, 22; Kolosi 4:8, 9) Nyenya woopelela mwaha vooloca sa akina onanwerya okhala waapa. Wakhala wi nootitelela oloca sa akina, akhweya nnahaala olocaka ichu sihiri seeparipari naari miyaha sa weephiini sa muchu mukina. Wakhala wi hinaano ekaasoope ochekula wa mukhalelo yoowo onahaala okhala omootherya muchu owo, naari wootha. Afarisi yaamootherya Yesu vaava yaaloncaaya ichu seiho owo aaheenreiye. (Mateu 9:32-34; 12:22-24) Wootha onnananariha nsina naphaama na muchu, onnatan’nya waakhulana nave onnamaliha onthamwene.—Masiposipo 26:20.

¹² Yehova onachuna wi niphariheleke masu ahu wi naakhaviherye ni waahakalaliha akina, ohiya owiicaniha achu ari asinthamwene. Yehova onnamwiica “yoowo onawiicaniha anna.” (Masiposipo 6:16-19) Yawootha yoopacerya yeeriweno ni Satana Musaserya, yoowo aamoothenrye Muluku. (Wupulula 12:9, 10) Olelo, ti yawunlaana achu owootherya akina. Nyenya eyo henaphwanela weereya ni Akristu eeparipari. (Galasya 5:19-21) Mwawiihiiha, nnaphwanela okhalano ekaasoope mwa yeeyo nnalocaahu nave elukuluku yoothene wuupuwela nihaakumve oloca. Muhaakumve omwaramwaxa echu vooloca sa muchu mukina, mwiikohe: ‘Apwanne eparipari? Ti yaphaama? Apwanne enahaala okhaviherya echu? Kinahaala wuuliwa muru wakhala wi mwaneene oosuwela yeeyo kiloncaaka? Kaahaala woona hai waakhanle wi achu aaloca yeela wa miyaano?’—Mwaalakhanye 1 Tesalónika 4:11.

13, 14. (1) Masu oophuca anaavolowela hai achu? (2) Oroha tiheeni? Ntakhara heeni Akristu anaphwanela osepa waaroha akina?

¹³ Ilukuluku ikina, oothene hiyo ninnaloca ichu seiho ohoolo waya nnakhalaahuno ekeerelani. Nyenya  hinnachuna wi ekhale yookhovelela ahu owaakaaha akina, ni oloca masu ooroha. Munyemu honaphwanela opaka makupa a okumi ahu. Paulo aariye: “Muhiye masu oothene oowaawa, esara, onanariwa, mawoowo, munyemu ni soonanara soothene.” (Éfeso 4:31) Apiipiliya akina anataphulela masu ala awi “munyemu” ntoko “opwalu,” naari “masu ootakhala.” Oloca masu oophuca, anneeriha wi muchu mukina anakhala awuuliheya muru, oohikhalano esisapo. Nnaphwanela okhalano ekaasoope xaxaxa vaavaa nnalocaahu ni anamwane, woona wi awo tooceecheya nave ananwerya ohica moohilekela nthowa na masu ahu.—Kolosi 3:21.

¹⁴ Piipiliya onnaloca wi mukhalelo woonanaraxa wa opharihela masu ori oroha. Oroha ori omuhiphela muchu mukina ni masu ni yoolakelela ya omphoreiha. Enakhala yoothananiha wakhala wi muchu onnamulocela mwaariye, iyawe naari anamwane masu ntoko yaala. Mweeparipari, muchu yoowo ohinachuna ohiya waaroha akina onaphwanela wiikariwa mmulokoni. (1 Korinto 5:11-13; 6:9, 10) Ntoko nimanlaahu woona, oloca sa pure, ichu sawootha, naari waaphuca akina enahaala onanariha onthamwene ahu ni Yehova vamoha ni akina.

15. Masu a mukhalelo taani nnaphwanelaahu opharihela wi naalipihe akina?

¹⁵ Nni niwerye hai opharihela masu mmukhalelo yoowo Yehova onachuneiye? Naamwi Piipiliya ahilocaka mookwakwaleya echu yeeyo nnaphwanelaahu naari nihinaphwanelaahu oloca, owo onnanleela wi nloceke masu “yaaworu aphaama.” (Éfeso 4:29) Masu aphaama ti yaawo ari oophwanelela, eepewe, ni eeparipari. Yehova onachuna wi niphariheleke masu ahu wi naakhaviherye ni  waalipiha akina. Eyo enamukhala yoovila, woona wi ti wookhweya oloca masu oophoreiha ohiya aphaama. (Tito 2:8) Hankooni noone mukhalelo nneeraahu naakhaviherye akina moorweela wa masu ahu.

16, 17. (1) Ntakhara heeni ti yaphaama waathamalela akina? (2) Taani nnaphwanelaahu omuthamalela?

¹⁶ Yehova vamoha ni Yesu annasiveliwa othamalela, nave hiyaano nnachuna waatakiherya. (Mateu 3:17; 25:19-23; Yohani 1:47) Masu a othamalela aakhalano owerya wa waalipiha akina. Nyenya wi ewerye olipiha, othamalela wahu onaphwanela okhala weeparipari nave nooniherye wi ninnaapwacha. Masiposipo 15:23 oni: “Ti wooreera masu ene ephiyenrye elukuluku aya.” Ninnatepa ohakalala vaavaa muchu mukina onanithamaleleiye wa echu yeeyo nenraahu.—Mwaalakhanye Mateu 7:12; moone Yooleeliherya 27.

¹⁷ Wakhala wi mookhalano yookhovelela woona makupa aphaama a akina, onahaala okhala wookhweya waathamalela. Taani munaphwanelaanyu omuthamalela? Nnawerya omuthamalela munna yoowo oniirehererya phaama wi aloce phaama mwaha awe, muchu yoowo oniilipixerya wi avahe maakhulo mmuthukumano naari mmiravo yoowo oniilipixerya okhala oororomeleya oxikola naari muchu awuuluvala ohinacompela muteko woolaleerya. Nthamalelo enamukhala echu yeeyo awo anachunaaya vancipale. Ti woochuneya tho mulopwana omuleela mwaariye wi onnamusivela nave wi onnathamalela soothene oneereiye. (Masiposipo 31:10, 28) Hiiha ntoko mwiri onachunaaya nsuwa vamoha ni maahi, achu tho annachuna osuwela wi annacicimihiwa. Eyo enneereya xaxaxa ni anamwane. Mwaasye makhalelo a waathamalela anamwane wa ichu saphaama aneeraaya. Eyo  enahaala waavaha olipa murima anachunaaya wi etitelele weera yeeyo eri yaphaama.

18, 19. Ntakhara heeni nnaphwanelaahu weera soothene wi naalipihe ni waahakararya akina? Nni neereno hai?

¹⁸ Vaavaa nnaalipihaahu ni waahakararya akina, nnamutakiherya Yehova. Owo onnaathokororya vancipale “achu oohooshiwa” ni “a murima wawiiyeviha.” (Isaiya 57:15) Yehova onanceenyerya ariki: “Mulipihaneke ni otikitheryana mukina ni mukhwaawe” ni “mwaahakalaliheke oovolola.” (1 Tesalónika 5:11, 14) Vaavaa nniilipixeryaahu weerano yeela, Yehova onnoona nave onnahakalala.

¹⁹ Akhweya mmulokoni mwanyu ookhalamo muchu ooceecheya naari onachuna ohakararyiwa. Tiheeni  munaphwanelaanyu oloca wi mmukhaviherye? Eparipari wi akhweya nyuwaano hamunawerya omaliha makacamiho awe, nyenya munanwerya wooniherya wi nyuwaano munnamuthokororya. Ntoko yootakiherya, nyuwaano munanwerya omaliha elukuluku ni yoowo. Mwaalakhanye yoorepa emoha yoolipiha ya Mpiipiliyani naari ovekela vamoha ni yoowo. (Salumu 34:18; Mateu 10:29-31) Mmuleele wi anna mmulokoni annamusivela vancipale. (1 Korinto 12:12-26; Tiyako 5:14, 15) Nave muloce mmukhalelo onahaala wooniherya wi muneera ni murima woothene.—Mwaalakhanye Masiposipo 12:25.

20, 21. Tiheeni eneeriha okhala wookhweya weemererya miruku?

 ²⁰ Nnanwerya tho waahakararya akina moorweela wa waavaha miruku. Naachu oohiphaameya, nthowa na yeeyo oothene hiyo ninnachuna miruku mu ilukuluku ikina. Masiposipo 19:20 oni: “Owiriyane olopoliwa, weemererye olakiwa, wi okhale amiruku mahiku aa a muhoolo.” Tahi atokweeneru a mmulokoni pahiru anaphwanela ovaha miruku. Asitiithi anaphwanela waavaha malakiheryo anaaya. (Éfeso 6:4) Nave arokora tho ananwerya ovahana miruku. (Tito 2:3-5) Hiyaano ninnaasivela anna. Mwawiihiiha, vaavaa nnaavahaahu miruku nnachuna weerano nihaaphoreihale. Tiheeni eni enikhaviherye?

²¹ Montoko waakhela miruku seiho monnaanyu okhala sookhweya ochariha? Ntakhara heeni saaraaya sookhweya? Woonaru nthowa nawi mwaahoona wi muchu owo onnoopwachaani. Akhweya muchu owo aalonce moosivela ni mwaphaama. (Kolosi 4:6) Nave tho woonaru, miruku sa muchu owo saarweela Mpiipiliyani. (2 Timóteo 3:16) Naamwi nihaalakhanyaka Mpiipiliyani elukuluku yeeyo, miruku sahu sinaphwanela okhala mwawiiwanana ni Masu a Muluku. Hannaphwanela waakhinyererya akina ochariha moonelo ahu, naari ompharihela Piipiliya moonanara wi niiwananihe ni moonelo ahu. Wuupuwelela mukhalelo wa ovahiwa miruku yoowo waahaala onisivela onahaala onikhaviherya osuwela mukhalelo waphaama wa waavaha miruku akina.

22. Nyuwaano munachuna opharihelaka hai masu anyu?

²² Oloca, yamahala ya Yehova. Omusivela wahu yoowo, onahaala oneeriha wiilipixerya opharihela phaama yamahala yeela. Masu aakhalano owerya wa ophoreiha naari ohakalaliha. Wuupuwelela yeela enahaala onikhaviherya opharihela masu wi naalipihe ni waahakalaliha akina.