OPACERYIHA OVAANELA
YOOHUSERYA 3
Ooreera Murima
Nlakiheryo: “Osivela ti . . . wooreera murima.” —1 Ako. 13:4.
Tiheeni Yesu Opankeiye?
1. Moone EXILEMA, naari mwaalakhanye Yohani 9:1-7. Voocharela, mwaakhule makoho anacharela:
-
Ti heeni Yesu opankeiye woopaceryani: Apwanne aahimpenuxa mulipa eevaasi naari aahiloca ni yoowo sa michaka saphaama?—Mmoone Yohani 9:35-38.
-
Ntakhara heeni nnanwerya oloca wi mukhalelo Yesu aalonceiye waahimweeriha mulopwana yoole okhalano nchuno na owiriyana michaka saphaama?
Tiheeni Nnahuseryaahu Orweela wa Yesu?
2. Muchu onahaala okhala oorehereya owiriyana michaka sahu wakhala wi ohoona wi munnampwacha.
Mmutakiherye Yesu
3. Mukhale aniphwanya. Mweereryeke wiihela mu nipuro na muchu owo, nave mwaanyiherye mukhalelo owo oniisooneiye.
-
Mwiikohe: ‘Sawuukhula taani akhweya oryeiyeno? Tiheeni aahaaleiye woona okhala yoochuneya ni yoophara muteko?’ Wuupuwelela seiya, enahaala wookhaviheryaani wooniherya oreera murima mmukhalelo wooyariwano ni mweeparipari.
-
Mooniherye wi munnampwacha muchu owo moorweela wa owiriyana yeeyo onaloceiye. Wakhala wi muchu onnooleelaani mukhalelo oniisooneiye vooloca sa echu naari wakhala wi onootharihelaani sa nikacamiho onahooleleiye, muhitoroke mwaha onaloceiye.
4. Muloceke mooreera murima ni mwa ncicimiho. Wakhala wi munnamoriwa ikharari nave mweeparipari munachuna omukhaviherya, eyo enakhala yawooneya moorweela wa mukhalelo anyu wa oloca. Ti waphaama othanlelaka masu ni wuupuwelela mukhalelo masu anyu anavuwaaya. Ohiya yeeyoru, musepe oloca ichu seiyo inahaala omunyenyeiha.
5. Mweerekevo echu. Mpharihelaka ophimelela, mwaavyeke ikari wi mmukhaviherye muchu owo mmukhalelo wa wooneya. Mikhalelo sa omoriwa ikharari inanwerya ohula ikari sa opaceryiha ovaanela.
