Vano nihiku naneeraru ovinyerya vaavale Natanayeli okhanleiye mmoha a amuhuserya oopacerya a Yesu. Yesu ni oohuserya avyaani annapaka mukwaha eyaaka epooma aya, o Kalileya. Yoolakelelaaya ori ophiya epooma Natanayeli oyariweiyewo, nthowa nawi aawompwa ntakhara efesta ya othela. Kanani epooma enaphwanyeya omoko wo Nasareti, weiwo Yesu unnunweiyewo.

Amannya a Yesu aawoompwatho. Ntoko nthamwene a emusi yeeyo enathela, enakhala wi Mariya ookhalano makupa a okhaviherya aakhapelelaka achu ancipale awompwe. Mwawiihiiha ohaakuvela woona yoothowa, yeeyo onamuleeleiye Yesu: “Hanono evinyu.”—Yohani 2:3.

Mweeparipari, Mariya onamveka Yesu wi apake echu vooloca sa othowa wa eviinyu. Apharihelaka masu anooniherya okhooca, Yesu onnaloca: “Muthiyana, erivo yahu ti seni?” (Yohani 2:4) Ntoko Mwene othanliwe ti Muluku, Yesu, muteko awe onahooleliwa ni Tiithi awe awirimu, ohiya ni emusi naari asinthamwene. Mwa miruku, Mariya onnahiya mwaha mmatani mwa mwanawe, pahiru alocaka wa yaale anarumeela: “Mwere yeyo onereiye olèleni!”—Yohani 2:5.

Sookhalavo mino sa maahi mithanu nammoha, muno ti muno onnavolowamo ilitro 40. Yesu onnaaleela akhaviheryi: “Musarihe mino ni mahi.” Voocharela Yesu onnaloca: “Rikani ni mukerihe wa mutokwene a vamesa.”—Yohani 2:7, 8.

Mutokweene a vameesa onnatikhiniheya moorweela wa osiva wa eviinyu nyenya hasuwenle wi epakiwe mmukhalelo wootikhiniha. Amwiichanaka mutheli, owo onnaloca: “Atxhu othene anapatxerya oruha evinyu yosiva nave oholo waya, alipa òwompwa yahakalalà t’anaruhaya ele yohisiva. Nto weyano wàkun’he evinyu yosiva mpaka vano.”—Yohani 2:10.

Ela yootikhiniha yoopacerya Yesu opankeiye. Vaavaa amuhuseryaawe anoonaaya yootikhiniha yeela, nroromelo naya ninnalipiheya. Voocharela, Yesu ni amannya ni asinnawe oomaayi annapaka mukwaha eyaaka o Kafarnau ohico wa Eniya yo Kalileya.