Amalinhe mahiku makhumi masese otakhwani Yesu onnakookela wa Yohani, yoowo ampatinse. Vaavaa Yesu onamwaacameleiye, Yohani onnamuthoonya nave onnakhuwela wa yaale oreiyeno: “Onani eputxeputxhe ya Muluku, enatxipiha yotxheka ya elapo. Ti yole kamulotxaka, kiriki: otxuli waka onnarwawo mutxhu okipwan’he miyo, wona wi owo àkhala, miyo kihakunve.” (Yohani 1:29, 30) Naamwi Yohani ti mutokweene ompwaha Yesu, owo onnasuwela wi Yesu aahikhala yene ahaakumve, nave aakhala wirimu.

Isumana vakhaani muculi, vaavaa Yesu aarwiileiye wi apatisiwe, enakhala wi Yohani haalekechen’ye wi Yesu aari Mesiya chiryene. Yohani onneemererya: “Miyo nkamusuwela, nto wi yowo oneihiwe wa Isarayele kirwelaka opatisa ni mahi.”—Yohani 1:31.

Yohani onnatitelela oloca wa alipa oowiriyana awe yeeyo yeeren’ye vaavaa ampatinseiye Yesu: “Miyo kìhona Munepa omukhuruwelaka yowo wirimu ntoko ekakaiya, olekelaka wa yowo. Nave miyo nkamusuwela, nto yole okirumme opatisa ni mahi t’okilènle: ‘Yole onerawe omone Munepa omukhuruwelaka ni olekelelaka wa yowo, ti yowo onapatisa mwa Munepa Wawela.’ Vano miyo kòmona ni kinnalokoha wi owo ti Mwana a Muluku.”—Yohani 1:32-34.

Yohani ori ni oohuserya awe apiili mu nihiku noocharela vaavaa Yesu onaacameleiye wanaawiili. Yohani onnaloca: “Onani eputxeputxhe ya Muluku!” (Yohani 1:36) Mu elukuluku ela, oohuserya apiili a Yohani Mpatisi annamuchara Yesu. Mmoha oniichaniwa Antreya. Akhweya mukina ti mmoha yoowo orempe yaweereya yeela, yoowotho oniichaniwa Yohani. Enakhala wi Yohani ola ti munna a ohima a Yesu, owo mwaana a Salome. Owo akhweya murokora a Mariya, nave iyawe ti Sepetewu.

Arukunuwaka nave amoonaka Antreya ni Yohani emucharaka, Yesu onnaakoha: “Munasyani?”

“Rabbí,” awo annamukoha, “omanke wowi?”

Yesu onnawaakhula “Rwani monewo!”—Yohani 1:37-39.

Vano ewora yaneesese ya othana, nave Antreya ni Yohani annakhala ni Yesu ophiyerya ohiyu. Antreya ootepa ohakalala ophiyerya wi onnamphwanya munnawe, Simoni, oniichaniwaatho Petro, nave onnamuleela: “Nòmphwanya Mesiya.” (Yohani 1:41) Antreya onnamukeriha Petro wa Yesu. Saweereya soocharela sinnooniherya wi Yohani onnamphwanya munnawe, Tiyako nave amukeriha wa Yesu; nyenya Yohani haphitaanyenrye yaweereya ela mu soorepa sawe.

 Nihiku noocharela, Yesu onnamphwanya Filipi, yoowo onarweela o Petisaita. Iwo waacamela omoko wa Eniya yo Kalileya nave ti epooma ya Antreya ni Petro. Yesu onnanwopa Filipi: “Okitxhareke.”—Yohani 1:43.

Voocharela Filipi onnamphwanya Natanayeli, oniichaniwaatho Partolomeyo, nave onnaloca: “Nòmphwanya yole orempwe ti Mose mmalamuloni, ni orempwe ti alipa a miririmu: Yesu, mwana a Yosefe, o Nazaré.” Natanayeli onnakhwa minikwa nave onnaloca wa Filipi: “O Nazaré onnawerya okhumawo etxhu yaphama?”

Filipi onnanwopa: “Orwe ni wone!” Yesu onnamoona Natanayeli aacamelaka nave onnaloca: “Moneni mutxhu èparipari a Isarayél; mwa yowo hiwamo owoka.”

Natanayeli onnamukoha: “Okisuwenle wowi?”

Yesu onnamwaakhula: “Filipi ahakunve owitxhana, miyo kòwona ori vathi va mukùkhu.”

Mootikhiniheya Natanayeli onnaloca: “Muhusiha, weyano wa Mwana a Muluku, wa mwene a Isarayele.”

Yesu onnamukoha: “Onemererya, wona wi kìholèla kiriki: kòwona vathi va mukùkhu? Onamona itxhu itokotokosa opwaha seiha.” Voocharela Yesu onnaaroromeliha: “Eparipari txhiryene miyo kinnolèlani munamona erimu ehuliwe ni Ankelo a Muluku ewelaka ni emukhuruwelaka Mwana a mutxhu.”—Yohani 1:45-51.

Ohoolo waya, emanle weereya yeela, Yesu, vamoha ni amuhuserya awe avyaani, annakhuma o Yortano nave annaya o Kalileya.