Yesu ni amuhuserya awe vano anapaka mukwaha eyaaka makupa oomokoni o Kalileya. Vano elukuluku ya ephovo, nave mmacani wookhalamo tiriku. Amuhuserya evoliwe, annamvurula tiriku nave annamukhuura. Nyenya nihiku Nawoorowa, nave Afarisi annoona yeeyo anapakaaya.

Muupuwele wi hiihaanoru Ayuta akina o Yerusalemu yaachuna omwiipha Yesu, emootheryaka onanariha nihiku Nawoorowa. Vano Afarisi annamootherya moorweela wa meerelo a amuhuserya. “Nkawone amuhuserya-à aneraya etxhu yohiherwiwa nihiku naworowa!”—Mateu 12:2.

Afarisi analoca wi ovurula inuku wi muchu akhuure enalikana ni ohepha. (Mukwaha 34:21) Moonelo aya vooloca sa yeeyo anoonaaya ntoko olapa muteko, enneeriha nihiku Nawoorowa okhala nawoopiha, naamwi woopaceryani naarino yoolakelela ya okhala nihiku noohakalaliha ni noolipiha makupa oomunepani. Yesu onnalikanyiha moonelo aya woonanara ni yootakiherya yeeyo enooniherya wi Yehova Muluku hanachuna wi nlamulo Nawe vooloca sa nihiku Nawoorowa niphariheliweke mmukhalelo yoowo.

Yootakiherya emoha Yesu onavaheiye ti ya Tavite ni alopwana awe. Vaavaa yaavoliwaaya etala, awo yaaheemela o tapernaakulu nave ekhuura ipau soohiruruvalihiwa. Ipau seiyo, saakumihiwe vamiithoni va Yehova nave iraceelihiwa ni ivyaani, saakhapeleliwe wi ikhuuriwe ti alipa a mukucho. Nyenya, nthowa na mikhalelo, Tavite ni alopwana awe hiyaathorihiwe  nthowa na okhuura ipau.—Onamukutxho 24:5-9; 1 Samuwele 21:1-6.

Yootakiherya yanawiili, Yesu oni: “Naari himwalakhannye mwa nlivru na malamulo wi anamukutxho annananariha ni miteko saya nihiku naworowa, nave ehinatxheka?” Echu aachuneiye oloca ti yawi, naamwi nri nihiku Nawoorowa, alipa mukucho annaahita asinama ntakhara mikucho ni miteko mikina mu empa ya Muluku. Yesu onnaloca: “Miyo kinnolèlani wi vava òkhalavo mutokwene onapwaha empa ya Muluku.”—Mateu 12:5, 6; Namarepela 28:9.

Wanawiili Yesu onnapharihela Soorempwa wi aloce mwaha awe: “Mwasuwenle etxhu eniwa: ‘Kinakhwela ikharari ohiya mikutxho’, himukathorin’he yale ahirino nthowa mmulatxuni.” Owo onnakuchula: “Mwana a mutxhu ti mwanene a nihiku naworowa.” Yesu onaloca sa olamulelo awe wa Omwene wa murecele wa iyaakha ekonto.—Mateu 12:7, 8; Oseya 6:6.

Achu annahooxeya ni Satana moovira wa elukuluku yincipale, moorweela wa nlala ni ikhoco sincipale. Ohiyana taani onahaala okhalavo mu nihiku Nawoorowa ntokotoko mu olamulelo wa Kristu, yoowo onahaala ovahererya elukuluku yawiichuuwa nnakhwelaahu!