Amanle oosuwela wi Afarisi ni nikhuuru na Herote annalakelela omwiipha, Yesu ni amuhuserya awe annakhumavo eyaaka o Eniya yo Kalileya. Muloko mutokweene onnamuchara orweela wa makupa oothene—orweela o Kalileya, ipooma sa Tiro ni Sitoni, makupa a Muhice Yortano, Yerusalemu, ni Itumeya. Yesu onnaapenusa ancipale. Ntoko yookhumelela, yaale arino ireca itokweene annayawo. Hiyaaweherya wi aatannye, nto wi emutannye.—Marko 3:9, 10.

Muloko wootepa waaca mwawiihiiha Yesu onnaaveka amuhuserya awe wi emunnye mwaaceya mukhaani wi akhale ocai wa muloko wi ehinwomaanye. Navetho, owo onanwerya waahusiha ari mmwaaceyani naari oya makupa makina wi awerye waahusiha achu ancipale.

Muhuserya Mateu ohoona wi muteko wa Yesu wookhwaaniherya yeeyo “yalotxiwe ti mulipa a miririmu Isaiya.” (Mateu 12:17) Yooloherya taani Yesu okhwanihenryeiye?

“Mmone khapuro aka kimuthanlilaka, musiveli aka, mwa yowo murimaka onahakalalayamo. Kinammukuherya Munepa aka ni owo onamulalerya maloko othene miruku sa wokololowa. Owo harwa anavanyihana, harwa anakhuwela, nsu nawe hinrwa niweya [muramphani]. Harwa antaka muthala wokhuneya, nari harwa atxipiha muthiko onahala vakhani otxipha, ophiyerya atikitherye wokololowa. Nave maloko othene anamuroromela nsina nawe.”—Mateu 12:18-21; Isaiya 42:1-4.

Chiryene Yesu, kapuro yoowo Muluku onamusiveleiye. Yesu ohooniherya vanlakani yeeyo eri wookololowa weeparipari, yoowo onanarihiwe ni sookhovelela sa malapelo atheru. Epharihelaka moohookololowa Nlamulo na Muluku mmoonelo aya, Afarisi hiyaamuthokororya muchu aahooseya nihiku Nawoorowa! Avahaka yawooniherya ya wookololowa wa Muluku nave ooniheryaka wi munepa wa Muluku ori ni yoowo, Yesu onnawoopola achu mu murici wa sookhovelela soohookololowa. Nthowa na yeeyo ahooleli a malapelo annachuna omwiipha yoowo. Echu yoothananiha!

Enataphulela eheeni wi “harwa anakhuwela, nsu nawe hinrwa niweya [muramphani]”? Vaavaa onaapenuseiye achu, Yesu haaweemererya awo naari masololo ‘wi emusuwelihe.’ (Marko 3:12) Owo hanachuna wi achu ehuserye vooloca  sa yoowo orweela wa miselo soolociwa muramphani naari orweela wa sooloca soohithariheya sinarweela wa achu oohiyanahiyana.

Navetho, Yesu onnakusa muchaka awe woohakalaliha wa yaale moosiphela anakhala ntoko muthala wookhuneya, woonyotopana ni opwen’ye. Awo anakhala ntoko muthiko ohanle osipha, okumi aya ohanle vakhaani opwetheya. Yesu hanintaka muthala wookhuneya, naari hanasipiha muthiko ohanle vakhaani osipha. Opwaha yeeyo, ikharari ni osivela, sinnamweeriha waakhaviherya awiichacala. Mweeparipari, Yesu ti mmoha yoowo maloko oothene anaroromelaaya nsina nawe!