Vooloca sa makupa onakhumawo nsuwa a Eniya yo Kalileya, mootikhiniha Yesu onnaavakulela achu ancipale nave voocharela onnachawa vaavaa awo yaachunaaya omweera mwene. Mu ohiyu yoole owo onneeca vasulu va eniya nave onnamoopola Petro, yoowo tho ence vasulu va maahi nyenya apacerya oneela nthowa na okhalano nroromelo vakhaani. Yesu tho aamaaliha echeku, aavuluxaka amuhuserya awe mu opwina.

Vano Yesu onakookela makupa onamorelawo nsuwa a eniya, vano elapo yo Kafarnau. Yaale mootikhiniha yaavakuleliwe ni ipau annamphwanya nave annamukoha: “Muhusiha ophiyalewo lini wenno?” Aasamelaka, Yesu onnaloca wi awo anamwaavya nthowa na ipau. Owo onnaaceenyerya ariki: “Mphareke muteko, nto muhilapeleke yolya enamala, nto yolya enalekela mpaka wa ekumi yohimala.” Nave awo annamukoha: “Nereni wi niphare muteko wa Muluku?”—Yohani 6:25-28.

Akhweya awo anuupuwela miteko saarempwe mu liivuru a Nlamulo, nyenya Yesu onaloca muteko yoowo orino esisapo yoowalamela: “Muteko wa Muluku ti omwemererya yole omurummeiye.” Nyenya achu hanooniherya nroromelo mwa Yesu, naamwi aapanke ichu sincipale. Awo anamveka eneneeryo wi emuroromele. Awo annamukoha: “Muteko tani onapharawe?” Nave annaceererya: “Makholo ahu yàlya ‘maná’ okulutxuni ntoko erempwaya: Àhavaha okhura ephau ya wirimu.”—Yohani 6:29-31; Salumu 78:24.

Vooloca sa yooveka aya ya eneneeryo, Yesu onnaakhaviherya achu wiiwexexa phaama vooloca sa Mwaneene a soovaha sootikhiniha ariki: “Eparipari txhiryene miyo kinnolèlani: tahi Mose ovan’heni ephau ya wirimu, nto t’Atithi anovahani ephau yeparipari ya wirimu; ntakhara ephau ya Muluku ti ele enakhuruwa wirimu, ni t’enàvaha atxhu ekumi.” Nthowa na ohiiwexexa yeeyo Yesu aachuneiye oloca, awo yaahimveka: “Pwiya, onivaheke ephau yeyo mahiku othene!” (Yohani 6:32-34) “Ephau” taani Yesu aaloceiye?

Owo onnathariha: “Miyo kiri ephau ya ekumi. Onarwa wa miyo harwa akhala ni etala, nave onakemererya miyo harwa akhala ni nthanana. Nto miyo kinnolèlani: nyuwo munnakòna, nto himunemererya. . . . Nkikhurun’we osulu wi kere okhwela waka, nto okhwela wa yowo okirumme. Vano ti wu okhwela wa yowo okirumme, wi othene yawo okivan’heiye, ehikirimele, nto kavinyihe mokhwani nihiku nomaliha. Ti wu okhwela wa Atithi, wi mutxhu ti mutxhu onamona Mwana ni onamwemererya yowo, akhale ni ekumi yohimala.”—Yohani 6:35-40.

Mukhalelo ola, achu yaakhala oonyeenyeya nave epacerya omwaapa Yesu. Ntakhara heeni owo onaloceiye wi “ephau ekhurun’we wirimu”? (Yohani 6:41) Mmoonelo aya, Yesu aari pahi mwaana a asitiithi oomuchu yaawo yaakhala o Kalileya muceche wo Nasareti. Nave achu yaanakohana eriki: “Ola tahi Yesu, mwana a Yosefe, atithinya ni amannya nnasuwelahu?”—Yohani 6:42.

Yesu onnaakhula: “Muhapeke yenyuyenyu.” Nave onnaaceererya: “Havo onawerya orwa wa miyo, Atithi akirumme ehimuthanlile, nave miyo kinamunvinyiha mokhwani nihiku nomaliha. Yòrempwa mwa alipa a miririmu: ‘Othene anamuhusihiwa ti Muluku. Yole onawiriyana nihusiho na Atithi, onnarwa wa miyo.’ Tahi wi orimukhala owonne Atithi, yole pahi onarwa wa Muluku t’owonne Atithi. Eparipari txhiryene miyo kinnolèlani: yole onemererya okhalano ekumi yohimala.”—Yohani 6:43-47; Isaiya 54:13.

 Vaavaa aalonceiye ni Nikotemu, Yesu aahiromola ekumi yoohimala nave aahiphitaanyerya ni omweemererya Mwaana a muchu, ariki: ‘Mutxhu ti mutxhu, oni amwemererye [Mwaana mmoharu a Muluku] yowo harimela, nto onamukhalano ekumi yohimala.’ (Yohani 3:15, 16) Nyenya vano, owo onaloca variyari va achu ancipale, aaleelaka wi yene ephiro wi awo yaakhele ekumi yoohimala, yeeyo mana naari ipau sa o Kalileya ihinaweryaaya ovaha. Vano, ti mwawiihai muchu oneereiye akhaleno ekumi yoohimala? Yesu onnuuluula masu awe: “Miyo ka ephau ya ekumi.”—Yohani 6:48.

Mwaha yoola wa ephau ya wirimu onnatitelela, nave onnakhala mwaha mutokotoko vaavaa Yesu onahusiheiye mu sinakooka o Kafarnau.