Mwawiiwanana ni mukhalelo wa murima aya, achu annaakhulela moohiyana wa yeeyo Yesu onaloceiye ni onapakeiye. Eyo enakhala yawooneya va echoko emoha o Kalileya. Nfarisi mmoha nsina nawe Simau onnanwopa Yesu wi alye, akhweya wi amoone vakhivirukhiviru yoowo onapaka miteko sootikhiniha. Oonaka ntoko ekari ya waalaleerya yaale ari vaava, Yesu onneemererya nwopelo, hiiha ntoko eemerenryeiye miwopelo wi alye ni alipa ooliviha musokho ni oocheka.

Nyenya, Yesu heereliwe meerelo akhoveleliwe a owaakhela aleco. Mu iphiro sa nchupi so Palestina, inaani saakhala sooviha ni sa nchupi nthowa na isapatho saawariwa, mwawiihiiha meerelo a owaakhela aleco yaari yookhovelela orapiha inaani saya ni maahi ooriirya. Yesu heereliwe yeeyo. Navetho havahiwe epeexo, ntoko yookhovelela. Yookhovelela ekina ori oyeeherya makhurwa miihi a muleco yeeyo eri mukhalelo wa wooniherya epewe ni owaakhela aleco. Elatho Yesu heereliwe. Vano owo muleco a mukhalelo taani?

Yoolya ennapacerya, alipa oowompwa akiranthe vameesa. Vaavaa analyaaya, moovitheya onnavolowa muthiyana ohiwompwe. Owo osuweliwe ntoko “otxheka a epoma yele.” (Luka 7:37) Achu oothene oohiphaameya toocheka, nyenya muthiyana ola onakhala wi orino okumi woocapaheya. Akhweya owo aahiiwa mahusiheryo a Yesu ophitaanyerya nwopelo awe wa ‘othene yale ari òvelavela ni ònyokoliwa, wona wi onan’witxhuwiha.’ (Mateu 11:28, 29) Mwawooneya aceenyeryiwaka ni masu ni saweera sa Yesu, muthiyana vano onnamwaavya.

Muthiyana onnarwa oculi wa Yesu nave onnakokhora o inaani sawe. Miithori annamorela mu inaani nave onnampupucha ni miihi awe. Onnavaha ipeexo inaani sa Yesu nave onnayeeherya makhurwa awunkhela oruuhaleiye. Simau onnanweha moohisiveliwa, alocaka mukhateiye: “Mulopwana ola, arì mulipa a miririmu, ammusuwela muthiyana ola onamphara, ntakhara ori muthiyana òtxheka!”—Luka 7:39.

Asuwelaka muupuwelo wa Simau, Yesu onnaloca: “Kòkhalano etxhu yawolèla weyano, Simau.” Owo onnaakhula: “Olotxe, muhusiha.” Yesu onnatitelela: “Mulipa òrela mmoha àkhalano atxhu eli yampolen’ye ikhorowa, mmoha ampolen’ye idenáryo masana khumi, mukina nsana nimoha. Vano yaharyayano yolivano, mulopwana yole àhalevelela. Tani wa yale eli oni amukhwelekesa yowo?” Akhweya moohipwacha, Simau onnaakhula: “Kinnupuwela wi ti yole oleveleliwe vantxipale.”—Luka 7:40-43.

Yesu onneemererya. Voocharela anwehaka muthiyana, owo onnaloca wa Simau: “Onnamona muthiyana ola? Kòvolowa mpa mwà ni hokivan’he mahi orapihano inani. Nto ola ònaniha inani saka ni mithori awe, apuputxhaka ni mìhi awe. Weyano hokivan’he ebeijo, nto ola, miyano ovolowa wovolowa, hàmanle okivaha ibeijo inani. Hokitxikitxhenle muru aka ni makhurwa awunkhela, nto ola òkitxikitxhela makhurwa inani.” Yesu aahiwerya woona wi muthiyana ola aakhalano yawooniherya ya ocharuwa weeparipari wa okumi awe woocapaheya. Mwawiihiiha owo onnakuchula: “Tivanto miyo kinnolèla wi soleveleliwa sotxheka sawe sintxipale, wona wi òtepa okhwela. Nto yole onaleveleliwa vakhani, okhwela wawe ori vakhanitho.”—Luka 7:44-47.

Tahi wi Yesu onamweemererya ocapaheya. Opwaha yeeyo, owo onooniherya wiiwexexa wooreera murima ntakhara achu yaawo apanke soocheka itokotoko nyenya voocharela anooniherya wi annathanana nave annaavya woopowa mwa Kristu. Nave woopowa taani muthiyana ola onooneiye vaava Yesu onaloceiye: “Sotxheka sà sòleveleliwa. . . . Ororomela wà òhovulusa. Hawé ni muretxele.”—Luka 7:48, 50.