Yesu oheeca mu nihiku nanteero nave oovelavela. Vaavaa onasekuwaayavo, owo onnaaleela oohuserya awe: “Nlapuwele okhopela,” yeeyo eri olapuwela makupa o Kafarnau.—Marko 4:35.

Museresere wa Ephareya yo Kalileya ti muceche wo Xenesare, onapaka makupa o Tekapoli. Muceche wo Tekapoli mathipelo a sookhovelela sa Ekiriki, naamwi Ayuta ancipale ekhalaka weiwotho.

Ovinya wa Yesu o Kafarnau tahi woovitheya. Sookhalawo miyaaceya mikina sinalapuwa mu ephareya. (Marko 4:36) Mweeparipari, herakamenle. Ephareya yo Kalileya eri ntoko muhice mutokweene wa maahi aphaama, erakamme mastatiya 21 ni oruku aya mastatiya 12. Nyenya tahi wawiisa.

Naamwi Yesu ari mulopwana oophaameya, owo oovelavela nthowa na muteko awe woolaleerya. Mwawiihiiha emanle ocimula, onnavolowa oculi wa mwaaceya, axeerya muru awe nave onnakona.

Arummwa ancipale annasuwelano phaama omweeciha mwaaceya, nyenya ola tahi mukwaha wookhweya. Moorukurerya sookhalamo miyaako, nave makupa a Ephareya yo Kalileya ennakhalano maahi ooviha. Ilukuluku ikina, echeku yooriirya ya mmiyaakoni ennaakuva nave ennaphwanya makupa a maahi ooviha, ekumiheryaka macumuxa ni echeku etokotoko. Ti yeeyo vano eneereya. Moohilekela macumuxa annamukakha mwaaceya. “Mwatxeya ànasareya mahi nave yawo yàri vawopiha.” (Luka 8:23) Nlelo Yesu onnatitelela orupa!

Alopwana ala annalapa moowetha wi emeemese mwaaceya, epharihelaka mavyakelo aya akhalai mu ovootha echeku etokotoko. Nyenya vano ti yoohiyana. Saathonwe miruku, awo annamviiha Yesu nave annaloca: “Pwiya, onivuluse, ninnakhwa”! (Mateu 8:25) Amuhuserya vano annoova wi awo anahaala oneela!

Vaavaa Yesu onavinyeiye, owo onnaloca wa amuhuserya: “Munovelani, nyuwo atxhu òroromela vakhani?” (Mateu 8:26) Voocharela Yesu onnasamela echeku ni ephareya: “Omàle, okhurumuwe!” (Marko 4:39) Echeku yawoopiha ennamaala nave ephareya ennakhurumuwa. (Marko ni Luka annaloca yaweereya yeela yootikhiniha, voopacerya eceenyeryaka wi Yesu mootikhiniha onnamaaliha echeku etokotoko, nave voocharela awo annaaloca amuhuserya oyeleela waya nroromelo.)

Mwaanyiherye yookhumelela yaweereya ela enakhalaayano wa amuhuserya! Awo yoonaka ephareya ekhurumuwaka nave echeku etokotoko emaanle noo. Vano annapacerya woova. Awo annakohana: “Tani ola oniweleliwa ti etxheku ni ephareya ene?” Nave annaya makupa makina a ephareya awoopoweene. (Marko 4:41–5:1) Akhweya amwaaceya akina yaahipureleliwa museresere.

Echu yoohakalaliha osuwela wi Mwaana a Muluku ookhalano owerya wa ovareryela ikuru sa maphacuwelo! Vaavaa oneereiye alamuleleke elapo yavathi variyari va olamulelo awe Woomwene, achu oothene anahaala okhala ookhapeleleya, honi okhalewo woova wa ikuru sa maphacuwelo!