Yesu ni amuhuserya awe annaphiya o Petisaita. Voocharela achu annamuruuha mulopwana oohoona nave annaveka Yesu wi ampenuxe.

Amukusaka mulopwana ampharenle ntata, Yesu onnamukeriha owo, okhwipi wa muceche. Amanle omuhela mara mmiithoni mwa mulopwana, Yesu onnamukoha: “Onnona etxhu?” Mulopwana onnaakhula: “Kinawona atxhu ntoko miri inetxa.” (Marko 8:23, 24) Yesu onnaphara miitho a mulopwana nave owo onnapacerya woona. Voocharela, onnamurowiha mulopwana, yoowo vano onoona phaameene, Yesu onnamuleela wi ahivolowe mmucecheni.

Vano, Yesu ni amuhuserya awe annapaka mukwaha eyaaka omoko wa elapo yo Sesareya o Filipi. Annawelela moko woorakama, wa mastatiya 40. Epooma enakhala vanipuro noocukhuwa, okhopela waya onnooneya mwaako Hermoni ohuruweliwe ni mucharapo makupa omokoni. Akhweya mukwaha wa oya wiiwo, onnamala mahiku.

Variyari va mukwaha, Yesu onnapwahavo wi avekele meekheiye. Inahala pahiru miyeeri mithanu naxexe naari khumi wi iiphiwe, nave owo ori awuukhuwa ni amuhuserya awe. Hiihaanoru ancipale aahiya okhala oomuchara awe, nave akhweya akina ari oohaleeliheya ni oonyeenyeya. Akhweya awo anniikoha ntakhara heeni Yesu aakhooca wiilipixerya wa achu vaavaa yaachunaaya omweera mwene nave ntakhara heeni owo onnakhooca wooniha eneneeryo wi ooniherye taani owo chiryene.

Vaavaa amuhuserya anayaaya weiwo Yesu onavekeleiyewo, owo onnakoha: “Atxhu anamwera ani Mwana a mutxhu?” Awo annaakhula: “Akina anamwera Yohani Mpatisa, akina aniwa ti Eliya; akina aniwa ti Jeremía nari mulipa a miririmu mukina.” Mweeparipari, achu anuupuwela wi Yesu ti mmoha a alopwana yaala oviihiwe mookhwani. Wi asuwele muupuwelo wa ohuserya awe, owo onnaakoha: “Nka nyuwano munakera ani?” Mwawaakuveya Petro onnaakhula: “Weyano wà Kristu, mwana a Muluku mukumi.”—Mateu 16:13-16.

Yesu onnaloca wi Petro onnaphwanela ohakalala nthowa na Muluku omusuweliha ichu seiha. Navetho onnaaceererya: “Miyo kinalocha ni weyo, wi weyo wá Petro, nave va mwala ola kinarwa-kitikitherya Muloko aka: nave milako ya elapo ya alipa-okhwa herwa-elipiherya va yowo.” Yesu onachuna oloca wi yene tonahaala othipela muloko nave wi okhwa horwa waavootha achu awe wakhala wi aatitelela okhala oororomeleya veelaponi. Owo onnamuroromeliha Petro: “Kinamonnya isavi sa omwene wa wirimu.”—Mateu 16:18, 19.

Yesu hamvanhe Petro nipuro noopacerya waapwaha amuhuserya akina, naari mano hanampaka owo okhala mwala wa muloko. Yesu mwaneene tori Mwala yoowo muloko awe othipeliwaayavo. (1 Korinto 3:11; Éfeso 2:20) Nyenya Petro onaakhela ixaavi raru. Owo onahaala okhalano ekari ya ohula, ntoko ekari ya opharihela wi achu akina ewerye ovolowa mu Omwene wa wirimu.

 Petro aahaala opharihela exaavi yoopacerya mu Pentekoste a 33 E.K., ooniheryaka wa Ayuta ni ale yaari Ayuta ekhalaka mu ilapo ikina yaacharunwe yeeyo anaphwanelaaya opaka wi evulusiwe. Owo aahaala opharihela exaavi yanaawiili wi aavahe ekari Asamariya yeemererya ovolowa mu Omwene wa Muluku. Voocharela mu 36 E.K., Petro aahaala opharihela exaavi yaneeraru wi aavahe ekari achu yahaari Ayuta, ntoko Korneliyu ni akina.—Saweriwa T’arummwa 2:37, 38; 8:14-17; 10:44-48.

Variyari va ochekula wuuwu, arummwa a Yesu annakhala awuukhuwa vaavaa Yesu onaloheryeiye soohooxa ni okhwa onahaaleiye ohoolela o Yerusalemu. Woona wi haniiwexexa wi owo onahaala oviihiwa wi akhaleno ekumi wirimu, Petro onnamukeriha Yesu wiiphiini nave onnamusamela ariki: “Pwiya, Muluku ahiwerele yeyo onlotxawe. Yeyo herwa yophatxuwela.” Nyenya Yesu amureryaka eculi onnamwaakhula: “Vinyavo, satana, vamithoni vaka. Weyano ori mukwatxuliha aka, wona wi honupuwela itxhu sa Muluku, nto sa atxhuru.”—Mateu 16:22, 23.

Vano Yesu onnawiichana achu akina waahiya arummwa awe nave onnaaleela wi hokhala wookhweya omuchara. Owo onnaloca: “Mutxhu onakhwela okitxhara, ikhotxe mukhateiye, akuse . . . [mwiri] awe ni akitxhare. Paripari mutxhu onasya ovulusa ekumi awe, onamurimeliha; nto mutxhu oni arimelihe ekumi awe wa nthowa naka ni na Mutxhaka Waphama, onanvulusa yeyo.”—Marko 8:34, 35.

Mwawiihiiha, wi ephwanelele weemereryiwe ni Yesu, oomuchara awe anaphwanela okhala oolipa murima ni wiikhooca. Yesu onnaloca: “Eparipari, mutxhu yole oni uliwe muru vamithoni va atxhu ala òraruwa ni òtxheka wa nthowa naka ni na masu aka, Mwana a mutxhu onamuliwatho muru nihiku na ovuwa wa Atithinya vamoha ni ankelo awe.” (Marko 8:38) Mwawiihiiha, vaavaa Yesu onarweiye, owo “onamunvaha mutxhu ti mutxhu ntoko merelo awe.”—Mateu 16:27.