Vaavaa Yesu, Petro, Yakopo, ni Yohani anakhuruwaaya omwaako, annaphwanya muloko mutokotoko wa achu. Yookhala ehineeca phaama. Alipa oorepa yaahiwaacamela oohuserya a Yesu, nave enavaanyihana. Achu annahakalala vaavaa anamoonaaya Yesu, nave annamuchimakela wi yamuxelihe. Nto Yesu onnaakoha: “Munavanyihanani ni yawo?”—Marko 9:16.

Mulopwana mmoha onnakokhora vamiithoni va Yesu nave onnamutharihela: ‘Muhusiha, miyo koruhenle mwanaka omakiwe ti munepa wohilotxa. Munepa owo wamukusererya, onnanvoholela vatxheyani. Owo onnakhuma niphoru, onnawurawura mìno ni onnuma. Kìhaveka amuhuserya à wi ekumihe, nto hiyan’wenrye.’—Marko 9:17, 18.

Ti wawooneya wi alipa oorepa anawaakaha oohuserya nthowa nawi yaahoocela ompenusa mmiravo ole, nave akhweya yaanaaphuca nthowa na wiilipixerya waya wasiiyo. Voocharela, ohiya omwaakhula tiithi ole ori oothanana, Yesu onnaloca ni muloko wa achu, ariki: “Nyuwo mwa nloko na atxhu òhiroromela! Ophiyerya lini kineraka kikhale ni nyuwano? Ophiyerya lini kineraka kovileleni?” Moohikhwa minikwa, Yesu onaloca masu ala wa alipa oorepa yaawo anatannya manyakunyaku ni oohuserya awe mu ilukuluku ohinakhaleiyevo. Voocharela Yesu onnamwaakhula tiithi ole oothanana, ariki: “Muruheni wa miyo.”—Mateu 17:17.

Vaavaa mmiravo onamwaacameleiye Yesu, masololo aareiyeno yaamusuwela Yesu nave yaamucikinya mmiravo ole ni owali. Mmiravo onnuuuwela vacheyani, aanupureya akhumaka niphoru mwaano. Nave Yesu onnamukoha atiithi awe: “Omanle mahiku mahai emweraka etxhu yela?” Owo onnaakhula: “Ovinya ari mukhani, nave mahiku mantxipale onamurihela  vikho, nari mmahini, wi omwiphe.” Mulopwana ole onnamveka Yesu, ariki: “Nto weyano, waweryaka, onikhaviherye, onimorele ikharari.”—Marko 9:21, 22.

Tiithi aayeleela ewehereryo, woona wi ophiyerya tho oohuserya a Yesu yaahoocela omukhaviherya. Aakhulaka oveka wa mulopwana ole oyeleenle ewehereryo, Yesu onnamulipiha ariki: “Weyano waweryaka! Sothene sinnaweryeya wa yole ori ni nroromelo!” Voocharela tiithi onnakhuwela ariki: “Kinnororomelani! Khaviheryá ohiroromela waka.”—Marko 9:23, 24.

Yesu onnasuwela wi muloko wa achu woopacerya omwaacamela. Ohoolo wa achu oothene, Yesu onnasamela masololo: “Munepa wohilotxa ni wohiwa, miyo kinnoruma, okhumemo mwa mmiravo ni ohirweru wulùle onvolowa.” Munepa ole woonanara okhumakamo, waamweeriha mmiravo onyakula nave waamucikiya ni owali. Voocharela mmiravo aakona vacheyani nave ahiniitannya. Achu yaamonnaaya hiiha yaaloca: “Òkhwa.” (Marko 9:25, 26) Nyenya Yesu ampharaka ntata, owo aavinya, nave “mwammiravo àpenuwa.” (Mateu 17:18) Moohikhwa minikwa, achu annakhala ootikhina ni yeeyo Yesu enreiye.

Ilukuluku vakhaani muculi, vaavaa Yesu aarummeiye oohuserya awe oya olaleerya, awo yaanawerya wiikara masololo. Vano, eri yaaworu vamoha ni Yesu mpa, awo annamukoha: “Ntakhara seni hiyo nihiwenryahu okhumiha munepa owo?” Yesu onnaaleela wi waari nthowa na ohikhalano nroromelo, alocaka: “Muloko ola wa minepa onakumihiwa pahi ni mavekelo.” (Marko 9:28, 29) Waanachuneya okhalano nroromelo noolipa ni oveka ikuru sa Muluku wi ikhaviherye wiikara munepa ole woonanara.

Wookuchulani, Yesu onnaloca: “Tchiri kinalocha wa nyuwo, mwakhalano nroromelo si mwámmiso a evai, munarwa-mulocha wa mwako’la, Susa’vo orowe wile; nave onarwa-osusa; nave hevarwa-vakhala va nyuwo etchu yohereya.” (Mateu 17:20, Nlakano Nahihano) Chiryene, nroromelo nookhalano owerya!

Makacamiho ni sawuukhula inanihiiha oya vahoolo mmuteko wa Yehova inanwerya okhala soohivileleya hiiha ntoko mwaako ohinathaamihiwa naari woovila owela. Nyenya, wakhala wi ninnannuwiha nroromelo nahu, nnanwerya ovootha makacamiho ni sawuukhula itokotoko inalikana ni mwaako.