Yesu onnakhwaaniherya sincipale variyari va muteko awe mutokotoko o Kalileya. Nyenya, mu oloca, “kinnaphwanela olaleryatho Mutxhaka Waphama wa omwene wa Muluku ipoma ikina,” Yesu onnuupuwela sincipale ohiya pahiru o Kalileya. Mwawiihiiha, owo onnaya olaleya “mmasinagogani” o Yuteya. (Luka 4:43, 44) Ela ti yoophwanelela woona wi vano variyari va elukuluku ya ephovo nave efesta o Yerusalemu ennaacamela.

Nlikanyihaka ni yeeyo nnaalakhanyaahu vooloca sa muteko wa Yesu o Kalileya, nnaphwanya ichu vakhaani mu Michaka vooloca sa muteko awe o Yuteya. Naamwi achu ehaakhulelaka phaama o Yuteya, eyo henammaaliha Yesu olaleerya mwamvai ni opaka miteko saphaama nipuro vyakala onakhaleiyevo.

Vahilekelen’yevo Yesu onnapaka mukwaha ayaaka epooma yookhweleya yo Yuteya, Yerusalemu, ntakhara Paskha a 31 E.K. Vanipuro nawaaciwavo, waacamela Mukhora wa Ipucepuche, nookhalavo nchiya nniichaniwa Petisaita. Areca ancipale, alipa oorakala, ni oohoona annarwa vanchiyani. Ntakhara heeni? Nthowa nawi eneemereryiwa wi achu ananwerya openuwa moorweela wa opwina vanchiyani vaavaa maahi anatannyiwaaya.

Vano, nihiku Nawoorowa, nave Yesu onnamoona vanchiyani mulopwana yoowo oniiceliwa mu iyaakha 38. Yesu onnamukoha: “Onnakhwela openuwa?” Mureca onnamwaakhula: “Pwiya nkano mutxhu okirihela vatxhiyani, elukuluku mahi anatannyiwaya; kaphiyaka, mukina oniha akhuruwenlemo.”—Yohani 5:6, 7.

Yesu onnaloca echu enamutikhiniha mulopwana ni muchu ti muchu onawiriyana: “Vinya, okuse ntethe nà ni wetxeke!” (Yohani 5:8) Nave ti yeeyo owo onapakeiye. Mwawaakuveya onnapenuwa, nave onnakusa ntethe nawe nave onnapacerya weeca!

Opwaha ohakalala ni echu yootikhiniha ephacunwe, Ayuta annamoona mulopwana nave annamuthoriha: “Olelo nihiku naworowa, honaphwanela otxukhula ntethe nà.” Mulopwana onnawaakhula: “Yole okipenunse ori: Kusá ntethe nà ni wetxeke?” (Yohani 5:10, 11) Ayuta anamuthoriha muchu yoowo omanle openusiwa nihiku Nawoorowa.

Awo yaachuna osuwela, “Tani mutxhu owo ori: kusá ntethe nà ni wetxeke?” Ntakhara heeni anamukohaaya mulopwana mmukhalelo yoola? Nthowa nawi Yesu “àvinyavo vale wathukumannevo atxhu,” nave mulopwana apenusiwe hasuwenle nsina na Yesu. (Yohani 5:12, 13) Nyenya mulopwana ola onamukumana wanawiili ni Yesu. Ohoolo waya, mu empa ya Muluku, mulopwana onnakumana ni Yesu nave onnasuwela wi ti yoowo ampenunse vanchiyani.

Mulopwana openusiwe onnaaphwanya Ayuta yaawo yaamukonhe vooloca sa taani ompenunse. Owo onnaaleela wi ti Yesu. Esuwelaka yeeyo, Ayuta annaya wa Yesu. Apwanne yaaya ohuserya owerya taani Yesu aapakeiyeno ichu sootikhiniha? Hooye. Opwaha yeeyo, wi emphwanyerye mathowa Yesu mu opaka ichu saphaama mu nihiku Nawoorowa. Nave yaaphiyerya opacerya omwiica!