Amanle okhala mahiku meeli o Samariya, Yesu onnaya mukuma wa ekulucu yoowannyawe. Owo aahikhalano mukipici mutokotoko woolaleerya o Yuteya, nyenya hanakookela o Kalileya wi ichuuwe. Opwaha yeeyo, owo onnapacerya muteko mutokweene mu elapo yeeyo unnunweiyewo. Owo akhweya hanaweherya waakheliwa phaama weiwo, hiiha ntoko aalonceiye, “mulipa a miririmu hanatxitximihiwa mwelaponi mwawe.” (Yohani 4:44) Opwaha okhala ni yoowo, amuhuserya awe anakookela mu imusi saya ni miteko saya.

Muchaka taani Yesu onapaceryeiye olaleerya? Muchaka owo ti: ‘Omwene wa Muluku ori vakhiviru. Murukunuse mirima ni mwemererye Mutxhaka’ waphaama. (Marko 1:15) Nave tiivi eri yookhumelela? Akalileya ancipale annamwaakhela phaama Yesu, emvahaka ncicimiho. Eyo tahi nthowa na muchaka awe. Akalileya akina yaahikhalawo o efesta ya Paskha o Yerusalemu miyeeri oculi nave yaahoona ineneeryo sootikhiniha Yesu aapankeiye.—Yohani 2:23.

Ari o Kalileya ti woowi Yesu onapaceryeiyewo muteko awe mutokotoko? Mwawooneya o Kanani, weiwo aatatunseiyewo maahi ekhala eviinyu va efesta ya othela. Ari weiwo mu ekwaha yeela yanawiili, Yesu onnasuwela sa wiiceliwa wa mmiravo, yoowo ohanle vakhaani okhwa. Owo mwaana a muhoolele a olamulelo wa Herote Antipa, mwene yoowo ohoolo waya aakwante muru wa Yohani Mpatisi. Muhooleli owo ohiiwa wi Yesu onakhuma o Yuteya ayaaka o Kanani. Mwawiihiiha mulopwana onnapaka mukwaha ovinyerya elapo awe o Kafarnau ayaaka o Kanani wi amphwanye Yesu. Othanana onnamweeriha muhooleli omwaakuviha Yesu: “Pwiya, okhuruwe, mwanaka ahakunve okhwa!”—Yohani 4:49.

Yesu onnaakhula ni masu anamutikhiniha mulopwana: “Mwana-à òkhala.” (Yohani 4:50) Muhooleli a Heroti onnamuroromela Yesu nave onnakookela owannyawe. Mumphironi onnakumana ni kapuro awe, yoowo onachimaka wi amuleele michaka saphaama. Chiryene, mwanawe mukumi nave ori phaameene! Owo onnakoha ‘elukuluku taani openunweiye?’, eereryaka wiiwananiha mwaha owo.

Owo onnamwaakhula: “Osilo, ekoma yothana eretxa t’emuhin’yaya.”—Yohani 4:52.

Muhooleli onnasuwela wi yaari elukuluku yeeyo Yesu aalonceiye, “Mwana-à òkhala.” Ovinyerya vaava, mulopwana yoola orino muhakhu woophwanela wi akhaleno akapuro, ni aveechokoni vawe oothene annakhala amuhuserya a Kristu.

O Kanani, nipuro nenlo Yesu onapakeiyewo sootikhiniha piili, otatusa maahi okhala eviinyu ni voocharela ompenusa mmiravo ari ocaiwene. Sootikhiniha seiya, tahi seiharu pahiru. Nyenya yootikhiniha ela yookhalano yootaphulela woona wi ennavaha eneneeryo okookela wawe o Kalileya. Owo mwawooneya mulipa a miririmu eemereryiwe ni Muluku, nyenya ophiyerya mweeryo taani ‘mulipa a miririmu [ola onereiye] atxitximihiwe mwelaponi mwawe’?

Eyo enahaala okhala yawooneya vaavaa Yesu onakookeleiye o Nasareti. Tiheeni eni yeereye weiwo?