Yesu omanle waavaha amuhuserya awe ekano yaphaama vooloca sa opharihela ichu soomwiilini. Nyenya tahi yaaworu anawiriyana. Afarisitho ari vaava, nave annahela mmurimani ekano ya Yesu. Ntakhara heeni? Nthowa nawi “yari òphareya ikhorowa.” Ewiriyanaka yeeyo Yesu onaloceiye, awo ‘annamuroha Yesu.’—Luka 15:2; 16:13, 14.

Eyo henamoopopiha Yesu. Owo onnaloca wa yaawo: “Nyuwo mwà yale anakhwela okhala ntoko atxhu aphama vamithoni va atxhu, nto Muluku òsuwela mirima sanyu. Yeyo eri yotxitximiheya vamithoni va atxhu, ti yothanyeya vamithoni va Muluku.”—Luka 16:15.

Afarisi mu ilukuluku sincipale yaari ‘otxitximiheya vamithoni va atxhu,’ Nyenya ela elukuluku ya matorokelo oomalela. Achu yaawo ari oovuwaxa mu ichu saphaama sa elapo, mu alamuleli, ni mmalapelo anaphwanela otoloxiwa. Achu vyakala yaawo anasuwela wi annachuna ohusihiwa sincipale vooloca sa Muluku anaphwanela wunnuwihiwa. Yesu ooloca wi matorokelo matokweene anaphwanela weereya. Owo onnaloca:

“Malamulo a Mose ni alipa a miririmu yàhakhala ophiyerya Yohani. Ovinya yowo oya oholo, Mutxhaka Waphama wa omwene wa Muluku onnalaleyiwa, nave atxhu othene annilipiserya ovolowamo. Eri yokhweyasa ovira elapo yawirimu ni yavathi, ohiya otxipiha nari ethoka emoha ya malamulo.” (Luka 3:18; 16:16, 17) Masu a Yesu anooniherya hai wi matorokelo anamweereya?

Ahooleli a malapelo yaawo ari Ayuta anniirumiha ochariha Nlamulo na Mose. Muupuwele wi vaavaa Yesu aamukokihenryeiye woona mulopwana o Yerusalemu, Afarisi mwawiirumiha yaahiloca: “Hiyo nri amuhuserya a Mose. Nsuwenle wi Muluku olontxe ni Mose.” (Yohani 9:13, 28, 29) Yoolakelela emoha ya Nlamulo nivahiwe moorweela wa Mose waari waahoolela awiiyeviha wa Mesiya, yoowo ori Yesu. Yohani Mpatisi aamutheten’ye Yesu ntoko epucepuche ya Muluku. (Yohani 1:29-34) Opacerya ni muteko wa Yohani, Ayuta awiiyeviha, xaxaxa yaale oohaawa, annawiriyana vooloca sa “omwene wa Muluku.” Mweeparipari ola “Mutxhaka Waphama” wa oothene yaale anachuna okhala anamurala a Omwene wa Muluku ni okumiha mphurelo mwa yoowo.

Nlamulo na Mose nohaakhwaniherya yookhwelaaya, woona wi nohaakhaviherya achu omusuwela Mesiya ni osuwela wi yaanachuna nikhaviheryo nawe. Woona wi Nlamulo nookhwaaniheryeya, achu a Muluku haanono murici wa okhapelelaka. Ntoko yootakiherya, Nlamulo naaneemererya omwalana ni mathowa oohiyanahiyana, nyenya vano Yesu oothariha wi “Yole oni amwalane ni mwariye ni amuthele mukina, onamuraruwa; nave yole oni amuthele muthiyana  amwalanne ni iyawe, onamuraruwano.” (Luka 16:18) Masu ala yaahaaruuhela esara Afarisi yaawo yaasiveliwa opaka malamulo wa echu vyakala!

Vano Yesu onapaka niphwanaphwaniho nenlo nnooniherya wunnuwa wa matorokelo yaawo aneereya. Owo onaaloca alopwana eeli, muchu ti muchu makhalelo awe annatorokeya mwawaakuveya. Vaavaa munathokororyaanyu niphwanaphwaniho, muupuwele wi variyari va yaawo anawiriyana, aakhalavo Afarisi oosivela ikhorowa yaawo anacicimihiwa ni achu.

Yesu onnaloca: “Àkhala mutxhu òrèla awara ikuwo sorèrasa, ni mahiku othene ànalya ni ànapuha phamasene. Àkhalavotho mutxhu òhawa, nsina nawe Lázaro, yowo akirathi vamilako vawe, asarenye makhwatxa. Àkhwela wipha etaIa ni yele mano yamora vamesa va mutxhu òrèla. Ophiyerya alapwa yànamulata makhwatxa.”—Luka 16:19-21.

Afarisi annatepa osivela ikhorowa, mwawiihiiha apwanne wookhalavo minikwa vooloca sa taani Yesu onamphwanaphwaniheiye ni “mutxhu òrèla”? Ahooleli yaala a Ayuta annasiveliwa owara soowara soowalamela ni sawaarya. Nave moohipwacha muhakhu wawooneya aryaayano, awo anakhala wi arenle pahiru ni mirici anapuhaaya ni ikari aryaayano. Yesu olonce wi mulopwana owanre yoowara yoowalamela. Ela enooniherya mukhalelo woocicimiheya wa Afarisi ni wiiseera waya eekhaikhai.—Daniyeli 5:7.

 Achu yaala ooreela, ahooleli awiirumiha anawoona hai achu oohaawa, achu vyakala? Awo anawoona okhala ‛am ha·’aʹrets, naari achu a mulaponi, yaawo ahisuwenle Nlamulo naari ahinaphwanela ohusihiwa. (Yohani 7:49) Eyo ennooniherya mukhalelo mmohamoha wa “mutxhu òhawa, nsina nawe Lázaro,” yoowo aavoliwe ophiyerya olya yeele “yamora vamesa va mutxhu òrèla.” Moolikana ni Lasaro aasaren’ye makhwaca, achu vyakala anooniwa ntoko oohikhala echweenevo, enakhala wi ari oothanyeya vamiithoni va Muluku.

Mukhalelo ola woothananiha waahikhala moovira wa elukuluku, nyenya Yesu oosuwela wi elukuluku ennaphiya wi ekhalevo matorokelo matokweene wa makhuuru oomeeli, wa yaale analikana ni muchu ooreela ni yaale analikana ni Lasaro.

Yesu onnathariha matorokelo ootikhiniha mmikhalelo. Owo onnaloca: “Vano mulipa òhawa àkhwa ni àkusiwa ti ankelo, àkerihiwa wariwo Abraau. Àkhwatho mutxhu òrèla ni avithiwa. Ni ari mmoroni oneiye ekoi, àtxukhula mitho ni amona otxaiwene Abraau ni Lázaro vamoha.”—Luka 16:22, 23.

Yaale ananwiriyana Yesu annasuwela wi Aparahamu ookhwa khalai nave oovithiwa. Soorempwa sinnaloca mookwakwaleya wi haavo muchu mmahiye onawerya woona oloca naari ohooseya. (Eklesiyaste 9:5, 10) Mano, ahooleli yaala a malapelo anuupuwela eheeni vooloca sa niphwanaphwaniho Yesu olonceiye? Tiheeni akhweya owo aachuneiye oloca sa achu vyakala, ni ahooleli a malapelo yaawo anasivelaxa ikhorowa?

Yesu onaloca sa matorokelo moorweela wa oloca wi ‘Nlamulo ni alipa Miririmu yaakhanle ophiyerya Yohani Mpatisi, nyenya ovinyerya vaava oya ohoolo Omwene wa Muluku onnalaleiwa ntoko michaka yaphaama.’ Mwawiihiiha, eyo eneereya ni olaleerya wa Yohani ni wa Yesu Kristu wi oopiili Lasaro ni muchu ooreela aakhwa mmikhalelo saya sakhalai, nave awo aakhalano mirici mivyaani vamiithoni va Muluku.

Mooluluwanya, achu awiiyeviha naari oohaawa aatepa olekela ehirino omwaleela woomunepani. Nyenya awo aakhaviheryiwa nave annaakhulela phaama muchaka vooloca sa Omwene yaakhenlaaya ni Yohani Mpatisi nave voocharela ni Yesu. Khalai, awo yaaphwanela okhalano yoolya moorweela wa yeele ekhaani ‘yamora vamesa omunepani’ a ahooleli a malapelo. Vano awo annalyihiwa ni iparipari sa mu Soorempwa, xaxaxa ichu sootikhiniha Yesu onathariheiye.  Enakhala wi awo arino nipuro navameekhaaya mmoonelo wa Yehova Muluku.

Moohiyana, achu ooreela ni nikhuuru na ahooleli a malapelo annakhooca weemererya muchaka wa Omwene yoowo Yohani aalaleeryeiye ni yoowo vano Yesu onalaleeryeiye mmicecheni. (Mateu 3:1, 2; 4:17) Mweeparipari, awo aanyeenyeya naari annoona ekoi, moorweela wa muchaka yoowo onaloca sa othoriha onarweela wa Muluku. (Mateu 3:7-12) Yaahaala okhala yawiichuuwiha wa ahooleli a malapelo anasivelaxa ikhorowa waakhanle wi Yesu ni amuhuserya awe aahiya olaleerya muchaka wa Muluku. Ahooleli yaawo analikana ni mulopwana ooreela mu niphwanaphwaniho, yoowo olonce: “Tithi Abraau, okimorele ikharari ni omurume Lázaro ni ananihe ekatha awe, wi arwe nno aririhe nlumi naka, wona wi kinnatepa ohawa vamoroni vava.”—Luka 16:24.

Nyenya eyo heneereya. Ahooleli ancipale a malapelo heni etorokeye. Awo yaahikhooca ‘onwiriyana Mose ni alipa a miririmu,’ yaawo yaahaala waahoolela omweemererya Yesu ntoko Mesiya ni Mwene a Muluku. (Luka 16:29, 31; Galasya 3:24) Naari mano awo hiyiiyevinhe nave hiyeemerenrye okhala oolekecheya ni achu oohaawa yaawo amweemerenrye Yesu nave vano arino ophwanelela wirimu. Wa amuhuserya a Yesu, awo hanaphwanela ororomeliha naari onaaniha eparipari wi yaahakalalihe ahooleli a malapelo naari owiichuuwiha. Mu niphwanaphwaniho nawe, Yesu onnathariha eparipari ela mu oloca “Tithi Abraau” wa muchu ooreela ariki:

“Mwanaka, wupuwele wi weyano ohakhela muhakhu à elapo yavathi, ni Lázaro àkhenle sohawa. Ti yeyo oreiye ohakalalihiwa, ni weyano ononawe ekoi. Navetho veri va hiyo ni nyuwo nòkhalavo nikhwatxi ntokotoko. Awo a iwo hanawerya orwa nno, nari ala a nno hanawerya oya iwo.”—Luka 16:25, 26.

Chiryene ennalikanela phaameene mukhalelo eeren’yaaya matorokelo yaala ootikhiniha! Eyo ennooniherya otorokeya wa murici variyari va ahooleli a malapelo awiirumiha ni achu awiiyeviha yaawo yeemerenrye murici wa Yesu nave vano anakhala awiichuuwihiwa ni oolyihiwa omunepani. (Mateu 11:28-30) Matorokelo yaala anahaala okhala awooneya miyeeri vakhaani vaavaa nlakano na Nlamulo nnaraceelihiwaaya ni nlakano mvyaani. (Yeremiya 31:31-33; Kolosi 2:14; Ahebri 8:7-13) Vaavaa Muluku oneereiye arumihe munepa waweela mu nihiku na Pentekoste a 33. E. K., enahaala okhala yawooneya wi, moohiyana ni Afarisi ni ahooleli aya, amuhuserya a Yesu aakhalano ophwanelela vamiithoni va Muluku.