Vaavaa Yesu nlelo oreiye o Yerusalemu, Ayuta oohiyanahiyana annamwaacamela yoowo. Akina anachuna ohuserya orweela wa yoowo nave akina anachuna omweererya. Mmoha a yaawo, yoowo orino masuwelelo a Malamulo, onnapaka nikoho: “Muhusiha, kini kereni wi kiphwanye ekumi yohimala?”—Luka 10:25.

Yesu onnasuwela wi tahi wi mulopwana ola onakoherya ohisuwela. Akhweya owo oneererya omweeriha Yesu wi aakhule mmukhalelo onahaala waanyeenyeiha Ayuta. Yesu onnasuwela wi mulopwana ola ookhalano moonelo woophwanelela. Mwawiihiiha Yesu mwamiruku onnamwaakhula mmukhalelo wa omweeriha mulopwana wuupulula yeeyo onuupuweleiye.

Yesu onnamukoha: “Ti seni erempwe munlivruni na malamulo? Walakhanya onino hai?” Mulopwana onnaloca Nlamulo na Muluku mwawiihiiha naakhulo nawe nnathipeleya mwemmo. Owo onnaloca ni mathipelo a yoorepa ya Malamulo 6:5 ni Onamukucho 19:18, ariki: “Wakhweleke Apwiya Muluku-à ni murima-à wothene, ni munepa-à wothene, ni ikuru sà sothene; nave miruku omukhweleke mukhwa-à ntoko weyo ene.” (Luka 10:26, 27) Apwanne nla naakhulo na nikoho na mulopwana?

Yesu onnamuleela mulopwana: “Wohakhula phama; era ela, nave onakhala ni okumi.” Nyenya apwanne ovaanela waamalenle vaavaa? Mulopwana owo hanachuna pahiru naakhulo noovira mukhwipi; owo onnaavya “wisera mekhiye ékhaikhai,” wi aroromele wi moonelo awe ti woophanelela navetho wi mukhalelo onaakhaliheiye akina ti woophaameya. Mwawiihiiha owo onnakoha: “Mukhwaka tani?” (Luka 10:28, 29, Nlakano Nahihano) Nikoho nenla naakhala ntoko wi ti nookhweya naari nawiiseela. Mmukhalelo taani?

Ayuta annaroromela wi masu awi “Mukhwaka” anaphariheliwa pahiru wa yaale anakhapelela mihapo sa Ayuta, nave enanwerya wooneya ntoko wi Onamukucho 19:18 onakhaviherya makupa ene yaawo. Mweeparipari, Muyuta onaroromela wi ti “yohiheriwa” wi othukumana ni muchu ohiri Muyuta. (Saweriwa T’arummwa 10:28) Mwawiihiiha mulopwana ola akhweyatho ni amuhuserya akina a Yesu yoona mukhataaya ntoko wi ti yawookololowa wakhala wi anamukhaliha phaama muchu yoowo ori Muyuta. Nyenya akhweya yaanaakhaliha moonanara achu yaawo ahiri Ayuta, yoowo ohiri ‘mwaacamani aya.’

Yesu aawenrye hai wookolola moonelo wa yaala ahimunyeenyinhe mulopwana ola ni Ayuta akina? Owo eenreno yeeyo orweela mu waaleela mwaha: ‘Mulopwana mmoha àkhuruwa o Yerusalemu ayaka oYerikó, nave àhuwela mmatani mwa ampava, yàmwakha itxhu sawe, yàmusareiha makuma ni etxhawa emuhiya ahanle vakhani okhwa.’ Yesu onnatilela: “Yàhereya wi mulipa a mukutxho àvira vamphironi vavale ni amonneiye mulopwana ole. àpwaha ahemenle. Vamohamoha mukhaviherya a mulipa a mukutxho àvira vavale ni, amonneiye, àpwahatho. Nto mutxhu o Samariya mmoha, ari vamukwahani, àphiya vavale nave amonneiye, àmoriwa ikharari.”—Luka 10:30-33.

Mulopwana ola Yesu aamuleeleiye mwaha onnasuwela wi anamukucho ancipale ni Alevi yaawo anakhaviherya mu tapernaakulu anakhala o Yeriko. Yaachikaka o tapernaakulu, awo anaphwanela weeca mukwaha mu ephiro ya mastatiya khumi namasese. Ephiro eyo enanwerya okhala yawoopiha, ni ampava annakhala mwemmo. Wakhala wi anamukucho ni Alevi aamphwanya Muyuta mukhwaaya akumanne ni epahu, apwanne haaphwanela omukhaviherya? Mmwaha awe, Yesu onnooniherya wi heni yeereno. Yoowo aamorinwe ikharari aari Musamariya, yoowo aakhumme mu nloko nenlo Ayuta ananyemulaaya.—Yohani 8:48.

 Musamariya aamukhavihenrye hai mulopwana aari Muyuta aaphoreihiwe? Yesu onnapwahiherya: “Àmwatxamela, àmaka makhwatxa awe ahenlemo makhurwa ni evinyu. Àn’weliha vapuruni vawe, àmukeriha empa ya aletxo ni vava amukhapelela phama. Nave mmeloni mwaya akumiha idenáryo pili, àmunnya mwanene a empa ya aletxo ariki: “Omukhapelele yola, nave etxhu onerawe onvahe yopwaha yela, miyo katxhikaka kinamoliva.”—Luka 10:34, 35.

Amanle oloca mwaha, Muhusiha Mutokotoko, Yesu, onnamukoha mulopwana nikoho nla nootannya muupuwelo: “Wa yala araru ori mukhwa a yole uwenle mmatani mwa ampava tuvi?” Akhweya mulopwana onoona okhala oohaakiheya oloca wi: “Musamariya,” mwawiihiiha owo onnaakhula: “Ti yole ammorenle ikharari.” Voocharela Yesu onnamweeriha mulopwana ohuseryavo echu mmwaha awe nihirivo nthowa, amuleelaka: “Hawé, were hiha weyotho!”—Luka 10:36, 37.

Ola mukhalelo wookhaviherya wa ohusiha! Waakhanle wi Yesu aari moona omuleela mookwakwaleya wi yaale tho ahiri Ayuta anaphwanela okhala akhwaaya, apwanne mulopwana ola ni Ayuta akina yaawo yaawiriyana yaahaala weemererya yeela? Aninko hooye. Mwawiihiiha, orweela mwa ohiya pahiru oloca ntoko mwaha vyakala, apharihelaka masu yaawo yaakhaviherya alipa oowiriyana osuwela naakhulo na nikoho, “Mukhwaka tani?” Naakhulo ti nawooneya. Muchu yoowo oneemereryeya okhala mwaacamani eeparipari ti yoowo onooniherya osivela ni mahala yaawo Soorempwa inanlamulelaaya wooniherya.