Va nihiku nookuchula na Efesta ya Misakala, nihiku naneethanu napiili, Yesu onahusiha mmakupa a “vanipuroni va muhakhu.” (Yohani 8:20; Luka 21:1) Nikupa nlo nri va Mpuro wa Athiyana, weiwo achu anaveleelaayawo sooveleela saya.

Ohiyu variyari va efesta, nikupa nenla na empa ya Muluku ninnamwaleeleya. Wookhalavo onyaari otokotoko misese iri vaava, nave onyaari woothene woosareya ni makhurwa. Waarya wa onyaari owo onnakhala otokotoko ophiyerya wi onnaphiya mmakupa oorukurerya oorakamela. Yeeyo Yesu onaloceiye hiihaano ennawuupuxerya alipa oowiriyana awe vooloca sa onyaari yoola: “Miyo kiri ekamama ya elapo. Onakitxhara miyo harwa etxa mwepiphini, nto onamukhalano ekamama ya ekumi.”—Yohani 8:12.

Afarisi annavaanya masu a Yesu nave annaloca: “Weyano onihelela onamona mekhà. Vano onamona à tahi weparipari.” Yesu onnawaakhula: “Miyo kinihelela onamona mekhaka, onamona aka ti weparipari, ntakhara kòsuwela kinarwakawo ni kinayakawo. Nto nyuwo himusuwenle kinarwakawo nari kinayakawo.” Owo onnaaceererya: “Nave yòrempwa mmalamuloni mwanyu wi onamona wa atxhu eli ti weparipari. Miyo kinihelela onamona mekhaka, navetho Atithi akirumme annakihelela onamona.”—Yohani 8:13-18.

Eheemereryaka mahusiho awe, Afarisi annakoha: “Ari wowi Atithi-à?” Yesu onnaakhula mooluluwanya: “Himukisuwenle miyo nari Atithi. Mwakisuwenle miyo, mwamwasuwelatho Atithi aka.” (Yohani 8:19) Naamwi nlelo Afarisi echunaka omphara Yesu, haavo naari mmoha aamutannya.

Yesu onnuuluula masu yaale omanleiye oloca khalai: “Miyo kinamutximula nave nyuwano muna mukasya, ni munamukhwa motxhekani  mwanyu. Nave weiwo kinayakawo, nyuwano himunawerya oyawo.” Ayuta ehiiwexexaka phaama miteko sa Yesu, annapacerya wiikoha: “Wakhweya onaya wisipha, wona wi onni: weiwo kinayakawo nyuwo himunawerya oyawo?” Awo haniiwexexa yeeyo Yesu onaloceiye, nthowa nawi awo hasuwenle weiwo okhummeiwo. Yesu onnathariha: “Nyuwano muri a vathi vava, nave miyo kiri a wirimu. Nyuwo mwà a elapo yela, miyo nkiri a elapo yela.”—Yohani 8:21-23.

Yesu onaloca sa okumi awe wa wirimu ahiruule veelaponi ni okhala wawe Mesiya oolaiheryiwa, naari Kristu, yoowo ahooleli ala ananweheryaaya. Mwawiihiiha, awo annamukoha mwa munyemu eriki: “Weyano w’ani?”

Vamiithoni va okhooca ni ovaanya waya, Yesu onnawaakhula: “Ovinya wopatxeryani koholèlani yeyo kinolèlakani vano!” Nlelo, mooluluwanya owo onnaloca sa Atiithi awe nave onnathariha ntakhara heeni Ayuta annaphwanelaaya onwiriyana Mwaana: “Nto yole okirumme t’èparipari, nave kinnàlèla atxhu sothene kiwalaka wa yowo.”—Yohani 8:25, 26.

Voocharela Yesu onnooniherya nroromelo mwa Atiithi awe, nenlo Ayuta ala ahiryaayano: “Mwamuthomeyà Mwana a mutxhu, munamusuwela wi miyo kòkhala, nave wi nkinera etxhu mekhaka, nto kinnalotxa ntoko Atithi akihusin’haya. Nave yowo okirumme ori ni miyo. Hakihin’ye mekhaka, ntakhara kinera yele enamusivela.”—Yohani 8:28, 29.

Ayuta akina annamuroromela Yesu, nave owo onnaloca wa yaawo: “Mwakhala mwa nsu naka, munamukhala epariparyene amuhuseryaka, Nave munamusuwela eparipari, ni eparipari enan’wopolani.”—Yohani 8:31, 32.

Wa akina, masu yaala awi okhala awoopowa annakhala eeleco. Awo annaakaaha: “Hiyo nri ana a Abrahamu nave hintonko okhala akapuro a mutxhu mukina. Weyano onawerya hai wi munamukhala anethi?” Ayuta annasuwela wi mu elukuluku awo yaalamuleliwa ni nloko nikina, naamwi hiiha awo annakhooca weeriwa akapuro. Yesu onnooniherya vanlakani wi naamwi hiiha awo nlelo ari akapuro: “Eparipari txhiryene kinnolelani: yole onera yotxheka ori kapuro a yotxheka.”—Yohani 8:33, 34.

Ayuta okhooca waya okhala akapuro a yoocheka ennaahela va yawoopiha. Yesu onnathariha: “Vano kapuro hanakhala vetxhekoni mahiku othene, nto mwana t’onakhala vava mahiku othene.” (Yohani 8:35) Kapuro haanono ekari ya waakhela echu vyakala, nave elukuluku eri yoothene awo onanwerya wiikariwa. Pahiru mwaana yoowo oyariwe veechokoni naari opoleiwe onamutitelela okhala a vaava “mahiku othene,” eyo tiwi okumi awe woothene.

Mwawiihiiha, eparipari vooloca sa Mwaana ti yeeyo enaataphula achu wa yoocheka eniipha okhala wookhala. Yesu onnalokoha: “Vano Mwana awopolani, munamukhala txhiri anethi.”—Yohani 8:36.