Vaavaa Yesu onalyeiye mpa mwa Mfarisi mmoha, achu macikhwi awaaca annamuweherya vaate. Owo ookumanano yaweeha ya nloko na achu o Kalileya. (Marko 1:33; 2:2; 3:9) Vano ori o Yuteya, ancipale annachuna omoona ni onwiriyana, yooniheryaka mukhalelo woohiyana ni wa Afarisi va yoolya.

Yeeyo Yesu onaloceiye voopaceryani erino yootaphulela wa amuhuserya awe pahiru: “Wa nyuwano mwikosopeke ni miropo sa afarisi, ti wi wisotherya.” Yesu onnaalopola woopaceryani, nyenya yeeyo onooneiye va yoolya ennooniherya mukhalelo ekano ela eryaaya yawaakuveya. (Luka 12:1; Marko 8:15) Akhweya Afarisi anneererya wiipithiha mukhalelo aya woonanara yiisoneihaka ntoko achu oovekela, nyenya awo tawoopiha annaphwanela wuupululiwa vanlakani. Yesu onnaloca: “Hiyavo eri yokhuneliwe eni ehupululiwe, nari mano evithiwe eni ehisuweliwe.”—Luka 12:2.

Akhweya muloko wa achu omurukurenrye Yesu ti Ayuta yaawo ahintoko omwiiwa ahusihaka o Kalileya. Mwawiihiiha owo onnuuluulela masu oochuneyaxa yaawo aalonceiye woopaceryani. Owo onnaaceenyerya oothene yaale ananwiriyana: “muhiwoveke yale anipha mwili, nave oholo waya hanaweryatho wer’e txhu.” (Luka 12:4) Ntoko enreiye woopaceryani owo onnaaceenyerya oomuchara awe wi eroromele wi Muluku onahaala waakhapelela yaawo. Awotho anaphwanela omusuwela Mwaana a muchu ni osuwela wi Muluku onahaala waakhaviherya.—Mateu 10:19, 20, 26-33; 12:31, 32.

Voocharela mulopwana mmoha aari mmuloko wa achu ole onnaruuha minikwa sawe mwawaakuveya: “Muhusiha, omulèle munnaka akikawele muhakhu wohiyeriwa.” (Luka 12:13) Nlamulo naaloca wi mwaana oopacerya oyariwa taapahwanela waakhela makupa meeli a mikelampa, mwawiihiiha haavovo aaphwanela ovaanya yeela. (Malamulo 21:17) Ela enooneya ntoko wi mulopwana ola onachuna ichu saawaaca opwaha aaphwaneleiye ovahiwa. Yesu mwamiruku onnakhooca yeeyo ovenke mulopwana ola. “Mukhwaka tani okipanke miyo wi kikhale muthoriha nari awokawelani?”

Yesu onnavaha olopola ola wa achu oothene: “Vareryani phama, muhikhale atxhu a mìko, wona wi, nari morèlani, ekumi ya mutxhu henalipa wa nthowa na muhakhu oreiyeno.” (Luka 12:15) Moohipwacha ikhorowa kavi muchu oreiyeno, apwanne muchu hanakhwa ni ohiya soothene muculi? Yesu onnaceenyerya masu yaala vamoha ni owuupuserya orweela mwa niphwanaphwaniho nenlotho nnooniherya ochuneya wa okhalano nsina naphaama ni Muluku.

“Ematxa ya mutxhu òrèla mmoha yàtepasa ovaha solya. Vanonto owo àhupuwela: “Kini kere seni? Nkano nipuro nohelamo sohepha’ Ni àhupuwelatho: ‘Kini kere ha: kinammwarya makhupi aka, kipake matokwenesa, kihelemo sohepha ni saphama saka sothene. Nave kilotxe ni murima aka: wòkhalano sothene sintxipale sokhapeleliwa ophiyerya miyakha sawatxa, Vano itxhuwá, olye, owurye ni hakalalá.”’ Nto Muluku àhi wa yowo: ‘Mulipa òlosowa we! Ohiyu yola onanvekiwa munepa-à. Vano itxhu okhapelenlawe ini ikhale sawani?’ Hiha enereya wa yole onithukumanyerya muhakhu ni ohinarèla vamithoni va Muluku.”—Luka 12:16-21.

Oopiili amuhuserya a Yesu ni akina yaawo yanwiriyana yaanwerya okhala oweiwa yaavyaka naari ethukumanyaka muhakhu. Naari okhapelela ikumi saya waahaala owooceeliha omurumeela Yehova. Mwawiihiiha Yesu onnuuluulela ekano ya miruku owo aavanheiye woopaceryani  mu eyaakha emoha ni emeya muculi va Mwaha wa Vamwaakoni.

“Muhipe murima ni ekumi, ni yolya, ni mwili nari ni yowara. . . . Woneni anakhuku, awo hanala, nari hanahepha, hano nikhupi nari empa ekina wokhapelelavo nto Muluku onnàlyiha. Vano nyuwano mòtepa opwaha ipalame. . . Onani ithutu, hinalapa, nari hinasona. Nto kinnolèlani wi nari mano Salomau, ni ovuwa wawe wothene, hàtonko owarela ntoko emoha wa seiho. . . . Muhasyake yolya nari yowurya; muhìpe murima! . . . Atithinyu àsuwela wi nyuwano munnahawela itxhu seiho. Mpatxerye toko wasya omwene wa Muluku, nave itxhu ikina iha inamwatxereriwa wa nyuwo.”—Luka 12:22-31; Mateu 6:25-33.

Taani oni aavye Omwene wa Muluku? Yesu onnuupulula wi achu vakhaani, “muhuwo mukhani,” wa achu ororomeleya toni weereno yeela. Ohoolo waya ela enahaala usuwanyeya wi achu ala ari awaakhana 144.000 pahiru. Tiheeni awo anawehereryaaya? Awo aakhalano yoororomeliha ya Yesu: “Òhasivela Atithinyu wovahani omwene.” Awo hanateteiwa ophwanya muhakhu wa vathiva, vaava ampava aneeraaya ewerye wiiya. Moohiyana, mirima saya iri va “muhakhu wohimala wirimu” weiwo anahaalaaya olamulelaka ni Kristu.—Luka 12:32-34.