Vano nto omakuchuwelo wa eyaakha ya 32 E.K., ivinre iyaakha raru ovinyerya vaavaa Yesu aapatisiweiye. Owo ni amuhuseryaawe ahiihaano ari va Efesta ya Tapernaakulu o Yerusalemu. Awo aninko ari vakhiviru. (Luka 10:38; Yohani 11:1) Mweeparipari, Yesu onnamaliha miyeeri mithanu nammoha sa muteko woolaleerya o Yuteya waacamela o Muhice wa Yortano mu epooma yo Pereya. Olaleerya ti wookhweleyaxa mmuceche.

Voopacerya, amanle ovira Paskha a 30 E. K., Yesu onnamaliha miyeeri mikina alaleeryaka o Yuteya nave onnavira o Samariya. Ohoolo waya, mu elukuluku ya Paskha a 31 E.K., Ayuta yaaheererya omwiipha. Wa eyaakha yoocharela ni emeya Yesu aahihusiha xaxaxa o ohico wo Kalileya. Mu elukuluku yeele, ancipale yaahikhala amuhuserya awe. O Kalileya Yesu aahaavyakiha arummwa awe nave voocharela aahaarumiha ni malakiheryo ala: “Munaviranyuwo mulaleyeke muriki: Omwene wa wirimu ori vakhiviru.” (Mateu 10:5-7) Hiihaano onnarehererya mukipici wa onamoona o Yuteya.

Wi apacerye mukipici yoola, Yesu onnaathanla amuhuserya makhumi mathanu nameeli nave onnarumiha yaawo eeli, eeli. Mwawiihiiha ari makhuuru makhumi mararu nathanu a alipa oolaleya sa Omwene mmucecheni, weiwo “ematxa yotepa wunnuwa, nto anamalapa ari vakhani.” (Luka 10:2) Awo annaya mmapuro yaawo Yesu onaphwaneleiye waachara. Arummwa oothene makhumi mathanu nameeli annaapenusa areca nave annamwaryamwaxa muchaka mmohamoha yoowo Yesu onalaleyeiye.

Arummwa yaala hanatikitheryeya ohusiha mu asinakooka. Yesu ohaaleela wi eye mu ipa sa achu. “Empa yeyo muneranyu nvolowemo,” owo onnaahusiha “mpatxerye olotxa wi: muretxele okhale mpa mumu. Akhàlavo mutxhu a muretxele, muretxele anyu onammukhuruwela yowo.” Tuuvi ori muchaka aya? Yesu onnaloca: “Mwalèleke muriki: Omwene wa Muluku ori vakhiviru vanyu.”—Luka 10:5-9.

Mahusiheryo Yesu onaavaheiye arummwa makhumi mathanu namararu ala mamohamoha tho ni yaawo aavanheiye amuhuserya khumi napiili vaavaa aaruminheiye mu eyaakha yoopacerya. Owo onnaleela wi tahi oothene eni ewaakhele phaama. Wiilipiserya waya ohusiha, onahaala waarehererya omwaakhela Yesu wi vaavaa oneereiye aphiye ohoolo waya, ancipale anahaala okhala oopwanelela omusuwela Pwiya ni ohuserya orweela wa yoowo.

Moohilekela, makhuuru oothene anamalaleya a Omwene annakookela wa Yesu. Awo annamuleela yoowo moohakalala: “Apwiya, nari masololo yán’lapa hiyo mu nsina nanyu.” Yoolokoha yaphaama ela ennamuhakalaliha Yesu nave owo  onnaakhula: “Káhóna Satana arikimmora ntoko etari orwela wirimu. Nkonani, kihovahani olamulelo wonyikala va inowa ni iyalala.”—Luka 10:17-19, Nlakano Nahihano.

Mwawiihiiha Yesu onnaaroromeliha oomuchara awe wi awo ananwerya osepa ichu soophoreiha, moosiphela seiho iri inowa ni iyaalaala. Navetho ananwerya ororomela wi ohoolo Satana onahaala wiikariwa wirimu. Yesu tho onnaakhaviherya arummwa makhumi mathanu namararu woona teevi eri yoochuneya ovira wa elukuluku. Owo onnaloca: “Muhihakalale wa nthowa na minepa inawiwelelani; nto mpatxerye ohakalala ntakhara masina anyu arempwe wirimu.”—Luka 10:20.

Yesu ootepa oohakalala nave onnaathamalela Atiithi awe nthowa na waapharihela alapeli awiiyeviha yaala mmukhalelo woowerya sintoko yoola. Akookelaka wa amuhuserya awe owo onnaloca: “Òrèriwa ti mitho anona itxhu munonanyu! Wona wi miyo kinnolèlani wi alipa à miririmu antxipale ni mamwene àkhwela wona itxhu munonanyu, nto honne; wiwa itxhu muniwanyu, nto hiwale.”—Luka 10:23, 24.