Vaava oreiye o Yuteya, Yesu onneemererya nwopelo ntakhara yoolya wa Mfarisi mmoha. Enakhala ntoko wi variyari va nihiku, ohiya yoolya ya wooxixelo. (Luka 11:37, 38; mulikanyihe ni Luka 14:12.) Ehaakumve olya, Afarisi annaapaka muhapo aya wa onyawa mmatani ophiyerya mmiwononi. Nyenya Yesu haneerano. (Mateu 15:1, 2) Mukhalelo yoola wa onyawa hiwaahaala ovuhana ni Nlamulo na Muluku, mwawiihiiha ela tahi yeeyo Muluku onakhweleiye.

Afarisi annamutikhina Yesu ntakhara hanachariha muhapo yoola. Yesu onnasuwela yeela nave onnaloca: “Vano nyuwo afarisi, munamurapiha kopho ni epratho vate, ni mpuwa mwanyu musaren’ye wiya ni sonanara. Òlosowa nyu! Opanke vate, hapanketho mpuwa mwaya?”—Luka 11:39, 40.

Onyawa mmatani ehaakumve olya tahi yoochuneyaxa, nyenya malapelo oowoka ta neerano yeela. Afarisi ni akina yaawo anachariha muhapo wa onawa mmatani annooceela orapiha mirima saya wa soonanara. Mwawiihiiha Yesu onnaavaha ekano: “vahani ntoko yamahala ya ikharari sa mpuwamo, nave sothesene ini ikhale sorapene wa nyuwo.” (Luka 11:41) Ela eparipari! Ovaha onaphwanela okhala wa nsivelo noorweela vathi va murima.

Tahi wi alopwana ala hanavaha samahala. Yesu onnooniherya vanlakani: “Nto otxulu ti wa nyuwo afarisi, munaliva musokho wa itxhu ikhanisa sa mmatxani, nto muhinapwatxha wokololowa ni okhwela wa Muluku! Yaphwanenle otxhariha itxhu seiha, muhihin’ye ihe.” (Luka 11:42) Yoolivela ya musokho Nlamulo na Muluku niichana (yaneekhumi) ya soohepha. (Malamulo 14:22) Eyo yaaphitaanyerya mmiso ni oveka nikhurumuwelo, makukhu a miri yaawo yaaphariheliwa wi esivihiweno yoolya. Afarisi oororomeleya yaanaliva yaneekhumi ni makukhu yaala, nyenya tiheeni eri yookhweleyaxa wa Nlamulo, ntoko okhala awookololowa ni okhala oophwanelela vamithoni va Muluku?—Mikeya 6:8.

Yesu onnaya wa yaawo alocaka: “Otxulu ti wa nyuwo afarisi, nnosivelani nipuro nopatxerya musinagoga ni omwenyeriwa mmapuwani! Otxulu ti wa nyuwo, ntakhara muri ntoko mahiye ahinoneya, atxhu anaweryaya onyikhala, ehisuwelaka.” (Luka 11:43, 44) Aai, achu yaahaala okwaculeya ntakhara othanana ni okhala mukucho wooripiheya. Yesu onnapharihela masu yaala awi sooripiheya sa Afarisi ti sawiipitheya tahi sawooneya vasiiyoni.—Mateu 23:27.

Mulopwana mmoha yoowo orino masuwelelo mu Nlamulo na Muluku onniikhupanyiha: “Muhusiha, walotxaka hiha onnanruwana hiyanotho.” Mwawiihiiha mulopwana ola onachuna osuwela wi awo annahesa waakhaviherya achu. Yesu onnaloca: “Otxulu ti wa nyuwo alipa a malamulo, ntakhara munàtxukhuliha atxhu miritxi solimela, nave nyuwo himunaphara mano ni ekatha emoharu. Otxulu ti wa nyuwo munateka mahiye a alipa a miririmu, eniha eri makholo anyu awiphale.”—Luka 11:45-47.

Mirici seiho Yesu onaaheiye ti mihapo sa Afarisi ni mukhalelo awo anataphulelaaya Nlamulo. Alopwana ala haneeriha okumi wa achu okhala wookhweya. Ohiya yeeyo, awo annatitelela waareya achu yeeyo eri murici woohokola. Makholo aya yaawiipha alipa miririmu, opacerya ni Apele oyaaka ohoolo. Vano, yaawo aniipaka ntoko alipa a miririmu oocicimihiwa orweela mwa oteka mahiye wa yaawo, anachariha muupuwelo ni meerelo a makholo aya. Awo nlelo annawaavya alipa a Miririmu ookhwelaxa a Muluku wi ewiiphe. Yesu onnaloca wi Muluku onahaala othoriha muyareriwo yoola. Nave ela yaahikhwaanela mu eyaakha ya 70 E.K. ohoolo waya.

 Yesu onnatitelela: “Otxulu ti wa nyuwo, alipa a malamulo, ntakhara mòkusa esavi ya osuwela! Nyuwo hinvolon’we nave mùhakhotxiha ale yakhwela ovolowa!” (Luka 11:52) Alopwana ala, yaaphwanela othariha phaama Masu a Muluku, annakakhela okhwipi ekari ya achu ntakhara osuwela ni wiiwexexa phaama masu yaala.

Afarisi ni alipa oorepa anaakhulela hai? Vaavaa Yesu onacimuleiye, awo annapacerya onvaanya yoowo mooximwa epharihelaka makoho. Awo hanamukoha ni yoolakelela ya ochuna ohuserya. Opwaha yeeyo, awo anachuna omweeriha Yesu oloca echu enahaalaaya omphwanyeryano nthowa wi emmake.