Vano elukuluku ya ephovo. Mwawiihiiha, ela elukuluku wi echoko ya Yosefe, vamoha ni asinthamwene ni amusi, epake mukwaha aya oya o Yerusalemu. Awo anaya weiwo wi yapake efesta ya Paskha, hiiha ntoko Nlamulo nnalamulelaaya. (Malamulo 16:16) Ovinyerya o Nasareti mpaka o Yerusalemu mukwaha wa mastatiya 120. Muchu ti muchu ori ooweiwa nave elukuluku yoohakalalaxa wa oothene. Yesu vano ni iyaakha 12, onnaweherya ophwanyeya va efesta nave ni ekari ya okhala wanawiili waacamela empa ya Muluku.

Wa Yesu ni a veechokoni, Paskha tahi yaweereya vyakala ya nihiku nimoha. Amanle Paskha ennapacerya Efesta ya mahiku mathanu napiili ya Ephau Yoohiheliwa Miropo. (Marko 14:1) Eyo enooniwa ntoko makupa a Paskha. Mukwaha ovinyerya owannyaya o Nasareti, olekela waya o Yerusalemu, ni okookela owannyaya onamaliha isumana piili. Nyenya eyaakha ela, wanthowa na echu enamvolowela Yesu, mukwaha onnalekela tonto. Echu yeeren’ye naari nikacamiho nnakhumelela ekookaka o Yerusalemu.

Variyari va mukwaha, Yosefe ni Mariya anuupuwela wi Yesu ori nnikhuuru na amusi ni asinthamwene aneeca vamoha. Nyenya, vaavaa aneemelaaya ohiyu, hanawerya omphwanya. Mwawiihiiha annamwaavya variyari va asinthamwene aya, nyenya hanamoona. Mmiravo aya oorimeela! Yosefe ni Mariya annakookela o Yerusalemu wi yamwaavye.

Annamwaavya mu nihiku nanteero, ehimphwannyeru. Naari mano nihiku nanawiili hanawerya omphwanya. Wookuchulani, mu nihiku naneeraru, awo annamphwanya mwanaya mu empa ya Muluku, yeeyo erino isaala sincipale. Awo annamoona Yesu akiranthe veeri va ahusiha o Yuteya. Owo onamwaawiriyana, nave onaapakela makoho, nave onnaatikhiniha ni wiiwexexa wawe.

Mariya onnamukoha: “Mwanaka, onerenleni etxhu si yela? Atithi à ni miyano nànawasya ni murima onìnale!”—Luka 2:48.

Yesu onnaloca masu anooniherya wi awo henasuwela weiwo aaphwaneleiye okhalawo. Owo onnaakoha: “Mwakaseryani? himwasuwela wi enaphwanela wi kithokoreryeke sa Atithi aka?”—Luka 2:49.

Vano aryaaya vamoha, Yesu onnakookela owaani o Nasareti ni Yosefe ni Mariya nave onnatitelela owiiwelela. Owo onnannuwa mmirukuni ni omwiilini. Naamwi nlelo ari mmiravo, owo onneemereryiwa vamiithoni va Muluku ni va achu. Chiryene, ovinyerya onamwane awe, Yesu oovaha yootakiherya yaphaama ohiya pahiru mu ichu soomunepani nyenyatho mu wooniherya ncicimiho wa asitiithi awe.