Yosefe onnamviiha Mariya wi amuleele michaka sawaakuveya. Munkeelo a Yehova aahimphiyerya moolohani, nave aahimuleela: “Vinyá, omukuse mwana ni amannya ni otxhawele w’Egipitu. Okhale weiwo ophiyerya elukuluku kineraka kolèle, ntakhara Heróde onasya omwipha mwana.”—Mateu 2:13.

Mwawaakuveya, Yosefe, Mariya ni mwanaya annachawa ohiyu. Awo anneerano mu elukuluku yoophwanelela, woona wi Herote onnasuwela wi anamiruku aanwoka. Owo aahaaleela wi emuleele michaka ekookaka. Moohiyana, awo yaahirowa ehimulenle echu. Herote ootepa onyeenyeya. Nlelo achunaka omwiipha Yesu, owo onnalamulela wiiphiwa anamwane aasilopwana a iyaakha piili oya vathi o Petelehemu ni mmapuro oorukurerya. Owo aalakhanyenrye iyaakha seiya mwawiiwanana ni yeeyo aasuwenleiye moorweela wa anamiruku yaawo yaakhumme Onakhumawo Nsuwa.

Onyokiwa wa anamwane aasilopwana epahu yoothananihaxa! Hiyaano hinsuwenle anamwane akavi yiiphiwe, nyenya winla woovirelela ni wiikhupanyerya wa asimai yaayeleenle anamwane yaahikhwaaniherya yooloherya ya Piipiliya yaalociwe ni Yeremiya, mulipa a miririmu a Muluku.—Yeremiya 31:15.

Mu elukuluku emohamoha, Yosefe ni emusi awe yaahichawela o Yikuputu, nave yaahititelela okhala weiwo. Voocharela mu ohiyu omoha munkeelo a Yehova aahirwa wanawiili moolohani wa Yosefe. Munkeelo aahiloca: “Vinyá, omukuse mwana ni amannya ni okòkele wa elapo ya w’Isarayele, ntakhara yale yakhwela omwipha mwana, àkhwa.” (Mateu 2:20) Mwawiihiiha Yosefe aahisuwela wi yaaphwanela okookela mu elapo aya. Mmukhalelo yoola yooloherya  ekina ya Piipiliya yaahikhwaanela—koomwiichanawo o Yikuputu mwanaka.—Oseya 11:1.

Mwawooneya, Yosefe uupuwela wi emusi awe yaaphwanela omaka o Yuteya, akhweya waacamela o Petelehemu, weiwo yaamankaayawo ehaakumve ochawela o Yikuputu. Nyenya aahisuwela wi mwaana a Herote, Arkelawu aari mulamuleli o Yuteya. Mu yooloha ekina, Muluku aahimulopola Yosefe vooloca sa yawoopiha. Mwawiihiiha Yosefe ni emusi awe yaahithaamela omokoni nave yaahimaka o epooma yo Nasareti mmuceche wa Kalileya, ocai wa nipuro na malapelo a Ayuta. Yesu aahunnuwa mmuceche yoowo, yeeyo yaakhwanihenrye yooloherya ekina: “Onamwitxhaniwa Munazaré.”—Mateu 2:23.