Nnanwerya omuthokororya Piipiliya anteero ntoko muchaka onarweela wa Muluku. Tiithiihu awirimu oonivaha wi anihusihe. Muthokororye michaka miili savameekhaaya iperekhiwe opwaha iyaakha 2.000 ivinre. Michaka iho saaperekhiwe ni munkeelo nsina nawe Kapriyele, yoowo onakhala “vamithoni va Muluku.” (Luka 1:19) Mikhalelo taani saarivo elukuluku yeeyo munkeelo aaperenkheiye michaka seiya sookhweleya?

Eyaakha ya 3 E.E.K. Ti woowi munkeelo Kapriyele onaperekheiyewo muchaka woopacerya? Mu makupa a miyoko so Yuteya, akhweya waacamela o Yerusalemu, weiwo aakhalawo namukucho a Yehova nsina nawe Sakariya. Owo ni mwaariye, tawuuluvala, nave haanono anamwane. Vano elukuluku ya Sakariya orumeela ntoko namukucho mu empa ya Muluku o Yerusalemu. Vaavaa oreiye mu empa ya Muluku, munkeelo Kapriyele onnooneya mootutusa waacamela nipuro onapahiwavo erupiha.

Mwawooneya, eyo ennamoopopiha Sakariya. Nyenya munkeelo onnammaaliha Sakariya, alocaka: ‘Ohòve, Zakariya, ntakhara oveka wà wohiwiwa, nave Isabél mwara-à onammuyara mwana, yowo onerawe omutxhuwe ni nsina na Yohani.’ Kapriyele onnaaceererya wi Yohani “oni akhale mutokwene vamithoni va Apwiya” nave “onamurukunusela mirima sa ana a Isarayele wa Apwiya, Muluku aya.”—Luka 1:13-17.

Wa Sakariya eyo enakhala ntoko yooheemereryeya. Ntakhara heeni? Nthowa na iyaakha sawe ni sa mwaariye. Mwawiihiiha Kapriyele onnaloca ni yoowo: “Onamuhiya olotxa ni howerya olotxa etxhu ophiyerya nihiku eneraya yereye etxhu yeyo, ntakhara hiwemerenrye masu aka.”—Luka 1:20.

Mu elukuluku yeeyo, achu ari vaate anniikoha ntakhara heeni Sakariya onnamaliha elukuluku yincipale ahikhumme. Vookuchulani onnakhuma, nyenya ahiweryaka oloca. Sakariya pahiru onawerya opaka ineneeryo ni mata awe. Eyo enooniherya wi owo ohoona echu yootikhiniha ari mu empa ya Muluku.

Amanle okuchula muteko awe mu empa ya Muluku, owo onnakookela owannyawe. Ohoolo waya, Isapeli onnarupala! Mu miyeeri mithanu nammoha, aweheryaka omuyara mwanawe, Isapeli onnakhala owaani ahooniwaka ti achu.

Voocharela Kapriyele onnarwa mu ekwaha yanawiili. Wa aani? Wa namwali ohitheliwe nsina nawe Mariya, yoowo onakhala omokoni wo Yerusalemu nipuro nniichaniwa Kalileya, mu epooma yo Nasareti. Tiheeni munkeelo onamuleeleiye? Owo onnaloca: “Wòphwanya mahala vamithoni va Muluku.” Kapriyele onnamuleela Mariya: “Vano onahala orupale ni onammuyara mwana onerawe omutxhuwe ni nsina na Yesu.” Nave Kapriyele onnaloca sa Yesu: “Owo onahawela akhale mutokwene ni oni itxhaniweke mwana a Mutokwenesa . . . ni onahawela alamuleke vetxhokoni ya Yakobe, navetho omwene awe horwa omala.”—Luka 1:30-33.

Nyuwaano munnawerya waanyiherya mukhalelo Kapriyele onooneiye okhala wookhweleya olokoha michaka seiya miili! Vaavaa nneeraahu naalakhanye sincipale vooloca sa Yohani ni Yesu, enahaala okhala yawooneya ntakhara heeni michaka seiya sinarweela wirimu siraaya sookhweleyaxa.