Wakhala wi eparipari, nkuupuwelani mukhalelo eyo yaahaalaaya ovolowela okumi ahu. Ntoko yootakiherya, mwaana a munna mmoha aahiiheya. Atiithi awe yaathanana vancipale. Awo yaanikoha waakhanle wi Yehova aahoona yeeyo yaahaala weereya omwaahiyu nave aasuwela wi owo ni mwaariye yahaala owerya ovilela epahu yeela. Mu elapo yeela, ancipale a hiyo nnahaala okumanano makacamiho. Apwanne nnaphwanela ororomela wi Yehova onnavareryela ichu soothene sineereya muukumini mwahu?

Vaavaa nnathokororyaahu yoorepa ya 1 Korinto 10:13, nnahaala woona wi Piipiliya hanakhaviherya muupuwelo wawi Yehova onnasuwela elukuluku nnahaalaahu owerya ovilela nave alakelela yaweeha nnahaalaahu okumanano. Ntakhara heeni ninnaloca yeela? Hankooni nthokororye mathowa masese.

Noopacerya, Yehova ohaavaha achu othanla woochuna, otaphuwa opaka soothanla. Owo onachuna wi nipakeke soothanla sahu. (Malamulo 30:19, 20; Yosuwa 24:15) Wakhala wi nnathanla opaka soolakelela sinamuhakalaliha Yehova, nnaphwanela omuroromela wi anihoolele. (Masiposipo 16:9) Nyenya napaka soolakelela soonanara, nnahaala okhalano sookhumelela sene. (Galasya 6:7) Vanonto, waakhanle wi Yehova onnathanla yaweeha nneeraahu nikumaneno, apwanne nahaala chiryene okhalano othanla woochuna?

Nanawiili, Yehova hanaciyelela “otakhaliwa” woothene yoowo ‘ohinamuthanla mutxhu.’ (Eklesiyaste 9:11) Muchu onamukumanano epahu nthowa nawi ori mu elukuluku ni mpuro woohiphwanelela. Yesu aahiloca sa epahu yeeyo yaawiiphale achu 18 vaavaa ixiri saakumuwenlaaya. Owo aahooniherya mookwakwaleya wi tahi Muluku aawiiphale. (Luka 13:1-5) Tahi woophwanelela wuupuwela wi ehaakumve weereya epahu, Muluku onnamusuwela taani onahaala okhala naari okhwa.

Naneeraru, muchu ti muchu a hiyo ookhalano ekari ya okhala oororomeleya wa Yehova. Satana olonce wi akapuro a Yehova anamurumeela Muluku wa nthowa na yeeyo onaavaheiye. Satana aahiloca wi hinni ntitelele ororomeleya wa Yehova wakhala wi nookumanano yaweeha. (Yobi 1:9-11; 2:4; Wupulula 12:10) Wakhala wi Yehova onnanikhapelela mu saweeha sammoori, akhweya waahaala okhala wi Satana aalonce eparipari.

Naneexexe, Yehova hanateteiwa osuwela woosiilo ene ichu soothene sinahaala oniphacuwela omwaahiyu. Eparipari ti yawi, Yehova onnasuwela yeeyo enahaala weereya omwaahiyu wakhala wi oolakelela osuwela. (Isaiya 46:10) Nyenya Piipiliya onnaloca wi owo hanasuwela woosiilo ene ichu soothene ehaakumve ophiya elukuluku aya. (Maphatxuwelo 18:20, 21; 22:12) Yehova toosivela ni awookololowa, mwawiihiiha owo hanavolowela otaphuwa wahu opaka soothanla.—Malamulo 32:4; 2 Korinto 3:17.

Tiheeni Paulo aachuneiye oloca vaavaa aalonceiye wi “hohiyani wi mwereryiwe opwaha ikuru sanyu”? Va, Paulo aachuna oloca yeeyo Yehova oneereiye variyari va weehiwa, ohiya yaweeha ehaakumve ophiya. * (Moone masu avathi.) Wakhala wi ninnamuroromela Yehova, owo onahaala onikhaviherya mu saweeha vyakala muukumini mwahu. (Salumu 55:23) Vano nnahaala othokororya mathowa meeli yaamweerinhe Paulo oloca sa yeela.

Nthowa noopacerya ti nawi, saweeha nnakumanaahuno “hipwahile mphimo womutxhu.”  Woona wi nnakhala mu elapo yeela ya Satana, nnahaala okumanano makacamiho. Nyenya wakhala wi ninnamuroromela Yehova, nnanwerya ovilela saweeha seiyo ni otitelela okhala oororomeleya. (1 Pedro 5:8, 9) Iciciri soopacerya sa 1 Korinto ecima 10, Paulo oorepa vooloca sa saweeha Aisarayeli yaaryaayano mutakhwani. (1 Korinto 10:6-11) Yaale yaamuroromenle Yehova yaawerya ovilela saweeha seiye. Nyenya a Isarayeli akina hiyaamwiiwelenle Yehova. Awo hiyaatitelenle ororomeleya wa Yehova nthowa nawi hiyaamuroromenle Muluku.

Nthowa nanaawiili ti nawi “Muluku ti òroromeleya.” Ela enataphulela eheeni? Wakhala wi noovarerya mukhalelo Yehova onaakhapeleleiye akapuro awe ovinyerya khalai, chiri ninnoona wi owo onnaakhaviherya yaale anamukhwela nave “anatxhariha malamulo” awe. (Malamulo 7:9) Noohuserya wi Yehova mahiku oothene onnakhwaaniherya malakano awe. (Yosuwa 23:14) Nnaphwanela ororomela wi (1) Yehova heemererya wi yaweeha vyakala ekhale yoowalamelasa wa hiyo, nave (2) owo onahaala ‘onivaha ikuru.’

Ti mwawiihai Yehova ‘onavaheiye ikuru’ yaale anamuroromela? Eparipari wi owo ookhalano owerya wa oviihavo yaweeha. Nyenya, muupuwele wi Paulo olonce wi Yehova “onamovahanitho ikuru wi n’werye ovilela.” Mwawiihiiha, Yehova onnanivaha ikuru wi niwerye otitelela okhala oororomeleya. Hankooni nthokororye mikhalelo mikina owo oneereiyeno yeela.

• Yehova “onnanihakalaliha mwa masoso ahu othene.” (2 Korinto 1:3, 4) Owo onnamaaliha muupuwelo ahu ni murima ahu moorweela wa Piipiliya, munepa awe waweela ni mulapeli ororomeleya.—Mateu 24:45; Yohani 14:16; Aroma 15:4.

• Yehova onampharihela munepa awe waweela wi anihoolele. (Yohani 14:26) Munepa waweela onannikhaviherya wuupuwelela saweereya sa Mpiipiliya ni malakiheryo wi nipake soolakelela mwa miruku.

• Yehova onahaala waapharihela ankeelo awe wi enikhaviherye.—Ahebri 1:13b

• Yehova onahaala waapharihela anna ni arokora wi enikhaviherye. Awo ananwerya onilipiha mwa yeeyo analocaaya ni anapakaaya.—Kolosi 4:11.

Tiheeni nihusenryaahu orweela wa masu a Paulo anaphwanyeya mu 1 Korinto 10:13? Yehova hanathanla yaweeha nneeraahu nikumaneno. Nyenya nnaphwanela osuwela wi wakhala wi noomuroromela Yehova, nnanwerya ovilela yaweeha vyakala. Noosuwela wi Yehova wiiliwiili onahaala onivaha ikuru wi niwerye okhala oororomeleya wa yoowo.